కరువు మండలాలుగా ప్రకటించాలని ఆందోళన

వర్షాభావంతో పంటలు పండక రైతులు తీవ్ర ఇబ్బందులు పడుతున్నందున వెంటనే కరువు మండలాలుగా ప్రకటించాలని కోరుతూ బీఆర్‌ఎస్‌ నేతృత్వంలో శనివారం మహబూబాబాద్‌, జనగామ జిల్లాల్లో పెద్ద ఎత్తున రైతులు ఆందోళనకు దిగారు. మహబూబాబాద్‌ జిల్లా తొర్రూరులో తహసీల్దార్‌ కార్యాలయం ముందు ధర్నా చేపట్టారు. పెద్దవంగరలోని వలిగొండ-తొర్రూరు ప్రధాన రహదారిపై రాస్తారోకో చేశారు.

• మహబూబాబాద్‌, జనగామ జిల్లాల్లో బీఆర్‌ఎస్‌ నేతృత్వంలో రైతుల నిరసన
• తహసీల్దార్లకు వినతి

తొర్రూరు/పెద్దవంగర/కొడకండ్ల, అక్టోబర్‌ 31: వర్షాభావంతో పంటలు పండక రైతులు తీవ్ర ఇబ్బందులు పడుతున్నందున వెంటనే కరువు మండలాలుగా ప్రకటించాలని కోరుతూ బీఆర్‌ఎస్‌ నేతృత్వంలో శనివారం మహబూబాబాద్‌, జనగామ జిల్లాల్లో పెద్ద ఎత్తున రైతులు ఆందోళనకు దిగారు. మహబూబాబాద్‌ జిల్లా తొర్రూరులో తహసీల్దార్‌ కార్యాలయం ముందు ధర్నా చేపట్టారు. పెద్దవంగరలోని వలిగొండ-తొర్రూరు ప్రధాన రహదారిపై రాస్తారోకో చేశారు. జనగామ జిల్లా కొడకండ్లలో బీఆర్‌ఎస్‌ శ్రేణులు బైక్‌ ర్యాలీ నిర్వహించి రాస్తారోకో నిర్వహించారు. ఆయా మండల కేంద్రాల్లో బీఆర్‌ఎస్‌ నాయకులు మాట్లాడుతూ.. సాగునీరు అందక పంటలు ఎండిపోతున్నా సర్కార్‌ పట్టించుకోవడంలేదని మండిపడ్డారు. తొర్రూరు, పెద్దవంగర, కొడకండ్ల మండలాలను కరువు ప్రాంతాలుగా ప్రకటించాలని ప్రభుత్వాన్ని డిమాండ్‌ చేశారు.