Visit:
న్యూఢిల్లీ, డిసెంబర్‌ 9: సాగు చట్టాలకు వ్యతిరేకంగా ఢిల్లీ సరిహద్దుల్లో ఏడాదికిపైగా చేసిన నిరసనోద్యమాన్ని రైతులు విరమించారు. ఎంఎస్పీకి చట్టబద్ధత అంశంపై కమిటీ ఏర్పాటు, రైతులపై కేసుల ఉపసంహరణతోపాటు ఇతర డిమాండ్లను పరిగణనలోకి తీసుకుంటామన్న కేంద్ర ప్రభుత్వ హామీతో ఆందోళనను విరమించేందుకు నిర్ణయం తీసుకున్నామని సంయుక్త కిసాన్‌ మోర్చా (ఎస్కేఎం) గురువారం ప్రకటించింది. డిమాండ్లను పరిష్కారంపై కేంద్ర వ్యవసాయ శాఖ నుంచి అధికారిక లేఖ అందిందని పేర్కొన్నది. ఈ నేపథ్యంలో రైతులు శనివారం నుంచి విజయ యాత్రలతో దీక్షా శిబిరాలను ఖాళీ చేయడం ప్రారంభిస్తారని బీకేయూ నేత రాకేశ్‌ టికాయిత్‌ తెలిపారు. అయితే, ఉద్యమ విరమణ తాత్కాలికమేనంటూ ఎస్కేఎం పేర్కొన్నది. డిమాండ్లపై కేంద్రం వెనక్కు తగ్గితే మళ్లీ ఉద్యమబాట పడుతామని హెచ్చరించింది. ఎస్కేఎం ప్రకటనతో ఢిల్లీ సరిహద్దుల్లో నిరసన శిబిరాల్లో సంబరాలు వెల్లువెత్తాయి. రైతులు ఒకరికొకరు అభినందించుకొన్నారు. స్వీట్లు పంచుకొన్నారు. నినాదాలు చేశారు. కొందరు టెంట్లను తొలగించడం ప్రారంభించారు.
వచ్చేనెల హామీల అమలుపై సమీక్షిస్తాం..
రైతు నేత, ఎస్కేఎం కోర్‌ కమిటీ సభ్యుడు బల్బీర్‌ సింగ్‌ రాజేవాల్‌ మీడియా సమావేశంలో మాట్లాడుతూ ‘ఉద్యమాన్ని తాత్కాలికంగా మాత్రమే విరమించాం. ఇది ముగింపు కాదు’ అని స్పష్టం చేశారు. కేంద్ర ప్రభుత్వం ఎంతమేరకు తమ డిమాండ్లను నెరవేస్తుందనే దానిపై సమీక్షించేందుకు వచ్చే ఏడాది జనవరి 15న సమావేశమౌతామని తెలిపారు. డిమాండ్లను పరిష్కరించకుంటే ఆందోళనలను మళ్లీ ప్రారంభిస్తామని ఎస్కేఎం మరో నేత గుర్నామ్‌సింగ్‌ చుడానీ పేర్కొన్నారు. ఉద్యమంలో మరణించిన రైతుల త్యాగాలను గుర్తుచేసుకుంటూ శుక్రవారం సంతాప దినంగా పాటిస్తామని దర్శన్‌పాల్‌ పేర్కొన్నారు. ఉద్యమంలో 700 మందికిపైగా రైతులు అమరులయ్యారు.
