Palla Rajeshwar Reddy | టార్గెట్‌ ఎమ్మెల్యే పల్లా రాజేశ్వర్‌రెడ్డి.. అనురాగ్‌, గాయత్రి విద్యా సంస్థలపై కేసు

అనురాగ్‌ గ్రూప్‌ ఆఫ్‌ ఇనిస్టిట్యూట్స్‌, గాయత్రి ఎడ్యుకేషనల్‌ ట్రస్ట్‌కి చెందిన భవనాలు కొర్రెముల గ్రామ పరిధిలోని వెంకటాపుర్‌లోని నాదం చెరువు బఫర్‌ జోన్‌లో ఉన్నాయని ఘట్‌కేసర్‌ ఇరిగేషన్‌ సెక్షన్‌ అసిస్టెంట్‌ ఎగ్జిక్యూటివ్‌ ఇంజినీర్‌ ఏ పరమేశ్‌ గురువారం పోచారం ఐటీ కారిడార్‌ పోలీసులకు ఫిర్యాదు చేశారు.

• అనురాగ్‌, గాయత్రి విద్యా సంస్థల భవనాలు
• బఫర్‌జోన్‌లో ఉన్నాయని ఇరిగేషన్‌శాఖ ఫిర్యాదు
• పోచారం ఐటీ కారిడార్‌ పీఎస్‌లో కేసు నమోదు
• రాజకీయ కక్షలతోనే కేసులు..
• చట్టపరంగా పోరాడుతాం:పల్లా రాజేశ్వర్‌రెడ్డి

Palla Rajeshwar Reddy | హైదరాబాద్‌ సిటీబ్యూరో/మేడ్చల్‌, ఆగస్టు 24(నమస్తే తెలంగాణ): అనురాగ్‌ గ్రూప్‌ ఆఫ్‌ ఇనిస్టిట్యూట్స్‌, గాయత్రి ఎడ్యుకేషనల్‌ ట్రస్ట్‌కి చెందిన భవనాలు కొర్రెముల గ్రామ పరిధిలోని వెంకటాపుర్‌లోని నాదం చెరువు బఫర్‌ జోన్‌లో ఉన్నాయని ఘట్‌కేసర్‌ ఇరిగేషన్‌ సెక్షన్‌ అసిస్టెంట్‌ ఎగ్జిక్యూటివ్‌ ఇంజినీర్‌ ఏ పరమేశ్‌ గురువారం పోచారం ఐటీ కారిడార్‌ పోలీసులకు ఫిర్యాదు చేశారు. కేసు నమోదు చేశామని, దర్యాప్తు చేస్తున్నామని పోచారం పోలీసులు తెలిపారు. ఇదంతా రాజకీయ కక్ష్యతో కుట్రపూరితంగా చేస్తున్నారని అనురాగ్‌ సంస్థల చైర్మన్‌, జనగామ ఎమ్మెల్యే పల్లా రాజేశ్వర్‌రెడ్డి ఆరోపించారు. గాయత్రి ట్రస్ట్‌, అనురాగ్‌ సంస్థలు 25సంవత్సరాలలో ఏనాడు ప్రభుత్వ అనుమతులు లేకుండా భవన నిర్మాణాలు చేయలేదని ఆయన ఓ ప్రకటనలో వివరించారు.

• సర్వే నంబర్‌ 813/పి, 796/పి సంబంధించిన వ్యవసాయ భూమి నుంచి వ్యవసాయేతర భూమిగా మార్చుకున్నామని, అందుకు సంబంధించిన ప్రొసీడింగ్స్‌ (బీ2/334/2019, తేదీ: 3-04-2018) పొందామన్నారు.
• సంబంధిత భూమికి నీటి పారుదల శాఖ నుంచి (లెటర్‌ నెం ఈఈ/ఐబీ/హైచ్‌వైడీ/డీబీ/హెచ్‌డీ/డీ4/2017-2018/2505, 15-12-2017) నో అబ్జక్షన్‌ సర్టిఫికేట్‌(ఎన్‌వోసీ) పొందినట్టు తెలిపారు. నీటిపారుదల శాఖ, రెవెన్యూశాఖ సంయుక్తగా తనిఖీలు చేసి ఎఫ్‌టీఎల్‌, బఫర్‌ జోన్లకు తమ భూమి ఎంత దూరంలో ఉందో కొలిచి ఎనోవోసీ ఇచ్చారని గుర్తు చేశారు.
• మేడ్చల్‌ కలెక్టర్‌ 23/04/2018న డిస్ట్రిక్ట్‌ లెవల్‌ కమిటీలో చర్చించారని, అనంత రం 9/5/2028న లెటర్‌ నెం. ఈ2/ 1140/2018 ద్వారా హెచ్‌ఎండీఏ కమిషనర్‌కి ఎన్‌వోసీ పంపించారని తెలిపారు.
• నీటిపారుదల శాఖ, రెవెన్యూ, ఫైర్‌, ఎయిర్‌పోర్టు ఆథారిటీలు జారీ చేసిన ఎన్‌వోసీలను పరిశీలించిన తరువాత హెచ్‌ఎండీఏ 2819/ఈసీ/పీఎల్‌జీ/జీటీకేఆర్‌/హెచ్‌ఎండీఏ/2021, తేదీ 8/7/2022న అనుమతులు ఇచ్చారని వెల్లడించారు.
• అన్ని అనుమతులు తీసుకుని నిబంధనల మేరకు సెట్‌ బ్యాక్‌ వదిలి భవన నిర్మాణాలు చేశామని, మరికొన్ని చేస్తున్నామని చెప్పారు. 22, ఆగస్టు 2024న నీటి పారుదల శాఖ అధికారులు అనురాగ్‌, గాయత్రీ ట్రస్ట్‌ విద్యాసంస్థలకు వచ్చారని, మరుసటి రోజు పోలీసులకు ఫిర్యాదు ఇవ్వడంతో కనీస సమాచారం ఇవ్వకుండా ఎఫ్‌ఐఆర్‌ నమోదు చేశారని అన్నారు.

కక్షపూరితంగానే కేసులు
విద్యాజ్యోతి ఇనిస్టిట్యూట్‌ ఆఫ్‌ టెక్నాలజీ, అనురాగ్‌ ఇంజినీరింగ్‌ కాలేజీ, కోదాడలో ఐఏసీటీఈ, జేఎన్‌టీయూ అనుమతులు ఇచ్చిన తరువాత ప్రస్తుతం నడుస్తు న్న కోర్సులలో 480 సీట్లను కోత పెట్టి, రా ష్ట్రంలోని 99 శాతం కాలేజీలకు అనుమతులిచ్చి మాకు మాత్రం ఇవ్వకుండా ప్రభు త్వ కక్షపూరితంగా వ్యవహరిస్తున్నదని రాజేశ్వర్‌రెడ్డి ఆరోపించారు. తనపై వ్యక్తిగతంగా జనగామలో ఎన్నికలు పూర్తయిన తరువాత 4 కేసులు, హైదరాబాద్‌ 2 కేసు లు పెట్టారని అన్నారు. అనురాగ్‌ యూనివర్శిటీపై వివిధ డిపార్టుమెంట్లు నిత్యం సోదాలు నిర్వహిస్తున్నాయని చెప్పారు. ఏమీ దొరకకపోవడంతో ఇలా ఒత్తిడి తెస్తున్నారని, అయినా చట్ట పరిధిలోనే న్యాయం కోసం పోరాడుతానని రాజేశ్వర్‌రెడ్డి స్పష్టం చేశారు.