జాయింట్‌ స్టాఫ్‌ కౌన్సిల్‌ ఏర్పాటు చేయాలి

• ఏపీలోని తెలంగాణ ఉద్యోగులను వెనక్కి తీసుకురావాలి
• కొత్త జిల్లాల్లో టీఎన్జీవో ఆఫీసులకు స్థలం కేటాయించాలి
• కార్యవర్గ భేటీలో మామిళ్ల రాజేందర్‌, రాయకంటి ప్రతాప్‌

హైదరాబాద్‌, జూన్‌ 21 (నమస్తే తెలంగాణ): ఉద్యోగుల సమస్యల పరిష్కారానికి సీఎస్‌ అధ్యక్షతన జాయింట్‌ స్టాఫ్‌ కౌన్సిల్‌ ఏర్పాటు చేయాలని టీఎన్జీవో అధ్యక్ష, ప్రధాన కార్యదర్శులు మామిళ్ల రాజేందర్‌, రాయకంటి ప్రతాప్‌ కోరారు. మంగళవారం హైదరాబాద్‌లోని నాంపల్లిలో టీఎన్జీవోల కేంద్ర సంఘం కార్యవర్గ సమావేశం నిర్వహించారు. సుమారు 40 ఏండ్లపాటు టీఎన్జీవోకు సారథ్యం వహించిన బీ స్వామినాథం మృతికి సంతాపం ప్రకటించారు. టీఎన్జీవో మాజీ అధ్యక్షులు స్వామిగౌడ్‌, డీ సుధాకర్‌ హాజరై నివాళి అర్పించారు. మీటింగ్‌ హాల్‌కు స్వామినాథం మెమోరియల్‌ హాల్‌గా నామకరణం చేశారు. ఈ సందర్భంగా రాజేందర్‌, ప్రతాప్‌ మాట్లాడుతూ.. ఉద్యోగుల సమస్యలు పరిష్కరించాలని కోరారు. అనంతరం కార్యవర్గం పలు తీర్మానాలను ఆమోదించింది. సమావేశంలో టీఎన్జీవో అసోసియేట్‌ అధ్యక్షులు కస్తూరి వెంకటేశ్వర్లు, కోలా రాజేశంగౌడ్‌, ఎం సత్యనారాయణగౌడ్‌, కోశాధికారి రామినేని శ్రీనివాసరావుతోపాటు ముఖ్య నేతలు ముజీబ్‌, ఆకుల రాజేందర్‌, సోమన్న, కిషన్‌, జగదీశ్వర్‌, రామ్‌ కిషన్‌, శ్రీరాం తదితరులు పాల్గొన్నారు.

తీర్మానాలు ఇవే..

• పీఆర్సీ ఆమోదించిన ఉత్తర్వులను విడుదల చేయాలి.
• నూతన జిల్లాలకు అనుగుణంగా కొత్త క్యాడర్‌ స్ట్రెంత్‌ మంజూరు చేయాలి.
• పీఆర్సీ ప్రకారం ఈహెచ్‌ఎస్‌ అమలు చేయాలి.
• అన్ని జిల్లా కేంద్రాల్లో టీఎన్జీవో భవనాలు నిర్మించడానికి స్థలం కేటాయించాలి.
• ఉద్యోగ బదిలీలు చేపట్టాలి.
• ఉద్యోగ సర్వీసు రూల్స్‌ను కొత్తగా సవరించాలి.
• ఏపీలో పనిచేస్తున్న 123 మంది తెలంగాణ ఉద్యోగులను వెనక్కి తీసుకురావాలి.
• పీఆర్సీలోని లోపాలను సవరించడానికి ప్రత్యేక కమిటీని ఏర్పాటు చేయాలి.
• గచ్చిబౌలిలోని ఉద్యోగుల ఇండ్ల స్థలాలను టీఎన్జీవోలకు కేటాయించడానికి అడ్డుగా ఉన్న ప్రభుత్వ మెమో 1088ను రద్దు చేయాలి.
• ఉద్యోగుల ఆదాయ పన్ను పరిమితిని రూ.10 లక్షలకు పెంచేలా కేంద్రం చర్యలు తీసుకోవాలి.
• జీవో 317 ద్వారా జరిగిన జిల్లాస్థాయిలో అభ్యర్థనలు, పరస్పర బదిలీలు, ప్రమోషన్లు చేపట్టాలి.