Visit:
నాంపల్లి క్రిమినల్‌ కోర్టులు, నవంబర్‌ 28 (నమస్తే తెలంగాణ): ‘ఐబొమ్మ’ వెబ్‌సైట్‌ నిర్వాహకుడు ఇమ్మడి రవిని డిసెంబర్‌ 2న కోర్టు ఎదుట హాజరుపర్చాలని నాంపల్లిలోని 12వ అదనపు చీఫ్‌ జ్యుడీషియల్‌ మెజిస్ట్రేట్‌ కోర్టు పోలీసులను ఆదేశించింది. మరో 3 కేసుల్లో పీటీ వారెంట్‌పై రవిని అరెస్టుకు అనుమతివ్వాలని కోరుతూ అధికారులు దాఖలు చేసిన పిటిషన్లపై శుక్రవారం కోర్టు విచారణ చేపట్టింది.
పైరసీ వల్ల తెలుగు సినిమా రంగానికి తీవ్ర నష్టం వాటిల్లిందంటూ మూవీ ఆర్టిస్ట్స్‌ అసోసియేషన్‌ (మా) అధ్యక్షుడు మంచు విష్ణు, దర్శకుడు దిల్‌రాజు, మరో ప్రముఖ నిర్మాత చేసిన ఫిర్యాదు మేరకు సైబర్‌ క్రైమ్‌ అధికారులు ఈ 3 కేసులు నమోదు చేశారు. కాగా, పీటీ వారెంట్లపై పోలీసులు రవిని అన్ని కేసుల్లో ఒకేసారి అరెస్టు చేయకుండా ఆయన బెయిల్‌కు అడ్డుకట్ట వేస్తున్నారన్న ఆరోపణలు వినిపిస్తున్నాయి. రవి బెయిల్‌ పిటిషన్‌పై సోమవారం వాదనలు కొనసాగనున్నాయి.
