15వ మాన్‌సూన్‌ రెగట్టా పోటీలు షురూ

నగరంలోని హుసేన్‌సాగర్‌ వేదికగా 15వ మాన్‌సూన్‌ రెగట్టా పోటీలు సోమవారం ప్రారంభమయ్యాయి.

హైదరాబాద్‌, ఆట ప్రతినిధి: నగరంలోని హుసేన్‌సాగర్‌ వేదికగా 15వ మాన్‌సూన్‌ రెగట్టా పోటీలు సోమవారం ప్రారంభమయ్యాయి. గత రెండ్రోజులుగా కురుస్తున్న వర్షాలకు తోడు వేగంగా వీస్తున్న గాలులు సాగర్‌లో సెయిలర్లకు కఠిన సవాల్‌ విసిరాయి. తొలి రోజు పలు విభాగాలలో పోటీపడ్డ సెయిలర్లు వర్షంలోనూ ఉత్సాహంగా పాల్గొన్నారు.

అండర్‌-16 ఆప్టిమిస్ట్‌ క్లాస్‌లో తమిళనాడు సెయిలర్‌ శ్రేయా కృష్ణ ఓ రేసులో గెలిచి మరో రేసులో రెండో స్థానం సాధించింది. తెలంగాణ అబ్బాయి పల్లారా గోవర్ధన్‌ ఓ విజయం, మరో రేసులో రెండో స్థానంతో ఆమెకు గట్టి పోటీనిచ్చాడు.టాప్‌సీడ్‌గా బరిలోకి దిగిన తెలంగాణ అమ్మాయి దీక్షిత ఒక రేసులో మూడో స్థానం దక్కించుకోగా మరో రేసులో 11వ స్థానంతో తీవ్ర నిరాశపరిచింది.