Best Insurance Policy | ఆనందకరమైన జీవితంలో అగాథం సృష్టించడానికి చిన్నపాటి వ్యాధి చాలు. ఆరోగ్య బీమా ఉందని ధీమాగా ఉన్నారా? అయితే, అగ్గువ ప్రీమియంలో వస్తుందని బ్యాంకులు ఆఫర్ చేసే గ్రూప్ పాలసీ తీసుకుంటే.. పొరబడినట్టే! కష్టం చెప్పిరాదన్నట్టే.. కొన్ని బ్యాంకుల బీమాలు అకస్మాత్తుగా అక్కరకు రాకుండా పోయే ప్రమాదమూ ఉంది. ఇంతకీ బ్యాంకు ద్వారా బీమా తీసుకోవడం మంచిదేనా? ఇలా తీసుకోవడం వల్ల వినియోగదారులకు లాభమా? నష్టమా? తెలుసుకుందాం…
బీమా రంగంలో రోజుకో మార్పు చోటుచేసుకుంటున్నది. కొత్తకొత్త సంస్థలు సరికొత్త ఆఫర్లు ప్రకటిస్తున్నాయి. ప్రభుత్వ, ప్రైవేట్ బ్యాంకులు, నాన్ బ్యాంకింగ్ ఫైనాన్స్ సంస్థలు సైతం మెడికల్ ఇన్సూరెన్స్ పాలసీలను తీసుకొస్తున్నాయి. తక్కువ ప్రీమియంతో ఊరిస్తుండటంతో బీమా సంస్థలను కాదని చాలామంది బ్యాంకులు తీసుకొచ్చే పాలసీని తీసుకుంటున్నారు.
బ్యాంకులు ఆఫర్ చేసే పాలసీలకు తక్కువ ప్రీమియం ఉండటానికి చాలా కారణాలున్నాయి. లక్షలాది మంది వినియోగదారులతో ఒక బృందంగా గ్రూప్ ఇన్సూరెన్స్ పాలసీ అందిస్తున్నాయి. చాలా సంస్థల్లో ఉద్యోగులు అందరికీ కలిపి గ్రూప్ ఇన్సూరెన్స్ ఎలా చేస్తారో, బ్యాంకులు పాలసీకి అంగీకరించిన వినియోగదారులకు అలా గ్రూప్ ఇన్సూరెన్స్ చేస్తాయి. ఇందుకోసం బ్యాంకులు బీమా సంస్థలనే ఆశ్రయిస్తాయి. సదరు బీమా సంస్థలు భారీ స్థాయిలో వినియోగదారులు లభించడంతో తక్కువ ప్రీమియంకే పాలసీ ఇవ్వడానికి అంగీకరిస్తాయి. అయితే, ఒకటి, రెండేండ్లలో భారీగా క్లెయిమ్స్ ఇవ్వాల్సి వస్తే.. పాలసీని కొనసాగించకుండా నిలుపుదల చేయవచ్చు. ఈ క్రమంలో వినియోగదారుల పరిస్థితి అగమ్యగోచరంగా తయారవుతుంది.
పాలసీ పోర్టబిలిటీ లేకపోతే వచ్చే ఇబ్బందేమిటి అనుకోవచ్చు! ఐదేండ్లు పాలసీ కొనసాగిన తర్వాత ఆరో ఏడాది నిలుపుదల చేస్తే… తప్పనిసరి పరిస్థితుల్లో కొత్త పాలసీ తీసుకోవాల్సి వస్తుంది. ఈ ఐదేండ్లలో ఆ వ్యక్తి ఆరోగ్యం దెబ్బతింటే.. కొత్త పాలసీ దొరకడం కష్టంగా మారవచ్చు. అనారోగ్య సమస్యలు ఏమీ లేకపోయినా వయసు పెరగడం వల్ల ప్రీమియం భారం కావొచ్చు. అందుకే, హెల్త్ ఇన్సూరెన్స్ కోసం నేరుగా బీమా సంస్థలను ఆశ్రయించడమే తెలివైన పని.
పొడిగించలేం..
