Stadium 974 | ఫిఫా ప్రపంచకప్ కోసం ఖతార్ నిర్మించిన 8 స్టేడియాల్లో ‘స్టేడియం 974’ది వినూత్న శైలి. ఖతార్ అంతర్జాతీయ టెలిఫోన్ కోడ్ను సూచించడంతో పాటు స్టేడియం నిర్మాణం కోసం ఏకంగా 974 షిప్పింగ్ కంటెనర్లను వాడారు. దోహా పోర్ట్ ప్రాంతంలో నిర్మించిన ఈ మైదానం త్వరలో కనుమరుగుకానున్న విషయం తెలిసిందే. ఈ స్టేడియాన్ని ప్రపంచకప్ ముగిసిన తర్వాత కూలగొట్టనున్నట్లు ఇప్పటికే అక్కడి అధికారులు ప్రకటించారు.
కాగా, తాజాగా స్టేడియానికి సంబంధించిన వీడియోను ఫిఫా వరల్డ్ కప్ అభిమానులతో పంచుకుంది. ‘త్వరలో కూలిపోబోతున్న ఈ స్టేడియాన్ని ఒకసారి చూడండి..’ అంటూ ట్విట్టర్లో పోస్టు చేసింది. ప్రస్తుతం ఈ వీడియో నెట్టింట వైరల్ అవుతోంది.
Built with 974 shipping containers. the stadium can be fully dismantled and re-purposed post-event 🧱
Take a look at Stadium 974 🏟️ #FIFAWorldCup #Qatar2022
— FIFA World Cup (@FIFAWorldCup) December 5, 2022
మెగా టోర్నీ ప్రారంభానికి ముందు ఈ స్టేడియం పేరు, నిర్మించిన విధానం ఎక్కువగా ఆకర్షించింది. 40 వేల సీటింగ్ సామర్థ్యం కలిగిన ఈ స్టేడియాన్ని తాత్కాలిక ప్రాతిపదికన నిర్మించారు. ఇందుకోసం షిప్పింగ్ కంటైనర్లు, టన్నుల కొద్దీ స్టీల్ను ఉపయోగించారు. టోర్నీ ముగిసిన తర్వాత ఆ స్టీల్ నిర్మాణాలను విడదీసి.. అవసరమైన దేశానికి వాటిని తరలించనున్నారు. ఖతార్ అంతర్జాతీయ డయలింగ్ కోడ్ ‘974’తోపాటు నిర్మాణంలో వాడిన కంటెయినర్ల సంఖ్యను సూచిస్తూ స్టేడియానికి ఇలా ‘స్టేడియం 974’ అని పేరు పెట్టారు.