ప్రతిపక్షంలో ఉన్నా రాష్ట్రం కోసమే పరితపన.. కేటీఆర్‌ స్పందనపై నెటిజన్ల అభినందనల వెల్లువ

ప్రజలకు మంచి చేయాలనే సంకల్పం ఉంటే అధికారంలో ఉన్నా... ప్రతిపక్షంలో ఉన్నా ఆ తపన కొనసాగుతూనే ఉంటుంది. ఇందుకు ఐటీశాఖ మాజీ మంత్రి కేటీఆర్‌ ఉదాహరణగా నిలుస్తున్నారు.

• ఓపెన్‌ ఏఐని హైదరాబాద్‌కు ఆహ్వానించిన కేటీఆర్‌
• సంస్థను నెలకొల్పాలని సామ్‌ ఆల్ట్‌మన్‌కు ఆహ్వానం

హైదరాబాద్‌, ఆగస్టు 24(నమస్తే తెలంగాణ): ప్రజలకు మంచి చేయాలనే సంకల్పం ఉంటే అధికారంలో ఉన్నా… ప్రతిపక్షంలో ఉన్నా ఆ తపన కొనసాగుతూనే ఉంటుంది. ఇందుకు ఐటీశాఖ మాజీ మంత్రి కేటీఆర్‌ ఉదాహరణగా నిలుస్తున్నారు. ప్రతిపక్షంలో ఉన్నా రాష్ట్రం కోసం పరితపిస్తున్నారు. ప్రభుత్వం చేయాల్సిన పనిని.. ప్రతిపక్షంలో ఉండి కూడా చేస్తున్నారని ప్రశంసలు అందుకుంటున్నారు. ప్రపంచ ఐటీ కంపెనీలను హైదరాబాద్‌కు రప్పించేందుకు తన ప్రయత్నాలు చేస్తూనే ఉన్నారు. కృత్రిమ మేధస్సులో ప్రపంచంలోనే అగ్రగామి సంస్థగా పేరొందిన ఓపెన్‌ ఏఐని హైదరాబాద్‌కు ఆహ్వానించారు. కేటీఆర్‌ రాజనీతజ్ఞత, వ్యవహారశైలిపై నెటిజన్లు ప్రశంసలు కురిపిస్తున్నారు.

హైదరాబాద్‌ ది బెస్ట్‌… ఎందుకంటే!
ఓపెన్‌ ఏఐ సంస్థ భారతదేశంలో తొలి కార్యాలయాన్ని నెలకొల్పాలని నిర్ణయించింది. ఈ విషయాన్ని ఆ సంస్థ సీఈవో సామ్‌ ఆల్ట్‌మన్‌ ఎక్స్‌లో పోస్ట్‌ చేశారు. దీనిపై వెంటనే స్పందించిన కేటీఆర్‌.. హైదరాబాద్‌కు రావాలని ఆహ్వానించారు. హైదరాబాద్‌ అన్ని విధాలుగా అనువైన గమ్యస్థానమని చెప్పారు. సాంకేతిక నిపుణుల లభ్యత, టీహబ్‌, వీహబ్‌, టీవర్స్‌, ఇన్నోవేషన్‌ సెల్‌ వంటి వ్యవస్థలు ఉన్నట్టు వివరించారు. తెలంగాణలో గత ప్రభుత్వ హయాంలో 2020ని కృత్రిమ మేధ సంవత్సరంగా ప్రకటించి, పలు కార్యక్రమాలు నిర్వహించినట్టు గుర్తుచేశారు.

హైదరాబాద్‌ ఐటీలో కేటీఆర్‌ మార్క్‌
తెలంగాణ రాష్ట్ర ఏర్పాటు తర్వాత తొలి ఐటీశాఖ మంత్రిగా బాధ్యతలు చేపట్టిన కేటీఆర్‌.. హైదరాబాద్‌ ఐటీ బ్రాండ్‌ను మరింత ఉన్నత స్థాయికి తీసుకెళ్లారు. కొత్త ఐటీ, పరిశ్రమల పాలసీలు ప్రవేశపెట్టారు. పరిశ్రమల ఫ్రెండ్లీ ప్రభుత్వంగా గుర్తింపు తీసుకొచ్చారు. 2014లో రాష్ట్ర ఐటీ ఎగుమతులు 57,258 కోట్లు ఉండగా 2023-24లో రూ. 2.70 లక్షల కోట్లకు పెరిగింది. పదేండ్లలో ఏకంగా రూ. 2.13 లక్షల కోట్లు పెరిగాయి. ఐటీ దిగ్గజ కంపెనీలను రప్పించడం, ఎగుమతులు పెరగడంలో కేటీఆర్‌ తన మార్క్‌ చూపించారు.

నెటిజన్ల స్పందన.. అభినందన

• ప్రతిపక్ష నాయకుడు తమ రాష్ట్రానికి పెట్టుబడుల కోసం ప్రయత్నించడం నేను ఇంతకుముందు ఎప్పుడూ
  జరగలేదు
  -నిరంకుశ్‌దాస్‌
• వావ్‌! ప్రతిపక్షంలో ఉండి కూడా నగరం కోసం ప్రచారం చేస్తున్నారు… హ్యాట్సాఫ్‌’ -విక్రమ్‌మోహన్‌
• పాలకపక్షంతో విభేదాలను పకనపెట్టి, ఒక ప్రతిపక్ష నాయకుడు తన రాష్ట్రానికి పెట్టుబడులను ఆహ్వానిస్తున్నారు
  -యోగేశ్‌శర్మ
• యూపీ మంత్రుల నుంచి మేము కోరుకునేది ఇదే. యోగి ఆదిత్యనాథ్‌.. ఇది గమనించండి -అవంతిక లోహర్‌
• కరెక్టుగా చెప్పారు. భారతదేశంలో ఓపెన్‌ ఏఐ కార్యాలయానికి హైదరాబాద్‌ సరైన ప్రాంతం
  -ఇండియన్‌ ట్రెండ్‌
• ఈ వ్యక్తి ఎన్నికల్లో ఓడిపోయి ప్రతిపక్షంలో ఉన్నప్పటికీ ఆయన సందేశం చూడండి. అధికారంలో ఉన్నా, లేకున్నా మీ సొంత రాష్ట్రంలోని నాయకులతో దీన్ని పోల్చుకోండి. పార్టీలకు అతీతంగా ఉన్న సోకాల్డ్‌ జాతీయ నాయకులతో పోల్చుకోండి
  – భారతీయనెవేషక్‌
• నిజమైన నాయకత్వం అంటే ఏమిటో మాకు చూపించినందుకు ధన్యవాదాలు. రాష్ట్ర ప్రభుత్వానికి ఎవరు నాయకత్వం వహించినా.. రాష్ట్ర, ప్రజల ప్రయోజనాలను కాపాడాలి. స్థిరమైన పాలనకు తెలంగాణ ఒక ఉదాహరణగా నిలవాలి’
  -శ్రీకాంత్‌