పీజీ కోర్సుల్లో కింగ్‌.. కంప్యూటర్‌ సైన్స్‌

పీజీ కోర్సుల్లో ఎమ్మెస్సీ కంప్యూటర్‌ సైన్స్‌ ఈ ఏడాది కింగ్‌లా మారింది. ఈ సంవత్సరం పీజీ ప్రవేశాల్లో అత్యధిక అడ్మిషన్లు ఈ కోర్సులోనే నమోదయ్యాయి.

• ఈసారి ప్రవేశాల్లో ఈ కోర్సులోనే చేరికలు అత్యధికం
• కామర్స్‌, ఆర్ట్స్‌ కోర్సుల్లో ప్రవేశాలు క్రమంగా తగ్గుదల

హైదరాబాద్‌, నవంబర్‌ 29 (నమస్తే తెలంగాణ): పీజీ కోర్సుల్లో ఎమ్మెస్సీ కంప్యూటర్‌ సైన్స్‌ ఈ ఏడాది కింగ్‌లా మారింది. ఈ సంవత్సరం పీజీ ప్రవేశాల్లో అత్యధిక అడ్మిషన్లు ఈ కోర్సులోనే నమోదయ్యాయి. ఇదివరకు ఎం కాం జనరల్‌, ఎమ్మెస్సీ గణితం వంటి కోర్సుల ఆధిపత్యం సాగగా, ఈ ఏడాది పరిస్థితి మారింది. ఈ ఏడాది కామన్‌ పోస్ట్‌ గ్రాడ్యుయేట్‌ ఎంట్రెన్స్‌ టెస్ట్‌ (సీపీ గెట్‌) సీట్ల భర్తీ వివరాలను పరిశీలిస్తే ఈ విషయం వెల్లడైంది. ఇంజినీరింగ్‌, పాలిటెక్నిక్‌ కోర్సుల్లోనూ సీఎస్‌ఈ వంటి కంప్యూటర్‌ సైన్స్‌ కోర్సుల ఆధిపత్యం కొనసాగుతుండగా, తాజాగా పీజీ కోర్సుల్లోనూ ఇదే పరిస్థితి నెలకొన్నది.

ఆర్ట్స్‌ తగ్గుముఖం.. సైన్స్‌కు డిమాండ్‌
గత మూడేండ్లుగా పీజీ కోర్సుల్లో ప్రవేశాలు తగ్గుతున్నాయి. 2020లో 26,572 మంది విద్యార్థులు పీజీ కోర్సుల్లో చేరితే 2021కి వచ్చేసరికి 25,588కి తగ్గింది. ఇక ఈ ఏడాది 23,138కి పడిపోయింది. ఈ మూడేండ్ల వ్యవధిలో 3 వేలు తక్కువగా అడ్మిషన్లు నమోదయ్యాయి. మొత్తంగా కామర్స్‌, ఆర్ట్స్‌ వంటి కోర్సుల్లో ప్రవేశాలు తగ్గుతుండగా, సైన్స్‌ కోర్సుల్లో ప్రవేశాల సంఖ్య పెరుగుతున్నది.

ఈ సంవత్సరం ప్రవేశాల్లో ప్రత్యేకతలు

• ఎమ్మెస్సీ ఫిజిక్స్‌ కోర్సుకు ఇదివరకు తీవ్ర డిమాండ్‌ ఉండేది. ఇప్పుడు క్రమంగా ఆ పరిస్థితి మారిపోతున్నది. ఈ విద్యాసంవత్సరం 581 మంది విద్యార్థులు మాత్రమే చేరారు.
• ఎమ్మెస్సీ న్యూట్రిషన్‌ అండ్‌ డైటిటిక్స్‌లో ఈ ఏడాది మొత్తం 274 మంది చేరితే.. వీరిలో 265 మంది అమ్మాయిలు కాగా, కేవలం 9 మంది అబ్బాయిలు.
• ఎమ్మెస్సీ స్టాటిస్టిక్స్‌లో 425 సీట్లు నిండగా, 357 అమ్మాయిలే కైవసం చేసుకొన్నారు.
• ఎమ్మెస్సీ జువాలజీలో 1,658 సీట్లకు 1500, ఎమ్మెస్సీ గణితంలో 1,393 సీట్లకు 1,120, ఎమ్మెస్సీ బాటనీలో 1,171 సీట్లకు 1,017 సీట్లను అమ్మాయిలే దక్కించుకొన్నారు.
• ఎమ్మెస్సీ ఫిజిక్స్‌ (మైక్రోవేవ్స్‌) 19 సీట్లకు, ఎమ్మెస్సీ బాటనీ (ఫీల్డ్‌ పాతాలజీ) 18 సీట్లల్లో అబ్బాయిలు ఒక్కరూ చేరలేదు. ఎంఏ పర్షియన్‌ కోర్సులో 8 సీట్లు నిండితే మొత్తం సీట్లను అబ్బాయిలే కైవసం చేసుకొన్నారు.