Neymar : బ్రెజిల్ స్టార్ ఫుట్బాలర్ (Brazil footballer), పీఎస్జీ (PSG) క్లబ్ ఫార్వర్డ్ ప్లేయర్ నెయ్మర్ (Neymar) కుడికాలు చీలమండ(ankle)కు సర్జరీ చేయించుకున్నాడు. ఖతర్లోని అస్పెతార్ ఆస్పత్రి వైద్యులు అతడికి విజయవంతంగా సర్జరీ చేశారు. ‘నెయ్మర్కు చీలమండకు సర్జరీ సక్సెస్ అయింది. దాంతో, ఇకనుంచి అతను తరచూ చీలమండ గాయంతో బాధ పడడం అనేది జరగదు’ అని హాస్పిటల్ ఒక ప్రకటనలో తెలిపింది. ఆస్పత్రి మంచం మీద ఉన్న ఫొటోను ఆన్లైన్లో షేర్ చేశారు.
‘నెయ్మర్ జూనియర్కు శుక్రవారం చీలమండ(ankle)కు సర్జరీ జరిగింది. దాంతో అతను నాలుగు నెలలు ఆటకు దూరం కానున్నాడు. పీఎస్జీ ఈ సీజన్ మ్యాచ్లు ఆడే అవకాశం లేదు. ప్రస్తుతం నెయ్మర్ చాలా సంతోషంగా ఉన్నాడు. అతనికి ఏమాత్రం నొప్పి లేదు. అతడికి సర్జరీ చేసిన వైద్యులు కూడా చాలా హ్యాపీగా ఉన్నారు’ అని పీఎస్జీ మెడికల్ డైరెక్టర్ హకీం చలాబీ తెలిపాడు.
మైదానంలో చిరుతలా కదిలే నెయ్మర్ నాలుగు నెలల నుంచి మోకాలి గాయంతో బాధ పడుతున్నాడు. నొప్పితోనే అతను దుబాయ్లో అల్నస్రీ క్లబ్తో ఫ్రెండ్లీ మ్యాచ్ ఆడాడు. అయితే.. గాయం మరింత వేధిస్తుండడంతో అతను దుబాయ్లో సర్జరీ చేసుకోవాలి అనుకున్నాడు. గత ఏడాది ఖతర్లో జరిగిన ఫిఫా వరల్డ్ కప్లో నెయ్మార్ గాయం కారణంగా నాకౌట్ మ్యాచ్లకు దూరమయ్యాడు. బ్రెజిల్ నాకౌట్ రౌండ్లో క్రొయేషియా చేతిలో ఓటమి పాలైంది.