Visit:
Vaping | వేపింగ్, హుక్కా వంటివి సిగరెట్తో పోలిస్తే తక్కువ హానికరమైనవిగా చాలామంది భావిస్తుంటారు. సామాజిక కార్యక్రమాలు, స్నేహితుల సమావేశాల్లో ఇవి సాధారణంగా మారిపోవడంతో వాటి వల్ల కలిగే ఆరోగ్య సమస్యలను చాలామంది పెద్దగా పట్టించుకోవడం లేదు. అయితే వీటి ద్వారా శరీరంలోకి వెళ్లే పదార్థాలు, పొగ, రసాయనాలు ఆరోగ్యంపై ప్రతికూల ప్రభావం చూపే అవకాశం ఉందని పోషకాహార నిపుణులు హెచ్చరిస్తున్నారు. ముఖ్యంగా ఊపిరితిత్తులు, గుండె, నాడీ వ్యవస్థపై వీటి ప్రభావాన్ని విస్మరించకూడదు.
వేపింగ్, హుక్కా రెండింటి ద్వారా విషపూరిత రసాయనాలు, భారీ లోహాలు, అతి సూక్ష్మ కణాలు ఊపిరితిత్తుల్లోకి చేరుతాయి. ఇవి శ్వాసకోశంలో వాపును కలిగించడంతోపాటు ఊపిరితిత్తుల కణజాలాన్ని దెబ్బతీసే అవకాశం ఉంటుంది. వేపింగ్లో రసాయన ద్రావణాలను వేడి చేసి ఆవిరిగా పీల్చుకుంటే, హుక్కాలో పొగాకు కాల్చేందుకు బొగ్గును ఉపయోగిస్తారు. ఈ ప్రక్రియల వల్ల శరీరంలోకి వివిధ హానికర పదార్థాలు చేరుతాయి. నీరు లేదా ఇతర వడపోత పద్ధతులు నికోటిన్ను పూర్తిగా తొలగిస్తాయని భావించడం కూడా అపోహే. ఫలితంగా అధిక మోతాదులో నికోటిన్ శరీరంలోకి చేరి గుండెపై ఒత్తిడిని పెంచడంతోపాటు నాడీ వ్యవస్థపై ప్రభావం చూపే అవకాశం ఉంటుంది.
వేపింగ్ లేదా హుక్కా ఉపయోగించే వ్యక్తికే కాకుండా వారి చుట్టూ ఉన్నవారికీ ప్రమాదం ఉంటుంది. వీటి నుంచి వెలువడే పొగ, సూక్ష్మ కణాలు, భారీ లోహాలు, విషపూరిత వాయువులు గాలిలో కలిసిపోవడంతో పక్కన ఉన్నవారు కూడా వాటిని పీల్చుకునే అవకాశం ఉంటుంది. ముఖ్యంగా పిల్లలు, వృద్ధులు, శ్వాసకోశ సమస్యలు ఉన్నవారు ఇలాంటి పొగకు గురికాకుండా జాగ్రత్తపడడం అవసరం. అందువల్ల వేపింగ్ అనేది పొగతాగడానికి పూర్తిగా సురక్షితమైన ప్రత్యామ్నాయం కాదని గుర్తించాలి.
వేపింగ్ పరికరాల్లో ఉపయోగించే లిథియం-అయాన్ బ్యాటరీల కారణంగా పేలుళ్లు, కాలిన గాయాలు, రసాయన ప్రమాదాలు సంభవించే అవకాశం కూడా ఉంటుంది. మరోవైపు హుక్కాలో మండుతున్న బొగ్గు కారణంగా మంటలు, తీవ్రమైన కాలిన గాయాలు, కార్బన్ మోనాక్సైడ్ విష ప్రభావం వంటి ప్రమాదాలు ఉంటాయి. కాబట్టి వేపింగ్, హుక్కాలను సాధారణమైన లేదా హానికరం కాని అలవాట్లుగా భావించకుండా, వాటి వల్ల కలిగే ఆరోగ్య, భద్రతా ప్రమాదాలను పరిగణనలోకి తీసుకోవడం అవసరం.
