ఇంటర్‌లో ఈ సారి 100% సిలబస్‌

• 220 రోజులు పనిదినాలు.. 173 రోజులు ప్రత్యక్ష తరగతులు
• వచ్చే ఏడాది మార్చి 23 నుంచి ఏప్రిల్‌ 12 వరకు వార్షిక పరీక్షలు
• డిసెంబర్‌లో అర్ధవార్షిక పరీక్షలు
• అకడమిక్‌ క్యాలెండర్‌ విడుదల
• ప్రైవేటు కాలేజీలు అడ్మిషన్ల కోసం ప్రచారం చేయరాదు: ఇంటర్‌బోర్డు

హైదరాబాద్‌, సెప్టెంబర్‌ 6 (నమస్తే తెలంగాణ): కరోనా కారణంగా పనిదినాలు తగ్గినప్పటికీ 2021-22 విద్యా సంవత్సరంలో ఇంటర్మీడియట్‌లో పూర్తిస్థాయి సిలబస్‌తో పరీక్షలు నిర్వహించనున్నారు. గతేడాది కరోనా కారణంగా 70 శాతం సిలబస్‌తోనే పరీక్షలు నిర్వహించారు. ఈ ఏడాది కూడా విద్యా సంవత్సరం ఆలస్యంగా ప్రారంభమవటంతో మొత్తం పనిదినాలు 220కి కుదించారు. ఈ ఏడాది విద్యా క్యాలెండర్‌ను బోర్డు కార్యదర్శి సయ్యద్‌ ఒమర్‌ జలీల్‌ సోమవారం విడుదలచేశారు.

అడ్మిషన్లపై ప్రచారం నిషేధం
అడ్మిషన్ల కోసం ప్రైవేటు కాలేజీలు ప్రచారం చేసుకొంటే వాటి గుర్తింపును రద్దుచేస్తామని ఇంటర్‌బోర్డు హెచ్చరించింది. బోర్డు ప్రకటించిన షెడ్యూల్‌ ప్రకారమే ప్రవేశాలు తీసుకోవాలని స్పష్టంచేసింది. అడ్మిషన్ల కోసం మార్కెటింగ్‌ ఎత్తులు వేయరాదని, ప్రజా సంబంధాల అధికారులను నియమించుకొని కాన్వాసింగ్‌ చేయరాదని సూచించింది. హోర్డింగ్‌లు, కరపత్రాలు, గోడరాతల్లాంటి ప్రచారాన్ని నిషేధించింది. పత్రికా ప్రకటనలు, ఎలక్ట్రానిక్‌ మీడియాలో వాణిజ్య ప్రకటనలు ఇవ్వరాదని స్పష్టంచేసింది. ఈ నిబంధనలు ఉల్లంఘిస్తే రూల్‌ 7, 1997 జీవో-114 ప్రకారం చట్టపరమైన చర్యలుంటాయని హెచ్చరించింది. ప్రైవేటు కాలేజీల యాజమాన్యాలు తమ అధ్యాపకులను జవాబు పత్రాల మూల్యాంకనానికి పంపించకుంటే క్రమశిక్షణా చర్యలుంటాయని పేర్కొంది. ప్రభుత్వ, ప్రైవేటు కాలేజీలన్నీ అకడమిక్‌ క్యాలెండర్‌ను తప్పనిసరిగా పాటించాలని ఒమర్‌ జలీల్‌ స్పష్టంచేశారు.

విద్యా కాలెండర్‌ ముఖ్యాంశాలు

• సాధారణంగా ఇంటర్‌ విద్యా సంవత్సరంలో పని దినాలు 280. ఈసారి 220 రోజులు పనిదినాలు ఉంటాయి. ఇందులో ఇప్పటికే 40 రోజులు ఆన్‌లైన్‌ క్లాసులు నిర్వహించారు. ఈ నెల 1 నుంచి ప్రారంభమైన ప్రత్యక్ష తరగతులు 173 రోజులు నడువనున్నాయి.
• 2022 మార్చి 23 నుంచి ఏప్రిల్‌ 12 వరకు వార్షిక పరీక్షలు నిర్వహిస్తారు.
• డిసెంబర్‌ 13 నుంచి 18 వరకు అర్ధవార్షిక పరీక్షలు.
• 2022 ఫిబ్రవరి 10 నుంచి 18 వరకు ప్రీ ఫైనల్‌ పరీక్షలు.
• ప్రాక్టికల్‌ పరీక్షలు 2022 ఫిబ్రవరి 23 నుంచి మార్చి 15 వరకు ఉంటాయి.
• అడ్వాన్డ్స్‌ సప్లిమెంటరీ పరీక్షలు కూడా ఉంటాయి.
• సెప్టెంబర్‌ 1 నుంచి డిసెంబర్‌ 18 వరకు మొదటి టర్మ్‌ పనిదినాలు. డిసెంబర్‌ 20 నుంచి 2022 ఏప్రిల్‌ 13 వరకు రెండోటర్మ్‌.
• వచ్చేనెల 13 నుంచి 16 వరకు దసరా సెలవులు.
• 2022 జనవరి 13 నుంచి 15 వరకు సంక్రాంతి సెలవులు
• ఈ విద్యాసంవత్సరానికి 2022 ఏప్రిల్‌ 13 చివరి పనిదినం, ఏప్రిల్‌ 14 నుంచి మే 31 వరకు వేసవి సెలవులు.
• 2022 జూన్‌ 1 నుంచి 2022 -23 కొత్త విద్యాసంవత్సరం ప్రారంభం.