మొదటి విడతలో జోరుగా ఏకగ్రీవాలు.. వనపర్తి జిల్లాలో మూడు జీపీలు బీఆర్‌ఎస్‌ ఖాతాలోకి..

తొలి విడుత పంచాయతీ ఎన్నికల నామినేషన్ల ప్రక్రియ శనివారం ముగియడంతో పలుచోట్ల ఒక్కో నామినేషన్‌ మాత్రమే దాఖలు కావడంతో సర్పంచ్‌లుగా ఏకగ్రీవంగా ఎన్నికయ్యారు. సర్పంచ్‌లే గాకుండా పలుచోట్ల వార్డు మెంబర్లకు కూడా సింగిల్‌ నామినేషన్‌ దాఖలు కావడంతో ఎన్నిక ఏకగ్రీవమైంది.

• చాలాచోట్ల వేలానికే మొగ్గు!
• వేలంలో దక్కించుకున్న వ్యక్తిని సన్మానించిన మంత్రి జూపల్లి
• జగిత్యాల జిల్లాలో ఒకేస్థానానికి తలపడుతున్న తల్లీకూతురు

నమస్తే న్యూస్‌నెట్‌వర్క్‌, నవంబర్‌ 29 : తొలి విడుత పంచాయతీ ఎన్నికల నామినేషన్ల ప్రక్రియ శనివారం ముగియడంతో పలుచోట్ల ఒక్కో నామినేషన్‌ మాత్రమే దాఖలు కావడంతో సర్పంచ్‌లుగా ఏకగ్రీవంగా ఎన్నికయ్యారు. సర్పంచ్‌లే గాకుండా పలుచోట్ల వార్డు మెంబర్లకు కూడా సింగిల్‌ నామినేషన్‌ దాఖలు కావడంతో ఎన్నిక ఏకగ్రీవమైంది. అదీగాక కొన్నిచోట్ల మొత్తం పంచాయతీలు సైతం ఏకగ్రీవమయ్యాయి. అయితే అధికారులు అధికారికంగా ప్రకటించాల్సి ఉన్నది. వరంగల్‌ జిల్లా రాయపర్తి మండలం మొరిపిరాలలో సర్పంచ్‌తోపాటు ఎనిమిది వార్డు సభ్యుల స్థానాలకు సైతం ఒక్కో నామినేషన్‌ దాఖలైంది. జనగామ జిల్లా స్టేషన్‌ ఘన్‌పూర్‌ మండలం జిట్టగూడెం సర్పంచ్‌తోపాటు ఎనిమిది వార్డు సభ్యుల స్థానాలకు ఒక్కొక్కరే నామినేషన్‌ దాఖలు చేశారు. నిజామాబాద్‌, కామారెడ్డి జిల్లాల్లోని పలు గ్రామాల్లో సర్పంచ్‌, వార్డు స్థానాలకు సింగిల్‌ నామినేషన్లు దాఖలయ్యాయి.

కాగా వనపర్తి జిల్లాలో మూడు పంచాయతీలు బీఆర్‌ఎస్‌ ఖాతాలో చేరాయి. సీఎం రేవంత్‌రెడ్డి సొంత గ్రామమైన నాగర్‌కర్నూల్‌ జిల్లా వంగూరు మండలం కొండారెడ్డిపల్లిలో సర్పంచ్‌తోపాటు 10 మంది అభ్యర్థులు వార్డు స్థానాలు ఏకగ్రీవమయ్యాయి. ఈ స్థానం ఎస్సీకి రిజర్వ్‌ కావడంతో మాజీ మావోయిస్టు మల్లెపాకుల వెంకటయ్య కల్వకుర్తి పీఎస్‌లో హోంగార్డు ఉద్యోగానికి రాజీనామా చేయగా సర్పంచ్‌గా ఏకగ్రీవంగా ఎన్నుకున్నారు. జోగుళాంబ గద్వాల జిల్లా కేటీదొడ్డి మండలం చింతలకుంట సర్పంచ్‌గా ఓ వ్యక్తిని ఏకగ్రీవంగా తీర్మానం చేయగా.. సదరు అభ్యర్థి తమకు అవసరం లేదంటూ పలువురు నామినేషన్‌ వేసేందుకు వెళ్తుండగా.. పత్రాలు లాక్కొని అడ్డుకున్నట్టు సమాచారం. నారాయణపేట జిల్లా మద్దూర్‌ మండలం అప్పిరెడ్డిపల్లిలో పాఠశాలకు 20 గుంటల భూమి ఇస్తానని మల్లేశ్వరి (లావణ్య) గ్రామస్థులకు బాండ్‌ రాసి ఇవ్వడంతో ఆమెను ఏకగ్రీవంగా ఎన్నుకున్నారు. వెల్దండ మండలం చెదురుపల్లిలో రాత్రి 9 గంటల వరకు అధికారులు నామినేషన్లు స్వీకరించారు. జగిత్యాల జిల్లా కోరుట్ల మండలం తిమ్మాయపల్లి సర్పంచ్‌ స్థానానికి తల్లీకూతుళ్లు పోటీపడుతున్నారు. తల్లి శివరాత్రి గంగవ్వ, కూతురు పల్లపు సుమలత నామినేషన్‌ వేశారు.

వేలానికి వ్యతిరేకమంటూనే.. సన్మానించిన మంత్రి జూపల్లి

నాగర్‌కర్నూల్‌ జిల్లా పెద్దకొత్తపల్లి మండలం నారాయణపల్లి సర్పంచ్‌గిరికి వేలం నిర్వహించగా.. రూ.17 లక్షలకు స్థానికులు ఏకగ్రీవం చేసినట్టు తెలిసింది. కాగా ఓ వైపు స్థానిక మంత్రి జూపల్లి కృష్ణారావు బలవంతపు వేలం నిర్వహించి సర్పంచులను ఏకగ్రీవంగా ఎంపిక చేయడం వద్దంటూ శనివారం ప్రకటన విడుదల చేశారు. అయితే నారాయణపల్లి నుంచి వేలంలో ఎంపికైన వాములు యాదవ్‌ కాంగ్రెస్‌ పార్టీ మద్దతుదారుడు కావడంతో కొల్లాపూర్‌లోని తన క్యాంప్‌ కార్యాలయంలో మంత్రి అతడిని సన్మానించడం చర్చనీయాంశంగా మారింది.