మామతో కలిసి భర్తను చంపిన మహిళ

తన మామతో కలిసి కట్టుకున్న భర్తను హత్య చేసింది ఓ భార్య. మృతదేహాన్ని తన ఇంటి పక్కనే ఖాళీగా ఉన్న స్థలంలో పూడ్చిపెట్టింది. ఈ అమానవీయ ఘటన ఆదివారం కామారెడ్డి జిల్లా బాన్సువాడ మండలం తిర్మలాపూర్‌లో ఆలస్యంగా వెలుగుచూసింది.

• మృతదేహాన్ని ఇంటి పక్కన ఖాళీ స్థలంలో పూడ్చివేత
• కామారెడ్డి జిల్లా తిర్మలాపూర్‌లో అమానుష ఘటన

బాన్సువాడ రూరల్‌, జూన్‌ 23: తన మామతో కలిసి కట్టుకున్న భర్తను హత్య చేసింది ఓ భార్య. మృతదేహాన్ని తన ఇంటి పక్కనే ఖాళీగా ఉన్న స్థలంలో పూడ్చిపెట్టింది. ఈ అమానవీయ ఘటన ఆదివారం కామారెడ్డి జిల్లా బాన్సువాడ మండలం తిర్మలాపూర్‌లో ఆలస్యంగా వెలుగుచూసింది. తిర్మలాపూర్‌కు చెందిన కుర్మ రాములు (33) జులాయిగా తిరుగుతూ మద్యానికి బానిసై భార్య మంజుల, తండ్రి నారాయణను హింసించేవాడు.

దీంతో విసిగిపోయిన వారిద్దరూ ఈ నెల 9న మద్యం తాగి వచ్చిన రాములును గొడ్డలితో నరికి హత్యచేశారు. మృతదేహాన్ని ఇంట్లో ఉన్న సంపులో మూడురోజులపాటు ఉంచారు. పొరిగింటి వారు ఇతర గ్రామానికి వెళ్లగా.. సంపులోని మృతదేహాన్ని తీసి పక్కింటి వారి ఖాళీ స్థలంలో గుంతతీసి పాతిపెట్టారు. అంతేకాదు.. పది రోజులుగా రాములు కనిపించడం లేదని మృతుడి భార్య మంజుల పోలీస్‌స్టేషన్‌లో ఫిర్యాదు చేసింది.

పక్కింటి వారి స్థలంలో అనుమానాస్పదంగా తవ్విన గుంత కనిపించడంతో స్థానికులు వారిద్దరినీ నిలదీశారు. దీంతో రాములును తామే హత్య చేసినట్టు ఒప్పుకోవడంతో స్థానికులు పోలీసులకు సమాచారం అందించారు. ఘటనా స్థలానికి చేరుకొని నిందితుల సమక్షంలో గుంతను తవ్వగా రాములు మృతదేహాన్ని గుర్తించామని సీఐ కృష్ణ తెలిపారు. మృతదేహం పూర్తిగా కుళ్లిపోవడంతో గ్రామస్థాయి అధికారులు, స్థానికుల సమక్షంలో పోస్టుమార్టం నిర్వహించి, నిందితులను అదుపులోకి తీసుకున్నామని, కేసు నమోదు చేసుకొని దర్యాప్తు చేపట్టామని సీఐ వివరించారు. మృతుడికి ఇద్దరు కూతుళ్లు, కుమారుడు ఉన్నారు.