Visit:
హైదరాబాద్ , జనవరి 25: విధి నిర్వహణలో ఎన్నో ప్రమాదాలకు ఎదురెళ్లుతుంటారు పోలీసులు. ప్రాణాలకు తెగించి నేరస్థులను పట్టుకుంటారు. ఈ క్రమంలో ఒక్కోసారి తుపాకీ తూటాలను కూడా పోలీసులు లెక్కచేయరు. హెడ్కానిస్టేబుల్ వెంకటరెడ్డి (Head Constable Venkat Reddy) కూడా అలాంటి సాహసమే చేశారు. కరుడుగట్టిన నేరస్థుడిని పట్టుకునే క్రమంలో బుల్లెట్ గాయమైనా.. ప్రాణాలను పణంగా పెట్టిన ఆయన పట్టువిడువలేదు. నేరస్థుడిని అరెస్ట్ చేసిన ఆయన తెగువకు కేంద్ర ప్రభుత్వం గ్యాలంటరీ అవార్డును ప్రకటించింది.
ఎదురుగా 125 కేసుల్లో నిందితుడైన కరడుగట్టిన నేరస్థుడు. అదును చూసి పోలీసులపైకి తుపాకీ ఎక్కుపెట్టాడు.. రెండు రౌండ్లు కాల్పులు జరిపాడు. తూటా దూసుకుపోయి కాలికి గాయమైనా, రక్తం ధారగా కారున్నా పట్టించుకోకుండా ప్రాణాలకు తెగించి ఆ నిందితుడిని హెడ్ కానిస్టేబుల్ వెంకట్ రెడ్డి పట్టుకున్నారు. గచ్చిబౌలిలోని ప్రిజం పబ్ వద్ద జరిగిన ఈ భయానక దాడిలో మోస్ట్ వాంటెడ్ ప్రభాకర్ అలియాస్ రాహుల్ రెడ్డి ఎట్టకేలకు పోలీసులకు చిక్కాడు.
నానక్రామ్గూడకు చెందిన ప్రభాకర్ (30) పేరు మోసిన నేరస్థుడు. అతడిపై తెలుగు రాష్ట్రాల్లోనే దాదాపు 125కు పైగా కేసులు ఉన్నాయి. 2022లో విశాఖ సెంట్రల్ జైలు ఎస్కార్ట్ నుంచి తప్పించుకున్న అతడు.. అప్పటి నుంచి పోలీసుల కళ్లుగప్పి తిరుగుతున్నాడు. గౌలిదొడ్డిలోని ‘ప్రిజం పబ్’కు ప్రభాకర్ వస్తున్నట్లు హెడ్ కానిస్టేబుల్ మర్రి వెంకటరెడ్డికి పక్కా సమాచారం అందింది. వెంటనే అప్రమత్తమైన వెంకటరెడ్డి తన సహచరులు ప్రదీప్ రెడ్డి, వీరాస్వామిలతో కలిసి పబ్ వద్దకు చేరుకున్నారు. అక్కడ నిందితుడిని గుర్తించి, లొంగిపోవాలని ఆయన ఆదేశించారు.
పోలీసులను చూసి కంగుతిన్న ప్రభాకర్ తప్పించుకునేందుకు కాల్పులకు తెగబడ్డాడు. తుపాకీని పోలీసుల వైపు గురిపెట్టి రెండు రౌండ్లు కాల్పులు జరిపాడు. ఒక తూటా వెంకటరెడ్డి ఎడమ కాలి బొటనవేలికి తగిలి తీవ్ర రక్తస్రావమైంది. అయినప్పటికీ ఆయన వెనకడుగు వేయలేదు. బుల్లెట్ గాయాన్ని లెక్కచేయకుండాఇతర కానిస్టేబుళ్లతో కలిసి నిందితుడిపైకి దూకి అతడిని కట్టడి చేశారు వెంకటరెడ్డి . ప్రాణాలకు తెగించి నిందితుడిని పట్టుకోవడంతో అందరూ ఊపిరిపీల్చుకున్నారు.
గత 20 ఏళ్లుగా పోలీస్ శాఖలో అంకితభావంతో పనిచేస్తున్నారు మర్రి వెంకటరెడ్డి. గతంలోనూ పలువురు భయంకరమైన నేరస్థులను పట్టుకోవడంలో ఆయన కీలక పాత్ర పోషించారు. గచ్చిబౌలి పీఎస్ పరిధిలో నమోదైన ఉదంతంలో ఆయన చూపిన ధైర్యసాహసాలకు గుర్తింపుగా, 2026 రిపబ్లిక్ డే సందర్భంగా ఆయనకు కేంద్ర ప్రభుత్వం ‘మెడల్ ఫర్ గ్యాలంటరీ’ అవార్డు ప్రకటించింది. వెంకటరెడ్డి బృందంపై కాల్పులు జరిపిప ప్రభాకర్పై హత్యాయత్నం, ఆర్మ్స్ యాక్ట్ కింద కేసులు నమోదు చేశారు.
