Shakib Al Hasan: అభిమాని చెంప చెల్లు.. మరో కాంట్రవర్సీలో బంగ్లాదేశ్‌ ఎంపీ..

Shakib Al Hasan: మగుర-1 నియోజకవర్గం నుంచి బరిలో నిలిచిన షకిబ్‌.. లక్షా యాభై వేల మెజారిటీతో గెలిచినా క్రికెట్‌లో మాదిరిగానే రాజకీయాలలో కూడా అతడి వ్యవహార శైలి చర్చనీయాంశమవుతోంది.

Shakib Al Hasan: బంగ్లాదేశ్‌ సాధారణ ఎన్నికలలో పోటీచేసి అధికార అవామీ లీగ్‌ పార్టీ తరఫున గెలిచిన ఆ దేశ క్రికెట్‌ జట్టు సారథి షకిబ్‌ అల్‌ హసన్‌ మరోసారి తన దురుసు ప్రవర్తనతో వార్తలలో నిలిచాడు. మగుర-1 నియోజకవర్గం నుంచి బరిలో నిలిచిన షకిబ్‌.. లక్షా యాభై వేల మెజారిటీతో గెలిచినా క్రికెట్‌లో మాదిరిగానే రాజకీయాలలో కూడా అతడి వ్యవహార శైలి చర్చనీయాంశమవుతోంది. ఎన్నికల సందర్భంగా ఓ పోలింగ్‌ బూత్‌ పరిశీలనకు వెళ్లిన షకిబ్‌.. అభిమాని చెంప చెల్లుమనిపించాడు. ఇందుకు సంబంధించిన వీడియో ప్రస్తుతం నెట్టింట వైరల్‌ అవుతోంది.

వీడియోలో పోలింగ్‌ కేంద్రానికి వెళ్లిన షకిబ్‌.. అక్కడ గుమిగూడిన జనాలను తోసుకుంటూ ముందుకు వెళ్లబోయాడు. అయితే అక్కడే ఉన్న ఓ అభిమాని.. అతడిని వెనక నుంచి పట్టుకోబోయాడు. అప్పటికే చికాకుగా ఉన్న షకిబ్‌.. అసహనంతో అభిమాని చెంపపై బలంగా కొట్టాడు. షకిబ్‌ అతడిపై చేయి చేసుకోవడంతో అక్కడున్నవారంతా వెంటనే అక్కడ్నుంచి తప్పుకున్నారు. షకిబ్‌ గెలిచిన తర్వాత ఈ వీడియో వైరల్‌ అవుతుండటంతో ప్రత్యర్థులతో పాటు నెటిజన్లు కూడా ఎంపీ అయినా షకిబ్‌ వ్యవహార శైలిలో మాత్రం ఏ మార్పూ రాలేదని వాపోతున్నారు.

 

Shakib Al Hasan finally lost his calm ❌#shakibalhasan #cricket #bangladesh pic.twitter.com/rmVKbSkrol

— Cricketangon (@cricketangon) January 7, 2024

షకిబ్‌ ఇలా దుందుడుకు ప్రవర్తనతో వార్తల్లో నిలవడం ఇదే కొత్త కాదు. ఈ ఏడాది ఓ ప్రమోషనల్‌ ఈవెంట్‌లో పాల్గొన్న షకిబ్‌.. తనను కలవడానికి వచ్చిన ఓ అభిమానిపై చేయి చేసుకున్నాడు. ఇక కొద్దిరోజుల క్రితమే వన్డే వరల్డ్‌ కప్‌లో భాగంగా శ్రీలంకతో జరిగిన మ్యాచ్‌లో లంక మాజీ సారథి ఏంజెలో మాథ్యూస్‌ను ‘టైమ్డ్‌ ఔట్‌’ అప్పీల్‌ చేయడంతో షకిబ్‌ విమర్శలపాలయ్యాడు.