ఉద్యోగులకు గ్రూప్ ఇన్సూరెన్స్ ఆ సంస్థలో పనిచేసేంత వరకే వర్తిస్తుంది. ఏ కారణం వల్లనైనా ఉద్యోగం మానేస్తే.. పాలసీ వర్తించదు. కొత్త పాలసీ తీసుకోవాలంటే వయసు, ఆరోగ్య పరిస్థితిని బేరీజు వేసుకున్నాకే బీమా ధీమా లభిస్తుంది. బ్యాంకు పాలసీల్లోనూ.. ఇన్సూరెన్స్దారుల దయాదాక్షిణ్యాలపై మన అదృష్టం అధారపడి ఉంటుంది. ఉదాహరణకు సురేంద్రకు 40 ఏండ్లు. అతని తల్లికి 60 ఏండ్లు. తక్కువలో వస్తుంది కదా అని తల్లిపేరిట బ్యాంకు ద్వారా హెల్త్ ఇన్సూరెన్స్ తీసుకున్నాడు. రెండేండ్ల తర్వాత ఆమెకు కిడ్నీ జబ్బు తలెత్తింది. డయాలసిస్ మొదలైంది. ఇన్సూరెన్స్ ఉండటంతో ఆ ఖర్చులు సురేంద్ర నెత్తిన పడలేదు. మరో రెండేండ్లకు పాలసీ రెన్యువల్ చేయలేమని బ్యాంకర్ నుంచి సందేశం వచ్చింది. అప్పటికి అనారోగ్యంతో ఉన్న సురేంద్ర తల్లికి బయట బీమా సంస్థలు కూడా పాలసీ ఇవ్వలేమని తేల్చి చెప్పాయి. ఐదేండ్ల కిందట ఆమె ఆరోగ్యంగా ఉన్నప్పుడే బీమా సంస్థలకు చెందిన పాలసీ తీసుకొని ఉంటే ఈ ఇబ్బంది వచ్చి ఉండేది కాదు! ఈ ఒక్క ఉదంతం చాలు బ్యాంకుల ద్వారా తీసుకునే హెల్త్ ఇన్సూరెన్స్ ఏ మేరకు సాయపడతాయో అర్థమవుతుంది.
పోర్టబిలిటీ డౌటే!
సాధారణంగా హెల్త్ ఇన్సూరెన్స్ విషయంలో పాలసీదారుడి హెల్త్డైరీ కీలక భూమిక పోషిస్తుంది. ఒక బీమా సంస్థ తరఫున పాలసీ తీసుకున్నారు అనుకుందాం! వారి సేవలు నచ్చని పక్షంలో పాలసీ పోర్టబిలిటీకి అవకాశం ఉంటుంది. అంటే, కొత్తగా పాలసీ తీసుకున్నట్టుగా కాకుండా దీనికి సీనియారిటీ వర్తిస్తుంది. దీంట్లో సీనియారిటీతో ఏం పని అనుకోకండి? ఉదాహరణకు 40 ఏండ్ల వ్యక్తి మొదటిసారి హెల్త్ ఇన్సురెన్స్ తీసుకున్నాడు! నాలుగేండ్ల పాటు కొనసాగించాడు. ఐదో ఏడాది ఇప్పుడున్న సంస్థ కాదని మరో సంస్థకు చెందిన పాలసీ తీసుకోవాలని భావించాడు. ఇలాంటి సందర్భంలో గతంలో ఎలాంటి క్లెయిమ్స్ లేకపోతే ఇన్సూరెన్స్ సంస్థలు పాలసీ పోర్టబిలిటీకి అంగీకరిస్తాయి.
పాలసీ అందజేసిన తర్వాతి రోజు నుంచే ఏదైనా అనారోగ్య సమస్య తలెత్తితే క్లెయిమ్ చేసుకునే వెసులుబాటు కలుగుతుంది. మళ్లీ కొత్తగా పాలసీ తీసుకోవాల్సి వస్తే మొదటి నెల రోజులు ప్రమాదం జరిగితే తప్ప క్లెయిమ్ చేసుకునే వీలు ఉండదు. పైగా మొదటి రెండేండ్లూ కొన్ని శస్త్ర చికిత్సలకూ, కొన్ని రుగ్మతలకు క్లెయిమ్ వర్తించదు. ఈ మేరకు మళ్లీ కొత్త పాలసీ తీసుకోవాల్సి వస్తే వినియోగదారుడు రిస్క్లో పడ్డట్టే! పోర్టబిలిటీ ఉంటే.. ఈ సమస్య తలెత్తదు!! బ్యాంకు ద్వారా తీసుకున్నప్పుడు ఈ పోర్టబిలిటీ అవకాశాలు తక్కువ. కొన్ని బ్యాంకులు పోర్టబిలిటీ అవకాశం కల్పిస్తామని అంటున్నాయి. కానీ, క్షేత్రస్థాయిలో పూర్తిస్థాయిలో అమలవుతున్నట్లు కనిపించడం లేదు. వీటన్నిటినీ పరిశీలించిన తర్వాత హెల్త్ ఇన్సూరెన్స్ విషయంలో బ్యాంకులు, నాన్బ్యాంకింగ్ ఫైనాన్స్ సంస్థల పాలసీలకు ఎంత దూరంగా ఉంటే అంత మంచిది. విశ్వనీయత ఉన్న హెల్త్ ఇన్సూరెన్స్ సంస్థల పాలసీ తీసుకోవడం శ్రేయస్కరం.
ఎం. రాం ప్రసాద్
సర్టిఫైడ్ ఫైనాన్షియల్ ప్లానర్
ram@rpwealth.in
www.rpwealth.in