PhD | రాష్ట్రంలో పీహెచ్‌డీకి ఫుల్‌ డిమాండ్‌! ఐదేండ్లల్లో భారీగా పెరిగిన అడ్మిషన్లు

విద్యార్థులు ఇటీవల పీహెచ్‌డీపై మనసు పారేసుకుంటున్నారు. ఏటేటా ప్రవేశాలు పెరుగుతుండడం ఈ కోర్సులకు ఉన్న డిమాండ్‌ను చెప్పకనే చెప్తున్నది.

• పరిశోధన వైపు విద్యార్థుల ఆసక్తి
• దేశీయంగానూ పెరిగిన ప్రవేశాలు

హైదరాబాద్‌, జనవరి 28 (నమస్తే తెలంగాణ): విద్యార్థులు ఇటీవల పీహెచ్‌డీపై మనసు పారేసుకుంటున్నారు. ఏటేటా ప్రవేశాలు పెరుగుతుండడం ఈ కోర్సులకు ఉన్న డిమాండ్‌ను చెప్పకనే చెప్తున్నది. విద్యార్థులు పరిశోధన వైపు మొగ్గు చూపడమే ఇందుకు కారణంగా తెలుస్తున్నది. దేశీయంగానూ పీహెచ్‌డీలో ప్రవేశాలు ఇటీవల భారీగానే పెరిగాయి. 2017-18 విద్యా సంవత్సరం నుంచి 2021-22 విద్యాసంవత్సరం వరకు ఐదేండ్ల కాలంలో రాష్ట్రంలో పీహెచ్‌డీ అడ్మిషన్లు సగానికిపైగా పెరిగినట్టు ఆలిండియా సర్వే ఆన్‌ హయ్యర్‌ ఎడ్యుకేషన్‌ ఇటీవల వెల్లడించింది. సంఖ్యాపరంగా చెప్పుకోవాలంటే 2,083 పీహెచ్‌డీ అడ్మిషన్లు అదనంగా నమోదయ్యాయి. వీటిలో రెగ్యులర్‌ పీహెచ్‌డీలే 90 శాతానికిపైగా ఉండడం గమనార్హం. రాష్ట్రంలో మొత్తం 6,967 అడ్మిషన్లు రాగా అందులో 6,921 అడ్మిషన్లు రెగ్యులర్‌ కాగా, 46 మంది మాత్రమే దూరవిద్య ద్వారా పీహెచ్‌డీ కోర్సుల్లో చేరారు. నాలుగేండ్ల డిగ్రీ పూర్తిచేసిన వారికి పీజీతో సంబంధం లేకుండా నేరుగా పీహెచ్‌డీ చేసేందుకు ప్రవేశ పరీక్ష నిర్వహిస్తున్నారు. పీహెచ్‌డీలో ప్రవేశాలు పెరిగేందుకు దీనిని కూడా ఓ కారణంగా చెప్పుకోవచ్చు. అదే సమయంలో ఎంఫిల్‌ కోర్సుల్లో చేరే వారి సంఖ్య దారుణంగా పడిపోతున్నది. 2017-18లో 794మంది ఎంఫిల్‌లో చేరితే 2021-22 నాటికి ఆ సంఖ్య 100కు పడిపోవడం గమనార్హం.

గత ఐదేండ్లలో అడ్మిషన్లు ఇలా

• పీజీ కోర్సుల్లో చేరుతున్న వారి సంఖ్య రెట్టింపవుతున్నది. అప్పట్లో పీజీ అడ్మిషన్ల సంఖ్య 1.94 లక్షలుంటే, ఈ ఐదేండ్లల్లో 2.07లక్షలకు పెరిగింది.
• అండర్‌ గ్రాడ్యుయేట్‌ కోర్సుల్లోనూ అడ్మిషన్లు గణనీయంగా పెరిగాయి. 2017-18లో యూజీ కోర్సుల్లో చేరినవారి సంఖ్య 10.79 లక్షలుంటే ఉంటే 2021-22 నాటికి వీరి సంఖ్య 12.73 లక్షలకు చేరింది.
• డిప్లొమా కోర్లుల్లో చేరుతున్న విద్యార్థుల సంఖ్య తగ్గుతున్నది. 2017-18లో 1.28 లక్షల మంది డిప్లొమా కోర్సుల్లో చేరితే, 2021-22 నాటికి ఆ సంఖ్య 91 వేలకు పడిపోయింది.
• ఇంటిగ్రేటెడ్‌ కోర్సుల్లో అడ్మిషన్లు దాదాపు రెండింతలయ్యాయి. ఐదేండ్ల కాలంలో ఈ కోర్సుల్లో అడ్మిషన్లు 4,950 నుంచి 7,619కు పెరిగాయి. సర్టిఫికెట్‌ కోర్సుల్లో అడ్మిషన్లు 1,835 నుంచి 3,122కి చేరాయి.

దేశవ్యాప్తంగా పీహెచ్‌డీ అడ్మిషన్లు ఇలా