High Court | పార్టీ మారితే రాజీనామా చేయాల్సిందే.. వారిని ఏంచేయాలో ప్రజలకు బాగా తెలుసు: హైకోర్టు

పార్టీ మారాలనుకొనే ప్రజాప్రతినిధులు ముందుగా తమ పదవికి రాజీనామా చేయాలని కేరళ హైకోర్టు కీలక వ్యాఖ్యలు చేసింది. రాజీనామా అనంతరం తిరిగి నిర్వహించే ఎన్నికల్లో గెలిచి చూపించాలని సూచించింది.

• రాజీనామా చేయకపోవడమంటే ప్రజా తీర్పును అవమానించడమే 
• మళ్లీ ఎన్నికల్లో పోటీ చేసి గెలవాలి
• అప్పుడే ప్రజాస్వామ్య నైతికతకు అర్థం
• అలాంటి వారిని ఓడించాలో,గెలిపించాలో ప్రజలకు బాగా తెలుసు
• ఓ కేసులో కేరళ హైకోర్టు వ్యాఖ్యలు

High Court | హైదరాబాద్‌, జనవరి 31 (స్పెషల్‌ టాస్క్‌ బ్యూరో, నమస్తే తెలంగాణ): పార్టీ మారాలనుకొనే ప్రజాప్రతినిధులు ముందుగా తమ పదవికి రాజీనామా చేయాలని కేరళ హైకోర్టు కీలక వ్యాఖ్యలు చేసింది. రాజీనామా అనంతరం తిరిగి నిర్వహించే ఎన్నికల్లో గెలిచి చూపించాలని సూచించింది. అప్పుడే ప్రజాస్వామ్య నైతికతకు సరైన అర్థమని వ్యాఖ్యానించింది. ఓ కేసు విచారణ సందర్భంగా జస్టిస్‌ పీవీ కున్హికృష్ణన్‌ నేతృత్వంలోని ధర్మాసనం ఈ వ్యాఖ్యలు చేసింది.

ఏమిటీ కేసు?
కేరళలోని కూతట్టుకులం నగర మునిసిపల్‌ ఛైర్మన్‌పై అవిశ్వాస తీర్మానాన్ని ప్రతిపక్ష యూడీఎఫ్‌ కూటమి ప్రవేశపెట్టింది. అయితే అధికార ఎల్డీఎఫ్‌ కూటమికి చెందిన కాలా రాజు అనే మహిళా కౌన్సిలర్‌ ఛైర్మన్‌కు వ్యతిరేకంగా ఓటేస్తుందన్న అనుమానంతో సొంతపార్టీకి చెందిన నేతలే ఆమెను కిడ్నాప్‌ చేశారు. ఇదే సమయంలో తమ పార్టీకి చెందిన మహిళా కౌన్సిలర్‌ కూడా ఛైర్మన్‌కు అనుకూలంగా ఓటేయవచ్చన్న అనుమానంతో విపక్ష పార్టీ యూడీఎఫ్‌ కార్యకర్తలు కూడా ఆమెను అపహరించారు. ఈ క్రమంలో వాళ్లు అరెస్టయ్యారు. దీనిపై విచారించిన కోర్టు పలు కీలక వ్యాఖ్యలు చేస్తూ నిందితులకు బెయిల్‌ను మంజూరు చేసింది.

కోర్టు కీలక వ్యాఖ్యలు ఇవి

• ఒక పార్టీకి చెందిన ఎమ్మెల్యే లేదా ఎంపీ మరో పార్టీలోకి వెళ్లాలనుకొంటే ముందు తన పదవికి రాజీనామా చెయ్యాలి.
• ఆ తర్వాత జరిగే ఎన్నికల్లో పోటీ చేసి ప్రజామద్దతును మళ్లీ కూడగట్టుకోవాలి. అప్పుడే ప్రజాస్వామ్య నైతికతకు సరైన అర్థంగా భావించవచ్చు.
• ప్రజల మద్దతుతో ఓ పార్టీలో గెలిచి, మరో పార్టీలోకి మారినప్పటికీ పదవికి రాజీనామా చేయకపోవడమంటే ప్రజాభీష్టాన్ని అవమానించడమే అవుతుంది.
• అలాంటి పనులు చేసిన వారిని ఎన్నికల్లో ఓడించాలో? గెలిపించాలో? ప్రజలకు బాగా తెలుసు. ప్రజాస్వామ్యానికి ఉన్న గొప్పదనం అదే.
• ఈ కేసు విషయంలో ఎల్డీఎఫ్‌, యూడీఎఫ్‌ నేతలు చట్టాన్ని తమ చేతుల్లోకి తీసుకోవాలని ప్రయత్నించారు. ప్రజాస్వామ్యబద్ధంగా వెళ్లాలన్న ఆలోచనను ఎంతమాత్రం చేయలేదు.
• ప్రజాస్వామ్యబద్ధంగా ఓటు అనే ఆయుధంతోనే ఓడించాలి. ఆయుధాలు, హింసతో కాదు.