WPL Auction | వేలం ఏదైనా స‌రే.. అండ‌ర్-19 వ‌ర‌ల్డ్ క‌ప్ విన్నింగ్ కెప్టెన్లను ఆ ఫ్రాంఛైజీ కొనేస్తోంది

మ‌హిళ‌ల ప్రీమియ‌ర్ లీగ్ (డ‌బ్ల్యూపీఎల్ )వేలంలో త‌న సంప్ర‌దాయాన్ని కొన‌సాగించింది. ఐపీఎల్ వేలంలో మాదిరిగానే అండ‌ర్ -19 వ‌ర‌ల్డ్ క‌ప్ టీమ్ కెప్టెన్‌ను ద‌క్కించుకుంది. ష‌ఫాలీ వ‌ర్మ‌ను రూ. 2 కోట్ల‌కు కొనుగోలు చేసింది.

WPL Auction : మ‌హిళ‌ల ప్రీమియ‌ర్ లీగ్ (డ‌బ్ల్యూపీఎల్ )వేలంలో ఎవ‌రిని కొనుగోలు చేయాలి? ఎంత ధ‌ర పెట్టాలి ? అనే విష‌య‌మై ప‌క్కా ప్ర‌ణాళిక‌తో ఉంటాయి. అయితే.. ఢిల్లీ క్యాపిట‌ల్స్ మాత్రం ఛాంపియ‌న్ ప్లేయ‌ర్స్ కొనడంపై దృష్టి పెడుతుంది. డ‌బ్ల్యూపీఎల్ వేలంలోనూ ఆ ఫ్రాంఛైజీ త‌న సంప్ర‌దాయాన్ని కొన‌సాగించింది. ఇండియ‌న్ ప్రీమియ‌ర్ లీగ్ (ఐపీఎల్) వేలంలో మాదిరిగానే అండ‌ర్ -19 వ‌ర‌ల్డ్ క‌ప్ టీమ్ కెప్టెన్‌ను ద‌క్కించుకుంది.

డ‌బ్ల్యూపీఎల్ తొలి సీజ‌న్ వేలంలో ఆ ఫ్రాంఛైజీ ఈమ‌ధ్యే టీమిండియాకు అండ‌ర్ -19 వ‌ర‌ల్డ్ క‌ప్ ట్రోఫీ అందించిన ష‌ఫాలీ వ‌ర్మ‌ను కొనుగోలు చేసింది. ఈ యంగ్‌స్ట‌ర్ కోసం ఏకంగా రూ. 2 కోట్లు పెట్టేందుకు వెనుకాడ‌లేదు.

ఉన్ముక్త్ చంద్‌తో మొద‌లు..

అండ‌ర్ -వ‌ర‌ల్డ్ 19 క‌ప్పు గెలిచిన కెప్టెన్ల‌ను ఢిల్లీ క్యాపిట‌ల్స్‌ వేలంలో కొన‌డం ఉన్ముక్త్ చంద్‌తో మొద‌లైంది. 2012 లో ఉన్ముక్త్ కెప్టెన్సీలోని యువ భార‌త్ అండ‌ర్ -19 వ‌ర‌ల్డ్ క‌ప్ ఛాంపియ‌న్‌గా అవ‌త‌రించింది. దాంతో, ఆ ఏడాది వేలంలో ఢిల్లీ అత‌డిని సొంతం చేసుకుంది. ఆ త‌ర్వాత భార‌త్‌కు అండ‌ర్ -19 వ‌ర‌ల్డ్ క‌ప్ అందించిన‌ పృథ్విషా (2018), య‌శ్ ధూల్ (2022)ల‌ను కూడా ఈ ఫ్రాంఛైజీ వేలంలో కొనుగోలు చేసింది. అదే సంప్ర‌దాయాన్ని కొన‌సాగిస్తూ.. డ‌బ్ల్యూపీఎల్ వేలంలో ష‌ఫాలీ వ‌ర్మ (2023) ను కూడా ఢిల్లీ క్యాపిట‌ల్స్ ద‌క్కించుకుంది.

కోహ్లీని మాత్ర‌మే..

అయితే, విరాట్ కోహ్లీని తీసుకునేందుకు మాత్రం ఆస‌క్తి చూపించ‌లేదు. 2008లో కోహ్లీ నేతృత్వంలో భార‌త్ అండర్ – 19 వ‌ర‌ల్డ్ క‌ప్ గెలిచింది. ఒక‌వేళ అత‌డిని కొనుగోలు చేసి ఉంటే ప‌రిస్థితి వేరేలా ఉండేదేమో. ఇప్ప‌టివ‌ర‌కు ఢిల్లీ క్యాపిట‌ల్స్ ఐపీఎల్ ట్రోఫీ నెగ్గ‌లేదు. రెండేళ్ల క్రితం శ్రేయ‌స్ అయ్య‌ర్ కెప్టెన్సీలో ఆ జ‌ట్టు ఫైన‌ల్ చేరింది. అయితే.. ముంబై చేతిలో ఓట‌మి పాలైంది.