వడివడిగా ఫుడ్‌ ప్రాసెసింగ్‌ జోన్ల భూసేకరణ

ఆహార శుద్ధి పరిశ్రమను పెద్ద ఎత్తున అభివృద్ధి చేసేందుకు రాష్ట్ర ప్రభుత్వం వడివడిగా అడుగులు వేస్తున్నది. ఇందులో భాగంగా ప్రతిపాదిత ప్రత్యేక ఫుడ్‌ ప్రాసెసింగ్‌ జోన్ల ఏర్పాటునకు చేపట్టిన భూసేకరణ తుది దశకు చేరుకొన్నది. 33 జిల్లాలకు గాను 25 జిల్లాల్లో భూసేకరణ చేపట్టగా, అందులో 15 జిల్లాల్లో భూసేకరణ పూర్తయింది.

• 15 జిల్లాల్లో పూర్తయిన ప్రక్రియ
• మిగిలిన జిల్లాల్లోనూ తుది దశకు
• త్వరలో కేటాయింపులకు ఏర్పాట్లు
• ఆహార శుద్ధి పరిశ్రమలో ముందడుగు

హైదరాబాద్‌, జూన్‌ 8 (నమస్తే తెలంగాణ): ఆహార శుద్ధి పరిశ్రమను పెద్ద ఎత్తున అభివృద్ధి చేసేందుకు రాష్ట్ర ప్రభుత్వం వడివడిగా అడుగులు వేస్తున్నది. ఇందులో భాగంగా ప్రతిపాదిత ప్రత్యేక ఫుడ్‌ ప్రాసెసింగ్‌ జోన్ల ఏర్పాటునకు చేపట్టిన భూసేకరణ తుది దశకు చేరుకొన్నది. 33 జిల్లాలకు గాను 25 జిల్లాల్లో భూసేకరణ చేపట్టగా, అందులో 15 జిల్లాల్లో భూసేకరణ పూర్తయింది. మిగిలిన 10 జిల్లాల్లో సగానికిపైగా భూ సేకరణ పూర్తి కాగా, మిగిలిన భూముల సేకరణ ప్రక్రియ కొనసాగుతున్నది. రాష్ట్రవ్యాప్తంగా 10 వేల ఎకరాల్లో ఆహార శుద్ధి పరిశ్రమలు ఏర్పాటు చేయాలని లక్ష్యంగా పెట్టుకొన్న ప్రభుత్వం.. ప్రతి జిల్లాలో కనీసం 500 ఎకరాలకు తగ్గకుండా అత్యాధునిక మౌలిక సదుపాయాలు, లాజిస్టిక్స్‌, వేర్‌ హౌసింగ్‌ తదితర సౌకర్యాలు, ఎగుమతుల ఏర్పాట్లతో ప్రత్యేక జోన్లను తేవాలని నిర్ణయించింది. కాలుష్య నివారణ చర్యలతోపాటు ప్లగ్‌ అండ్‌ ప్లే సౌకర్యంతో అభివృద్ధి చేయాలని నిశ్చయించింది.

ఈ ప్రత్యేక ఫుడ్‌ ప్రాసెసింగ్‌ జోన్లలో ఏర్పాటయ్యే యూనిట్లకు ప్రత్యేక ప్రోత్సాహకాలు ఇవ్వాలని, ఎస్సీ, ఎస్టీ, మైనారిటీలు, మహిళలు, రైతు సంఘాలకు అదనపు ప్రోత్సాహకాలు కల్పించాలని నిర్ణయించింది. ఈ జోన్లలో యూనిట్ల ఏర్పాటు కోసం టీఎస్‌ఐఐసీకి 1,496 దరఖాస్తులు వచ్చాయి. హైదరాబాద్‌, రంగారెడ్డి, యాదాద్రి భువనగిరి, సూర్యాపేట, భద్రాద్రి కొత్తగూడెం, ఆదిలాబాద్‌, జయశంకర్‌ భూపాలపల్లి, కుమ్రంభీం ఆసిఫాబాద్‌ తదితర జిల్లాల్లో తగినంత భూమి అందుబాటులో లేకపోవటంతో ఈ జిల్లాల్లో సేకరణ సాధ్యం కాలేదని అధికారులు తెలిపారు. మిగిలిన జిల్లాల్లో భూసేకరణ దాదాపు పూర్తయినట్టేనని వెల్లడించారు. త్వరలో భూ కేటాయింపుల ప్రక్రియ చేపడతామని పేర్కొన్నారు.

