ఎంపీడీవో పోస్టులే 140

గ్రూప్‌ -1 పోస్టుల్లో అత్యధికంగా ఎంపీడీవో పోస్టులే ఉన్నాయి. మొత్తం 563 పోస్టుల్లో 140 ఎంపీడీవో పోస్టులుండగా, ఆ తర్వాత డీఎస్పీ పోస్టులు 115 ఉన్నాయి. కీలకమైన డిప్యూటీ కలెక్టర్‌ పోస్టులు 45 మాత్రమే ఉన్నాయి.

• ఆ తర్వాత అత్యధికంగా 115 డీఎస్పీ పోస్టులు

హైదరాబాద్‌, ఫిబ్రవరి 19(నమస్తే తెలంగాణ) : గ్రూప్‌ -1 పోస్టుల్లో అత్యధికంగా ఎంపీడీవో పోస్టులే ఉన్నాయి. మొత్తం 563 పోస్టుల్లో 140 ఎంపీడీవో పోస్టులుండగా, ఆ తర్వాత డీఎస్పీ పోస్టులు 115 ఉన్నాయి. కీలకమైన డిప్యూటీ కలెక్టర్‌ పోస్టులు 45 మాత్రమే ఉన్నాయి. మున్సిపల్‌ కమిషనర్‌ గ్రేడ్‌-2 పోస్టులు 41 ఉన్నాయి. అభ్యర్థులు వయోపరిమితి, విద్యార్హతల ఆధారంగా ఆయా పోస్టులకు అర్హులవుతారు. కొన్ని పోస్టులకు మాత్రం ప్రత్యేకమైన విద్యార్హతలు అవసరం కాగా వాటి వివరాలిలా ఉన్నాయి.

విద్యార్హతలు..

• రీజినల్‌ ట్రాన్స్‌పోర్ట్‌ ఆఫీసర్‌ (ఆర్టీవో) ఉ ద్యోగాలకు బీటెక్‌ మెకానికల్‌, ఆటోమొబైల్‌ ఇంజినీరింగ్‌లో డిగ్రీ పూర్తిచేసి ఉండాలి.
• అసిస్టెంట్‌ ట్రెజరీ అధికారి ఉద్యోగానికి డిగ్రీలో కామర్స్‌, ఎకనామిక్స్‌ లేదా గణితం సబ్జెక్టుల్లో కనీసం సెకండ్‌క్లాస్‌లో ఉత్తీర్ణులై ఉండాలి.
• అసిస్టెంట్‌ కమిషనర్‌ ఆఫ్‌ లేబర్‌ పోస్టుకు ఆర్ట్స్‌, సైన్స్‌, కామర్స్‌ డిగ్రీ వారు అర్హులే అయినా. ఇద్దరు అభ్యర్థులకు సమాన మార్కులు వస్తే లేబర్‌ వెల్ఫేర్‌ అండ్‌ పర్సనల్‌ మేనేజ్‌మెంట్‌/ఇండస్ట్రియల్‌ లేబర్‌ రిలేషన్స్‌ స్పెషలైజేషన్‌తో సోషల్‌వర్క్‌ పీజీ పూర్తిచేసిన వారికి ప్రాధాన్యమిస్తారు.
• మిగతా అన్ని పోస్టులకు ఏదైనా డిగ్రీ పూర్తిచేసిన వారు పోటీపడవచ్చు.

అడ్డంకిగా సివిల్స్‌
యూపీఎస్సీ సివిల్స్‌ ప్రిలిమ్స్‌ పరీక్షలు మే 26న జరగనున్నాయి. మెయిన్‌ సెప్టెంబర్‌లో జరుగనున్నది. గ్రూప్‌ -1 ప్రిలిమ్స్‌ను మే, జూన్‌లో నిర్వహించనున్నట్లు టీఎస్‌పీఎస్సీ ప్రకటించింది. మెయిన్‌ను సెప్టెంబర్‌ లేదా అక్టోబర్‌లో నిర్వహిస్తామని వెల్లడించింది. దీంతో అటు సివిల్స్‌కు.. ఇటు గ్రూప్‌ -1కు ప్రిపేరయ్యే వారికి ఇబ్బందులు ఎదురవుతున్నాయన్న వాదనలున్నాయి. రెండింటి సిలబస్‌ వేర్వేరుగా ఉండటంతో ఇబ్బందులు తలెత్తుతాయని అభ్యర్థులంటున్నారు.