డీల్‌ డన్‌.. పాండ్యా, అర్ష్‌దీప్‌ ట్రేడింగ్‌కు ఆమోదం

ఇండియన్‌ ప్రీమియర్‌ లీగ్‌ (ఐపీఎల్‌) చరిత్రలోనే అత్యంత భారీ, ఎంతో ఆసక్తిరేపిన ప్లేయర్‌ ట్రేడ్‌ డీల్‌ అధికారికంగా ఖరారైంది. భారత స్టార్‌ ఆల్‌రౌండర్‌ హార్దిక్‌ పాండ్యా ముంబై ఇండియన్స్‌ నుంచి రూ. 18 కోట్ల భారీ ధరకు పంజాబ్‌ కింగ్స్‌కు మారాడు.

• రూ. 18 కోట్లతో పంజాబ్‌లో చేరిన హార్దిక్‌
• అంతే మొత్తంతో ముంబై గూటికి కింగ్స్‌ పేసర్‌
• మళ్లీ రోహిత్‌కే ఎంఐ పగ్గాలు?

న్యూఢిల్లీ: ఇండియన్‌ ప్రీమియర్‌ లీగ్‌ (ఐపీఎల్‌) చరిత్రలోనే అత్యంత భారీ, ఎంతో ఆసక్తిరేపిన ప్లేయర్‌ ట్రేడ్‌ డీల్‌ అధికారికంగా ఖరారైంది. భారత స్టార్‌ ఆల్‌రౌండర్‌ హార్దిక్‌ పాండ్యా ముంబై ఇండియన్స్‌ నుంచి రూ. 18 కోట్ల భారీ ధరకు పంజాబ్‌ కింగ్స్‌కు మారాడు. అతని స్థానంలో పంజాబ్‌ స్టార్‌ ఫాస్ట్‌ బౌలర్‌ అర్ష్‌దీప్‌ సింగ్‌ అంతే ఫీజుతో ముంబై ఇండియన్స్‌లోకి వచ్చాడు.

రెండు ఫ్రాంచైజీల మధ్య కుదిరిన ఈ ట్రేడింగ్‌ డీల్‌ను ఐపీఎల్‌ గవర్నింగ్‌ కౌన్సిల్‌ బుధవారం అధికారికంగా ధ్రువీకరించింది. గతంలో రోహిత్‌ శర్మ స్థానంలో కెప్టెన్‌గా బాధ్యతలు చేపట్టిన హార్దిక్‌ పాండ్యాకు, జట్టులోని సీనియర్లతో సత్సంబంధాలు లోపించడం, అభిమానుల నుంచి కూడా తీవ్ర వ్యతిరేకత రావడం ఈ మార్పునకు ప్రధాన కారణంగా తెలుస్తోంది. హార్దిక్‌ నిష్క్రమణతో ముంబై ఇండియన్స్‌ జట్టుకు రోహిత్‌ మళ్లీ కెప్టెన్‌గా బాధ్యతలు చేపట్టే అవకాశాలు ఉన్నాయని సమాచారం.

హార్దిక్‌ ఫీజు పెంపు

ముంబై జట్టులో హార్దిక్‌ పాండ్యా పాత ఫీజు రూ. 16.35 కోట్లు కాగా, ఈ ట్రేడ్‌ ఒప్పందంలో భాగంగా అతని విలువను రూ. 1.65 కోట్లు పెంచి రూ. 18 కోట్లకు నిర్ణయించారు. ఐపీఎల్‌ నిబంధనల ప్రకారం పెరిగిన ఈ మొత్తంలో 50 శాతం సొమ్ము (రూ. 82.5 లక్షలు) హార్దిక్‌కు, మిగిలిన 50 శాతం ముంబై ఇండియన్స్‌ ఫ్రాంచైజీకి దక్కుతుంది. పంజాబ్‌ స్టార్‌ బౌలర్‌ అర్ష్‌దీప్‌ సింగ్‌ తన పాత ఫీజు రూ. 18 కోట్లలో ఎలాంటి మార్పు లేకుండా అదే మొత్తానికి ముంబై జట్టులోకి బదిలీ అయ్యాడు.

2015లో ముంబైతో ప్రయాణం ప్రారంభించిన హార్దిక్‌ 2015, 2017, 2019, 2020లో ఆ జట్టు చాంపియన్‌గా నిలవడంలో కీలక పాత్ర పోషించాడు. ఐపీఎల్‌లో 162 మ్యాచ్‌లాడిన హార్దిక్‌ 2,955 పరుగులు చేయడంతో పాటు 82 వికెట్లు పడగొట్టాడు. అర్ష్‌దీప్‌ పంజాబ్‌ కింగ్స్‌ తరఫున 96 మ్యాచ్‌ల్లో 111 వికెట్లు తీసి ఆ ఫ్రాంచైజీ తరఫున అత్యధిక వికెట్లు పడగొట్టిన ఆటగాడిగా నిలిచాడు. పంజాబ్‌ కింగ్స్‌తో ఎనిమిది సీజన్లు ఆడిన తర్వాత ముంబైకి వెళ్తున్నాడు.

పంజాబ్‌కు ఎంత ఉపయోగం?