రాష్ట్రంలో ఫుడ్‌ ప్రాసెసింగ్‌ రంగం విశేషాలు, ప్రధానపెట్టుబడుల వివరాలు :

• ఫుడ్‌ ప్రాసెసింగ్‌ రంగంలో 2021-22లో రూ.2,309 కోట్ల పెట్టుబడులతో 60 కొత్త పరిశ్రమలు వచ్చాయి. ఇందులో ప్రధానంగా డెయిరీ, బేవరేజెస్‌, పశువుల దాణా, పెంపుడు జంతువుల దాణా, బిస్కెట్లు-స్నాక్స్‌ తదితర పరిశ్రమలున్నాయి. వీటి ద్వారా 20 వేల మందికి ఉపాధి లభిస్తుందని అంచనా. ఇప్పటికే ప్రభుత్వం ఆయా పరిశ్రమలకు భూకేటాయింపులు కూడా పూర్తి చేసింది.
• హిందుస్థాన్‌ కోకాకోలా బేవరేజెస్‌ సంస్థ సిద్దిపేటలోని బండ తిమ్మాపూర్‌లో రూ.1,000 కోట్లతో అత్యాధునిక ప్లాంట్‌ను ఏర్పాటు చేస్తున్నది. ఇప్పటికే అక్కడ కోకాకోలా ఒక ప్లాంట్‌ను నిర్వహిస్తుండగా, ఇది రెండవది కావటం విశేషం.
• అమూల్‌ దక్షిణ భారతదేశంలో అతిపెద్ద అత్యాధునిక ప్లాంటును ఏర్పాటు చేసేందుకు ప్రభుత్వంతో ఒప్పందం చేసుకొన్నది. రెండు దశల్లో రూ.500 కోట్లతో రోజుకు 5 లక్షల లీటర్ల పాల సామర్థ్యంతో కూడిన ఈ ప్లాంట్‌లో 500 మందికి ఉద్యోగావకాశాలు లభించనున్నాయి. పాలు, పెరుగు, లస్సీ, మజ్జిగ, పన్నీర్‌, మిఠాయిలు తదితర ఉత్పత్తులు తయారు చేయనున్నారు.
• పెంపుడు జంతువుల ఆహారాన్ని ఉత్పత్తి చేసే మార్స్‌ పెట్‌కేర్‌ సంస్థ రూ.500 కోట్ల పెట్టుబడితో హైదరాబాద్‌లోని తమ ప్లాంటును మూడు రెట్లు పెంచుకోనున్నది. ఈ మేరకు ప్రభుత్వంతో ఒప్పందం చేసుకొన్నది. ఇందులో 200 మందికి ఉద్యోగాలు లభిస్తాయి.
• ఫిష్‌ఇన్‌ కంపెనీ రూ.1,000 కోట్ల పెట్టుబడితో మిడ్‌ మానేరు రిజర్వాయర్‌లో ఏటా 85,000 టన్నుల తిలాపియా చేపలను ఉత్పత్తి చేయాలని లక్ష్యంగా పెట్టుకొన్నది. చేపల పెంపకం, ఉత్పత్తికి సంబంధించిన సమగ్ర పర్యావరణ వ్యవస్థ ఏర్పాటుకు ముందుకొచ్చింది. చేప పిల్లల ఉత్పత్తి నుంచి హ్యాచరీస్‌, ఫీడ్‌ తయారీ, కేజ్‌ కల్చర్‌, ప్రాసెసింగ్‌, ఎగుమతి తదితర అన్నిరకాల కార్యక్రమాలు ఇది నిర్వహించనున్నది. 3 వేల మందికి ప్రత్యక్షంగా, 2 వేల మందికి పరోక్షంగా ఉద్యోగావకాశాలు దక్కుతాయి.