శాలువా…వెచ్చగా కప్పేయవా!

ఆమనీ పాడవే హాయిగా... అంటూ మంచు తెరల్ని మనమూ ఆస్వాదించాలంటే ఆ సినిమాలో హీరోలాగే ఓ వెచ్చటి శాలువా దన్ను ఉండాల్సిందే.

ఆమనీ పాడవే హాయిగా… అంటూ మంచు తెరల్ని మనమూ ఆస్వాదించాలంటే ఆ సినిమాలో హీరోలాగే ఓ వెచ్చటి శాలువా దన్ను ఉండాల్సిందే.
మెడచుట్టూ చుట్టుకుంటామా, మేని చుట్టూ కప్పుకొంటామా అన్నది మాత్రం మనిష్టమే. ప్రపంచమంతా దొరికినా భారత్‌లో మాత్రం శాలువాలు మరింత ప్రత్యేకం. వెచ్చదనం, కళ, సంస్కృతుల మేలిమి మేళవింపులా ఉంటాయివి. దేంతో తయారవుతున్నాయి, ఏ కళను జోడిస్తున్నాం అన్నదాన్నిబట్టి పేర్లు మారే వీటి గురించి మనమూ తెలుసుకుంటే,ఎరుకతో ఎంపిక చేసుకోవచ్చు!

మనదేశంలో అధిక ప్రాంతం సమశీతోష్ణ వాతావరణమే అయినా కశ్మీర్‌, లద్దాఖ్‌, హిమాచల్‌ప్రదేశ్‌లాంటి చోట్ల అధికశాతం చల్లని వాతావరణమే ఉంటుంది. మంచు దుప్పట్లూ పరచుకుంటాయక్కడ. ఇలాంటి చోట బతకాలంటే మనుషులకు శాలువాలు, స్వెట్టర్లు ఎంత అవసరమో, అక్కడి జంతువులకు బొచ్చు కూడా అంతే అవసరం. అందుకే ఈ ప్రాంతాల్లో కుందేలు నుంచి దున్నపోతు దాకా అన్నీ దట్టమైన బొచ్చుతోనే కనిపిస్తాయి. మన దేశానికి ప్రత్యేకమైన పశ్మీనా, అంగోరాలాంటి శాలువాలు కూడా వీటి ఉన్ని నుంచే తయారు చేస్తారు.

మెరీనో… గొర్రె!
జమ్ము కశ్మీర్‌, లద్దాఖ్‌, ఉత్తరాఖండ్‌లలో మెరీనో అని పిలిచే ప్రత్యేక రకం గొర్రెలు పెరుగుతాయి. ఒత్తైన బొచ్చు ఉండే ఈ గొర్రెల నుంచి తీసిన ఉన్నితో చేసినవే మెరీనో శాలువాలు. సాగేగుణం కలిగిన వీటి వెంట్రుకలతో నేసిన ఇవి శరీర ఉష్ణోగ్రతను అదుపులో ఉంచుతాయి. అంటే బయటికి వెళ్లినప్పుడు చలిని ఆపుతాయి, అదే గదుల్లో ఉన్నప్పుడు ధరించినా చెమటలు పట్టవు. అందుకే మెరీనో రకం ఊలుతో చేసిన శాలువాలు, స్కార్ఫ్‌లను ఫ్యాషనబుల్‌ దుస్తుల జోడీగా ఎక్కువగా వాడతారు.

జడలబర్రె ఉన్నితో…
లద్దాఖ్‌, సిక్కిం, అరుణాచల్‌ ప్రదేశ్‌లలో మందపాటి బొచ్చు ఉండే హిమాలయన్‌ యాక్‌ అని పిలిచే జడలబర్రెలు జీవిస్తుంటాయి. వాటి ఉన్ని నుంచి కూడా మన దగ్గర అద్భుతమైన శాలువాలను నేస్తారు. జమావర్‌, కుల్లులాంటి వాటితో పాటు ఇతర రకాల నేతలలోనూ దీన్ని ఉపయోగిస్తారు. కాస్త మందంగా ఉండే ఈ శాలువాలు సున్నా డిగ్రీల సెంటీగ్రేడ్‌ దగ్గర కూడా చలిని ఆపగలవు. చాలాకాలం మన్నే ఇవి బలమైన చల్లని గాలుల నుంచీ రక్షణను ఇస్తాయి.

పశ్మీనా …మేక

మన దగ్గర దొరికే శాలువాల్లో అత్యంత ప్రసిద్ధి చెందినవి, బాగా వేడిని ఇచ్చేవి పశ్మీనా శాలువాలు. లద్దాఖ్‌ ప్రాంతంలో తిరిగే చాంగ్‌తంగి లేదా పశ్మీనాగా పిలిచే మేకల ఉన్ని నుంచి వీటిని తయారు చేస్తారు. వీటి పోగులు మన వెంట్రుకలకన్నా ఆరు రెట్లు సన్నగా ఉంటాయట. అందుకే వీటితో నేసిన శాలువాలు మెత్తగా ఉండటమే కాకుండా వెచ్చదనాన్ని ఇస్తాయి. కశ్మీరీ నేతకారుల చేతుల్లో అందమైన అల్లికలుగా ఉండే వీటిని స్కార్ఫుల్లా ఫ్యాషనబుల్‌ దుస్తుల జతగా కూడా ధరించవచ్చు. మన దగ్గరే కాదు, అమెరికాలాంటి విదేశాల్లోనూ వీటికి అధిక ఆదరణ ఉంది.

అంగోరా… కుందేలు
దూదిపింజను పట్టుకున్నంత మృదువుగా, వెచ్చటి సెగను చుట్టుకున్నంత హాయిగా ఉండాలంటే అంగోరా శాలువాను చుట్టుకోవాల్సిందే. రంగు రంగుల్లో జామెట్రిక్‌ ఆకృతులతో ఉండే కుల్లు శాలువాను అత్యధికంగా దీనితోనే తయారు చేస్తారు. హిమాలయ ప్రాంతంలో పెరిగే అంగోరా కుందేళ్ల ఉన్నితో వీటిని నేస్తారు. ముఖ్యంగా హిమాచల్‌ ప్రదేశ్‌, ఉత్తరాఖండ్‌లలో ఈ శాలువాలను ఎక్కువగా నేస్తారు. పశ్మీనాతో పోలిస్తే ఇది మరింత చలిని ఆపుతుంది. కాకపోతే దీన్ని ఇంకాస్త సున్నితంగా వాడుకోవాలి. వీటి ఖరీదు కూడా కాస్త ఎక్కువే.