IPS Trainee | పోలీస్‌ అకాడమీలో పోకిరీ.. తోటి మహిళా ట్రైనీ ఐపీఎస్‌పై లైంగిక వేధింపులు

IPS Trainee | హైదరాబాద్‌ రాజేంద్రనగర్‌లోని జాతీయ పోలీస్‌ అకాడమీలో లైంగిక వేధింపుల ఘటన కలకలం రేపింది. తనతోపాటు శిక్షణ పొందుతున్న తోటి ఐపీఎస్‌ అధికారి ఉదయ్‌ కృష్ణారెడ్డి ఈ ఏడాది జూన్‌ 23 నుంచి తనను లైంగికంగా వేధిస్తున్నాడని, వాట్సాప్‌ ద్వారా అసభ్యకర మెసేజ్‌లు పంపి బూతులు తిడుతున్నాడని ఓ ట్రైనీ ఐపీఎస్‌ అధికారిణి అత్తాపూర్‌ పోలీస్‌ స్టేషన్‌లో ఫిర్యాదు చేశారు.

IPS Trainee | హైదరాబాద్‌/హైదరాబాద్‌ సిటీబ్యూరో/బండ్లగూడ, జూలై 19 (నమస్తే తెలంగాణ): హైదరాబాద్‌ రాజేంద్రనగర్‌లోని జాతీయ పోలీస్‌ అకాడమీలో లైంగిక వేధింపుల ఘటన కలకలం రేపింది. తనతోపాటు శిక్షణ పొందుతున్న తోటి ఐపీఎస్‌ అధికారి ఉదయ్‌ కృష్ణారెడ్డి ఈ ఏడాది జూన్‌ 23 నుంచి తనను లైంగికంగా వేధిస్తున్నాడని, వాట్సాప్‌ ద్వారా అసభ్యకర మెసేజ్‌లు పంపి బూతులు తిడుతున్నాడని ఓ ట్రైనీ ఐపీఎస్‌ అధికారిణి అత్తాపూర్‌ పోలీస్‌ స్టేషన్‌లో ఫిర్యాదు చేశారు. ఉదయ్‌ కృష్ణారెడ్డి రహస్యంగా తన వ్యక్తిగత ప్రైవేట్‌ వీడియోలను చిత్రీకరించి తీవ్రంగా బెదిరిస్తున్నాడని, ఆ వీడియోలను తన భర్తకు పంపి మానసికంగా వేధించడంతోపాటు వాటిని సోషల్‌ మీడియాలో పెడతానంటూ బ్లాక్‌మెయిల్‌ చేస్తున్నాడని ఆ ఫిర్యాదులో పేర్కొన్నారు.

ఇటీవల తనను బలవంతంగా గదిలోకి లాక్కెళ్లి ప్రైవేట్‌ భాగాలను తాకుతూ లైంగిక వేధింపులకు పాల్పడటంతోపాటు చంపేందుకు ప్రయత్నించాడని, మెడపై కత్తి పెట్టి ఆ గది నుంచి బయటకు వెళ్లకుండా నిర్బంధించాడని ఆ అధికారిణి ఆరోపించారు. దీంతో ఉదయ్‌ కృష్ణారెడ్డిపై భారతీయ న్యాయ సంహిత (బీఎన్‌ఎస్‌)లోని 74, 75, 77, 78, 79, 127(2), 115(2), 351(2) సెక్షన్లతోపాటు ఇన్ఫర్మేషన్‌ టెక్నాలజీ చట్టంలోని 66ఈ, 67ఏ సెక్షన్ల కింద పోలీసులు కేసు నమోదు చేశారు.

ఈ కేసు తదుపరి దర్యాప్తు బాధ్యతను ఇన్‌స్పెక్టర్‌ బానోత్‌ రాజు నాయక్‌కు అప్పగించారు. చట్టాన్ని రక్షించాల్సిన ఐపీఎస్‌ అధికారి తన తోటి మహిళా అధికారిపై లైంగిక వేధింపులకు పాల్పడటం పోలీస్‌ వర్గాల్లో తీవ్ర చర్చనీయాంశంగా మారింది. అయినప్పటికీ ఈ వ్యవహారంపై జాతీయ పోలీస్‌ అకాడమీ వర్గాలు ఇంకా అధికారికంగా స్పందించలేదు.