రేపటితో ‘ధరణి’కి ఏడాది.. అభినందించిన సీఎం కేసీఆర్‌

Dharani Web Portal | ధరణి పోర్టల్‌ ప్రారంభమై రేపటితో ఏడాది పూర్తి కానున్నది. గతేడాది అక్టోబర్ 29వ తేదీన ఈ ధరణి పోర్టల్‌ను ప్రారంభించగా..

హైదరాబాద్‌ : ధరణి పోర్టల్‌ ప్రారంభమై రేపటితో ఏడాది పూర్తి కానున్నది. గతేడాది అక్టోబర్ 29వ తేదీన ఈ ధరణి పోర్టల్‌ను ప్రారంభించగా.. తొలి ఏడాది తన కార్యకలాపాలను విజయవంతంగా పూర్తి చేసింది. ధరణి రెవెన్యూ పరిపాలనలో సురక్షితమైన, అవాంతరాలు లేని, ట్యాంపర్ ప్రూఫ్, విచక్షణ లేని సేవలను అందించే వినూత్నమైన, అత్యాధునిక ఆన్‌లైన్ పోర్టల్ ఇది. భూమి సంబంధిత లావాదేవీలకు ధరణి వన్-స్టాప్ పరిష్కారాన్ని అందిస్తున్నది. ఈ పోర్టల్‌ అందుబాటులోకి రావడంతో రిజిస్ట్రేషన్‌ సేవలు ప్రజల ఇంటి ముంగిటకే చేరాయి. గతంలో 141 సబ్ రిజిస్ట్రార్ కార్యాలయాల్లో మాత్రమే రిజిస్ట్రేషన్లు జరగ్గా.. ప్రస్తుతం రాష్ట్రవ్యాప్తంగా ఉన్న 574 తహసీల్దార్‌ కార్యాలయాల్లో జరుగుతున్నాయి.

భూపరిపాలనలో కొత్త ప్రమాణాలు

భూపరిపాలనలో ధరణి కొత్త ప్రమాణాలను నెలకొల్పింది. మొదటి సంవత్సరంలోనే ధరణి సాధించిన ప్రగతి అభినందనీయం. తొలి ఏడాది ధరణి పోర్టల్‌ 5.17కోట్ల హిట్లను సాధించగా.. దాదాపు 10లక్షలకుపైగా లావాదేవీలు జరగ్గా.. ధరణి ద్వారా కొత్తగా 1.80లక్షల ఎకరాలకు ధరణి పరిధిలోకి తీసుకువచ్చి పాస్‌పుస్తకాలు జారీ చేశారు. నిత్యం పెరుగుతున్న మార్పులు, అవసరాలకు అనుగుణంగా ఎప్పటికప్పుడు మార్చుకునే సామర్థ్యం ధరణి సొంతం. ఎప్పటికప్పుడు, స్టేక్ హోల్డర్ల నుంచి సలహాలు, సూచనలకనుగుణంగా సరికొత్త లావాదేవీల మాడ్యూల్స్‌ను జోడిస్తూ వస్తున్నారు. వివిధ రకాల ఫిర్యాదులను పరిష్కరించేందుకు ప్రత్యేక మాడ్యూల్స్‌ను పొందుపరిచారు. ప్రస్తుతం ధరిలో పోర్టల్‌లో 31 లావాదేవీల మాడ్యూల్స్‌, పది ఇన్ఫర్మేషన్‌ మాడ్యూల్‌ ఉన్నాయి.

అధికారులకు సీఎం కేసీఆర్‌ అభినందన

ధరణి ప్రారంభించి ఏడాది పూర్తి చేసుకొని, విజయవంతంగా అమలు చేస్తున్నందుకు అధికారులను సీఎస్‌ సోమేశ్‌కుమార్‌ నేతృత్వంలోని అధికారుల బృందాన్ని, కలెక్టర్లను సీఎం కేసీఆర్‌ అభినందించారు. ధరణితో రైతులు ఎంతో ప్రయోజనం పొందారని సీఎం పేర్కొన్నారు. పారదర్శకంగా, అవాంతరాలు లేని సేవలందించడంపై సంతోషం వ్యక్తం చేశారు. రాబోయే రోజుల్లో ధరణి మరిన్ని విజయాలు సాధిస్తుందని సీఎం ఆశాభావం వ్యక్తం చేశారు. ఈ సందర్భంగా ధరణి పోర్టల్‌ను విజయవంతం చేసినందుకు సీఎస్‌ సోమేశ్‌కుమార్‌ అధికారులు, కలెక్టర్లు, తహసీల్దార్లకు కృతజ్ఞతలు తెలిపారు.

ధరణి పురోగతి వివరాలు..

ధరణి హిట్‌ల సంఖ్య : 5.17 కోట్లు
ధరణిలో బుక్ చేసిన స్లాట్‌లు : 10,45,878
పూర్తయిన లావాదేవీలు : 10,00,973
విక్రయాలు : 5,02,281
గిఫ్ట్ డీడ్ : 1,58,215
వారసత్వం : 72,085
తనఖా : 58,285
పరిష్కరించబడిన ఫిర్యాదులు : 5.17 లక్షలు
పెండింగ్ మ్యుటేషన్లు. : 2,07,229
భూమి సంబంధిత విషయాలపై ఫిర్యాదులు : 1,73,718
నిషేధించబడిన జాబితా : 51,794
కోర్ట్ కేసులు, సమాచారం : 24,618