బతుకమ్మ పండుగకు ఏర్పాట్లేవి?.. నిర్లక్ష్యంపై బీఆర్‌ఎస్‌ శ్రేణుల ఆగ్రహం

బల్దియా కార్యాలయం ముట్టడి.. తోపులాట, పలువురికి గాయాలు

కరీంనగర్‌ కార్పొరేషన్‌, అక్టోబర్‌ 9: కరీంనగర్‌ జిల్లా కేంద్రంలో బతుకమ్మ పండుగ ఏర్పాట్లలో నగరపాలక సంస్థ నిర్లక్ష్యంపై బీఆర్‌ఎస్‌ ఆగ్రహం వ్యక్తంచేసింది. నగర అధ్యక్షుడు చల్ల హరిశంకర్‌ ఆధ్వర్యంలో నాయకులు, కార్యకర్తలు శుక్రవారం కార్యాలయాన్ని ముట్టడించారు. నగరపాలక అధికారులకు వినతిపత్రం అందించాలని బీఆర్‌ఎస్‌ శ్రేణులు కార్యాలయంలోకి వెళ్లేందుకు యత్నించడంతో పోలీసులు అడ్డుకున్నారు.

దీంతో ఇరువర్గాల మధ్య తోపులాట చోటుచేసుకోవడంతో పలువురికి గాయాలయ్యాయి. అనంతరం బీఆర్‌ఎస్‌ శ్రేణులను పోలీసులు అరెస్ట్‌ చేసి పోలీస్‌ ట్రైనింగ్‌ కాలేజీకి తరలించారు.