ఖాజాగూడ భూదోపిడీలో పెద్దల హస్తం

శేరిలింగంపల్లి మండలం ఖాజాగూడలోని సర్వేనంబర్‌ 20/1లోని 3.17 ఎకరాల భూదోపిడీ వెనుక ప్రభుత్వ పెద్దల హస్తం ఉన్నదని ఎమ్మెల్సీ దాసోజు శ్రవణ్‌కుమార్‌ సంచలన ఆరోపణలు చేశారు.

• వెయ్యికోట్ల బీసీ స్టడీ సర్కిల్‌ స్థలం సాస్‌ఇన్‌ఫ్రాకు ధారాదత్తం
• రక్షించాల్సిన సర్కారే భక్షిస్తున్న వైనం: దాసోజు శ్రవణ్‌

హైదరాబాద్‌, నవంబర్‌ 11 (నమస్తే తెలంగాణ): శేరిలింగంపల్లి మండలం ఖాజాగూడలోని సర్వేనంబర్‌ 20/1లోని 3.17 ఎకరాల భూదోపిడీ వెనుక ప్రభుత్వ పెద్దల హస్తం ఉన్నదని ఎమ్మెల్సీ దాసోజు శ్రవణ్‌కుమార్‌ సంచలన ఆరోపణలు చేశారు. వెయ్యికోట్ల విలువైన బీసీ స్టడీసర్కిల్‌ స్థలాన్ని సస్‌ఇన్‌ఫ్రాకు కట్టబెట్టి రేవంత్‌ ప్రభుత్వం చారిత్రక ద్రోహం చేసిందని ధ్వజమెత్తారు. హైదరాబాద్‌ తెలంగాణ భవన్‌లో బుధవారం బీఆర్‌ఎస్‌ నేత కురువ విజయ్‌తో కలిసి ఆయన మీడియాతో మాట్లాడారు.

రంగారెడ్డి జిల్లా కలెక్టర్‌ 2020 జనవరి 13న రాసిన లేఖలో సాస్‌ సంస్థ అనధికారికంగా ఆక్రమించిందనే కారణంతో 1.93 కోట్ల జరిమానా విధించి ఖాళీ చేయించారని గుర్తుచేశారు. నారాయణరెడ్డి కలెక్టర్‌గా ఉన్నప్పుడూ 2025 నవంబర్‌ 1న 22-ఏలో చేర్చారని చెప్పారు. కానీ ప్రభుత్వ పెద్దల అండతో టైటిల్‌ వెరిఫికేషన్‌ లేకుండా హెచ్‌ఎండీఏ, జీహెచ్‌ఎంసీ, హైడ్రా పరిధిలో అనుమతులిచ్చి, హైరైజ్డ్‌ భవన నిర్మాణాలు చేపట్టారని ఆరోపించారు. ఈ భూ దోపిడీపై జడ్చర్ల ఎమ్మెల్యే అనిరుధ్‌రెడ్డి, బీఆర్‌ఎస్‌ ఎమ్మెల్యే అరికెపూడి గాంధీ, బీజేపీ నేత కొండా విశ్వేశ్వర్‌రెడ్డి.. సీఎస్‌, సీసీఎల్‌ఏ, హైడ్రాకు లేఖలు రాసినా ప్రభుత్వంలో చీమ కుట్టినట్టయినా లేకపోవడం సిగ్గుచేటని పేర్కొన్నారు.

లిడ్‌క్యాప్‌ భూముల స్వాహా

గచ్చిబౌలి మలం చెరువు ఎదురుగా, దుర్గం చెరువు వెనుక ఉన్న లిడ్‌క్యాప్‌ (టీజీ లిప్‌కో)కు చెందిన ఆరెకరాల పైచిలుకు 6 వేల కోట్ల విలువైన భూమిని అపర్ణ, వంశీరామ్‌ బిల్డర్స్‌కు కట్టబెట్టారని దాసోజు నిప్పులు చెరిగారు. ఏక్తా మాల్‌ పేరిట మొదట ఎకరం తీసుకొని, తర్వాత దాన్ని రియల్‌ ఎస్టేట్‌ ప్రాజెక్ట్‌గా మార్చడానికి మిగతా భూమిని కూడా ప్రైవేట్‌ వ్యక్తులకు అప్పగించారని దుయ్యబట్టారు.