ప్రస్తుతం గాయాలు, ఫామ్‌ లేమితో జాతీయ జట్టుకు దూరంగా ఉన్న 33 ఏండ్ల హార్దిక్‌ పాండ్యాకు పంజాబ్‌ కింగ్స్‌ రూపంలో మరో కొత్త సవాలు ఎదురుకానుంది. తొలి ఐపీఎల్‌ టైటిల్‌ కోసం నిరీక్షిస్తున్న పంజాబ్‌కు హార్దిక్‌ ఎంతవరకు ఉపయోగపడతాడో చూడాలి. మరోవైపు ముంబై ఇండియన్స్‌ యంగ్‌ పేసర్‌ అర్ష్‌దీప్‌ సింగ్‌ను జట్టులోకి తెచ్చుకుని తమ బౌలింగ్‌ విభాగంలో కొత్త అధ్యాయానికి శ్రీకారం చుట్టింది. ఇప్పటికే బుమ్రా రూపంలో వరల్డ్‌ బెస్ట్‌ బౌలర్‌ అందుబాటులో ఉండగా.. ఇప్పుడు ఎడమచేతి వాటం పేసర్‌ అర్ష్‌ దీప్‌ చేరికతో ఆ జట్టు పేస్‌ విభాగం పదునెక్కింది. ఈ కుడి, ఎడమల యార్కర్ల స్పెషలిస్టులను ఎదుర్కోవడం ప్రత్యర్థి బ్యాటర్లకు ‘పిచ్‌ మీద సాము’ కానుంది.

పాండ్యా ముంబై సీక్వెల్‌ ఫ్లాప్‌

మంచి హిట్‌ సినిమాకి తీసే సీక్వెల్‌ ఎప్పుడూ మొదటి సినిమా స్థాయి విజయాన్ని అందిస్తుందని చెప్పలేం. హార్దిక్‌ పాండ్యా ముంబై ఇండియన్స్‌లో చేపట్టిన రెండో ఇన్నింగ్స్‌ సరిగ్గా అలాంటి ఓ ఫ్లాప్‌ సీక్వెల్‌ సినిమాలానే ముగిసింది. భారీ అంచనాలు, అనూహ్య పరిణామాల మధ్య 2024లో ముంబై ఇండియన్స్‌కు తిరిగి వచ్చిన హార్దిక్‌ ఇప్పుడు పంజాబ్‌ కింగ్స్‌కు ట్రేడ్‌ అవ్వడం ద్వారా మెగా లీగ్‌లో అత్యంత విజయవంతమైన జట్టుతో తన సెకండ్‌ ఇన్నింగ్స్‌కు ముగింపు పలికాడు.

ఫస్ట్‌ పార్ట్‌ హిట్‌

2015లో ఒక అన్‌క్యాప్డ్‌ ఆల్‌రౌండర్‌గా ముంబై జట్టులోకి అడుగుపెట్టిన హార్దిక్‌, తన అద్భుతమైన హిట్టింగ్‌, కీలక వికెట్లు తీసే నైపుణ్యంతో తక్కువ కాలంలోనే స్టార్‌గా ఎదిగాడు. ముంబై ఇండియన్స్‌ సాధించిన నాలుగు ఐపీఎల్‌ టైటిళ్లలోకీలక పాత్ర పోషించి అభిమానుల గుండెల్లో స్థానం సంపాదించాడు. ఆ తర్వాత 2022లో కొత్తగా వచ్చిన గుజరాత్‌ టైటాన్స్‌ జట్టుకు కెప్టెన్‌గా మారి తొలి ఏడాదిలోనే ట్రోఫీ అందించడమే కాకుండా, 2023లో జీటీని రన్నరప్‌గా నిలబెట్టాడు. దాంతో 2024 సీజన్‌కు ముందు ముంబై యాజమాన్యం హార్దిక్‌ను భారీ ఆశలతో తిరిగి సొంత గూటికి తెచ్చుకుంది.

ఫలించని కెప్టెన్సీ మార్పు

హార్దిక్‌ ముంబై రీఎంట్రీలో ప్రధాన మలుపు కెప్టెన్సీ మార్పు. ఐదు టైటిళ్లు అందించిన దిగ్గజ కెప్టెన్‌ రోహిత్‌ శర్మను తప్పించి హార్దిక్‌కు నాయకత్వ బాధ్యతలు ఇవ్వడం ముంబై అభిమానులకు ఏమాత్రం రుచించలేదు. దాంతో హోంగ్రౌండ్‌ వాంఖడే స్టేడియంలోనే పాండ్యాను ప్రేక్షకులు హేళన చేసే పరిస్థితి వచ్చింది. ఈ ఒత్తిడి మధ్య కెప్టెన్‌గా, ఆటగాడిగా పాండ్యా తీవ్రంగా నిరాశపరిచాడు. అతని నాయకత్వంలో ముంబై అంచనాలను అందుకోలేకపోయింది.

2024లో 14 మ్యాచ్‌ల్లో నాలుగే విజయాలు సాధించి పాయింట్ల పట్టికలో చివరి స్థానంలో నిలవడంతో పాండ్యా ముంబై కెప్టెన్సీ అరంగేట్రం డిజాస్టర్‌గా మారింది.2025లో క్వాలిఫయర్‌ 2 వరకు వెళ్లినప్పటికీ ఈ ఏడాది మళ్లీ నిలకడలేమితో ప్లేఆఫ్స్‌కు అర్హత సాధించలేకపోయింది. గుజరాత్‌ టైటాన్స్‌ కెప్టెన్‌గా 31 మ్యాచ్‌ల్లో 22 విజయాలు అందించిన హార్దిక్‌ ముంబై సారథిగా మాత్రం 39 మ్యాచ్‌ల్లో ఏకంగా 24 ఓటములు చవిచూసి 15 మ్యాచ్‌ల్లో మాత్రమే విజయం సాధించాడు.