Shreyas Iyer | శ్రేయస్ అయ్యర్ అరుదైన వరల్డ్ రికార్డు.. వరుసగా 8 టాస్‌లు గెలిచి స‌రికొత్త‌ చరిత్ర

Shreyas iyer | టీమిండియా కొత్త టీ20 కెప్టెన్ శ్రేయస్ అయ్యర్ అంతర్జాతీయ క్రికెట్‌లో అరుదైన ఘనత సాధించాడు. కెప్టెన్‌గా బాధ్యతలు చేపట్టిన తర్వాత వరుసగా ఎనిమిది టీ20 అంతర్జాతీయ మ్యాచ్‌ల్లో టాస్ గెలిచిన తొలి సారథిగా చరిత్ర సృష్టించాడు. ఈ రికార్డుతో ఇప్పటివరకు ఉన్న ప్రపంచ రికార్డును బద్దలు కొట్టడమే కాకుండా, భారత మాజీ కెప్టెన్ ఎంఎస్ ధోనీ పేరిట ఉన్న ప్రత్యేక రికార్డును కూడా అధిగమించాడు.

Shreyas Iyer | టీమిండియా కొత్త టీ20 కెప్టెన్ శ్రేయస్ అయ్యర్ అంతర్జాతీయ క్రికెట్‌లో అరుదైన ఘనత సాధించాడు. కెప్టెన్‌గా బాధ్యతలు చేపట్టిన తర్వాత వరుసగా ఎనిమిది టీ20 అంతర్జాతీయ మ్యాచ్‌ల్లో టాస్ గెలిచిన తొలి సారథిగా చరిత్ర సృష్టించాడు. ఈ రికార్డుతో ఇప్పటివరకు ఉన్న ప్రపంచ రికార్డును బద్దలు కొట్టడమే కాకుండా, భారత మాజీ కెప్టెన్ ఎంఎస్ ధోనీ పేరిట ఉన్న ప్రత్యేక రికార్డును కూడా అధిగమించాడు. ఈ రికార్డు ఇప్ప‌టి వరకు అంతర్జాతీయ టీ20ల్లో వరుసగా ఏడు టాస్‌లు గెలిచిన బహామాస్ కెప్టెన్ గ్రెగొరీ టేలర్‌పై ఉంది. అదే విధంగా, 2010 నుంచి 2012 మధ్య టీమిండియాకు నాయకత్వం వహించిన ఎంఎస్ ధోనీ కూడా వరుసగా ఏడు టాస్‌లు గెలిచి భారత రికార్డు సృష్టించారు. ఇప్పుడు శ్రేయస్ అయ్యర్ వరుసగా ఎనిమిది టాస్‌లు గెలిచి ఇద్దరి రికార్డులను అధిగమిస్తూ కొత్త చరిత్రకు శ్రీకారం చుట్టాడు.

టాస్ విషయంలో అదృష్టం కలిసొచ్చినట్లే, మ్యాచ్ ఫలితంలో కూడా శ్రేయస్ అయ్యర్‌కు శుభారంభమే లభించింది. హరారే వేదికగా జింబాబ్వేతో జరిగిన తొలి టీ20లో టాస్ గెలిచిన అయ్యర్ ముందుగా బౌలింగ్ ఎంచుకున్నాడు. భారత బౌలర్లు కట్టుదిట్టంగా బౌలింగ్ చేయడంతో జింబాబ్వే నిర్ణీత 20 ఓవర్లలో 125/7 పరుగులకే పరిమితమైంది. భారత యువ పేసర్ మయాంక్ యాదవ్ అద్భుత ప్రదర్శనతో ప్రత్యర్థి బ్యాటర్లను కట్టడి చేశాడు. తన వేగవంతమైన బౌలింగ్‌తో రెండు కీలక వికెట్లు పడగొట్టి 2/18 గణాంకాలు నమోదు చేశాడు. ఈ అద్భుత ప్రదర్శనకు గాను అతను ప్లేయర్ ఆఫ్ ది మ్యాచ్ అవార్డు అందుకున్నాడు.
ఇక 126 పరుగుల లక్ష్యంతో బరిలోకి దిగిన భారత్‌కు 15 ఏళ్ల యువ సంచలనం వైభవ్ సూర్యవంశీ తుఫాన్ ఆరంభాన్ని అందించాడు. కేవలం 18 బంతుల్లోనే అర్ధశతకం పూర్తి చేసి జింబాబ్వే బౌలర్లపై ఎదురుదాడికి దిగాడు. అతని మెరుపు ఇన్నింగ్స్ మ్యాచ్‌ను పూర్తిగా భారత్ వైపు తిప్పేసింది.

వైభవ్ ఇచ్చిన బలమైన ఆరంభాన్ని కెప్టెన్ శ్రేయస్ అయ్యర్ (28*), ఇషాన్ కిషన్ (35) చక్కగా కొనసాగించారు. ఇద్దరూ బాధ్యతాయుతంగా ఆడి భారత్‌ను ఎలాంటి ఒత్తిడి లేకుండా విజయతీరాలకు చేర్చారు. భారత్ కేవలం 13.2 ఓవర్లలోనే మూడు వికెట్లు కోల్పోయి లక్ష్యాన్ని ఛేదించి ఏడు వికెట్ల తేడాతో ఘన విజయం సాధించింది. ఈ విజయంతో మూడు మ్యాచ్‌ల టీ20 సిరీస్‌లో భారత్ 1-0 ఆధిక్యంలోకి దూసుకెళ్లింది. ఒకవైపు వరల్డ్ రికార్డు, మరోవైపు కెప్టెన్‌గా తొలి విజయం సాధించిన శ్రేయస్ అయ్యర్‌కు ఈ మ్యాచ్ చిరస్మరణీయంగా మారింది. యువ ఆటగాళ్ల అద్భుత ప్రదర్శనతో భారత జట్టు సిరీస్‌ను విజయంతో ప్రారంభించగా, మిగతా రెండు మ్యాచ్‌లపైనా అభిమానుల్లో భారీ అంచనాలు నెలకొన్నాయి.