ఫోన్ల అమ్మకాలు డీలా

దేశీయ సంప్రదాయ స్మార్ట్‌ఫోన్‌ రిటైల్‌ మార్కెట్‌లో దీపావళి పండుగ సీజన్‌ విక్రయాల విలువ నిలకడగా ఉన్నప్పటికీ, అమ్ముడైన ఫోన్ల సంఖ్య మాత్రం గత ఏడాదితో పోల్చితే 18-20 శాతం తగ్గిందని ఆల్‌ ఇండియా మొబైల్‌ రిటైలర్స్‌ అసోసియేషన్‌ (ఏఐఎంఆర్‌ఏ) తెలిపింది.

• నిరుడుతో పోల్చితే ఈ దీపావళికి 18-20 శాతం తగ్గుదల

న్యూఢిల్లీ, నవంబర్‌ 11: దేశీయ సంప్రదాయ స్మార్ట్‌ఫోన్‌ రిటైల్‌ మార్కెట్‌లో దీపావళి పండుగ సీజన్‌ విక్రయాల విలువ నిలకడగా ఉన్నప్పటికీ, అమ్ముడైన ఫోన్ల సంఖ్య మాత్రం గత ఏడాదితో పోల్చితే 18-20 శాతం తగ్గిందని ఆల్‌ ఇండియా మొబైల్‌ రిటైలర్స్‌ అసోసియేషన్‌ (ఏఐఎంఆర్‌ఏ) తెలిపింది. వినియోగదారుల డిమాండ్‌ బలహీనంగా ఉండటం, ధరల పెరుగుదలే దీనికి కారణమని పేర్కొన్నది.

ఏఐఎంఆర్‌ఏ విడుదల చేసిన దీపావళి రిటైల్‌ పర్ఫార్మెన్స్‌ రిపోర్టు ప్రకారం.. ధన్‌తేరాస్‌ నుంచి దీపావళి మరుసటి రోజు వరకు 4 రోజులపాటు ప్రధాన రిటైల్‌ మార్కెట్లలో దుకాణాలకు వచ్చినవారి రద్దీ బాగానే ఉన్నది. అయితే పండుగ ఆఫర్ల కోసం వినియోగదారులు కొనుగోళ్లను వాయిదా వేసుకోవడంతో, అంతకుముందు ఏడు రోజుల్లో అమ్మకాల పరిమాణం దాదాపు 40 శాతం తగ్గినట్టు తేలింది. డిస్కౌంట్లు, ఇతర ఆఫర్లు పోను రూ.30,000-60,000 ధరల శ్రేణిలోనే అత్యధిక కొనుగోళ్లు జరిగాయి. ఆ తర్వాత ప్రీమియం విభాగం నిలిచింది.

యాపిల్‌, మోటరోలా హవా..

యాపిల్‌, మోటరోలా బ్రాండ్ల అమ్మకాలు జోరుగా సాగాయి. ధరల పెంపునకు ముందున్న ధరలకు ఐఫోన్‌ 15, 16, 17 పాత మాడళ్లు స్టాక్‌లో ఉన్నచోట డిమాండ్‌ కొనసాగిందని ఏఐఎంఆర్‌ఏ తెలిపింది. ఐఫోన్‌ 18 ప్రో, ప్రో మ్యాక్స్‌లకూ మంచి స్పందన వచ్చిందని పేర్కొన్నది. ప్రీమియం విభాగంలో గూగుల్‌ పిక్సెల్‌ వేగంగా ఎదుగుతున్న పోటీదారుగా మారగా, రెడ్‌మీ నోట్‌ 17 సిరీస్‌కు ఆ శ్రేణిలో ఉన్న ఇతర ఫోన్లతో పోల్చితే పోటీ ధరలు ఉండటం.. కొనుగోలుదారులను ఆకర్షించింది. ఇక రియల్‌మీపై అత్యధిక ప్రభావం పడింది.

అన్ని ప్రాంతాల్లో ఆ బ్రాండ్‌ అమ్మకాల పరిమాణం 50 శాతానికిపైగా తగ్గిందని ఏఐఎంఆర్‌ఏ వివరించింది. కాగా, వివో వి80 సిరీస్‌, ఎస్‌2 ఎఫ్‌ఈ, వై11 5జీ, వై21 5జీ మాడళ్లకు మంచి డిమాండ్‌ వచ్చింది. ఒప్పో రెనో 16, రెనో 16సీ, ఎఫ్‌35 సిరీస్‌, ఏ6ఎక్స్‌ మాడళ్లు కూడా బాగానే అమ్ముడయ్యాయి. ఇక శాంసంగ్‌ గెలాక్సీ ఎస్‌25, ఎస్‌25 అల్ట్రా, ఫోల్డ్‌ 8 మాడళ్లకు ఆన్‌లైన్‌, ఆఫ్‌లైన్‌ ధరల్లో గణనీయమైన తేడా ఉండటంతో, ఆ కంపెనీ ఎక్స్‌క్లూజివ్‌ స్టోర్లపైనా ఒత్తిడి పెరిగిందని పేర్కొన్నది. కాగా, ఈ-కామర్స్‌ కోసం ఉద్దేశించిన భారీ డిస్కౌంట్‌ శాంసంగ్‌ స్మార్ట్‌ఫోన్లను అగ్రిగేటర్ల నుంచి జీఎస్టీ ఇన్‌వాయిస్‌లతో నేరుగా కొనుగోలు చేసి, రిటైల్‌ షాపుల్లో తిరిగి విక్రయిస్తున్నట్టు ప్రధాన రిటైలర్లు చెప్పడం గమనార్హం.