తెలంగాణ సెయిలర్ల పతక జోరు

హుసేన్‌సాగర్‌ వేదికగా జరిగిన జాతీయ మాన్‌సూన్‌ రెగెట్టా చాంపియన్‌షిప్‌లో తెలంగాణ సెయిలర్లు పతక జోరు కనబరిచారు. ఆరు రోజుల పాటు జరిగిన రెగెట్టా టోర్నీ శనివారంతో ముగిసింది. వివిధ విభాగాల్లో తెలంగాణ సెయిలర్లు సత్తాచాటుతూ పతకాలు కొల్లగొట్టారు.

• ముగిసిన మాన్‌సూన్‌ రెగెట్టా టోర్నీ

హైదరాబాద్‌, ఆట ప్రతినిధి: హుసేన్‌సాగర్‌ వేదికగా జరిగిన జాతీయ మాన్‌సూన్‌ రెగెట్టా చాంపియన్‌షిప్‌లో తెలంగాణ సెయిలర్లు పతక జోరు కనబరిచారు. ఆరు రోజుల పాటు జరిగిన రెగెట్టా టోర్నీ శనివారంతో ముగిసింది. వివిధ విభాగాల్లో తెలంగాణ సెయిలర్లు సత్తాచాటుతూ పతకాలు కొల్లగొట్టారు. బాలుర అండర్‌-15 విభాగంలో మహమ్మద్‌ రిజ్వాన్‌ పసిడి పతకం గెలుచుకోవడమే గాక ‘బాయ్స్‌’ ట్రోఫీని కైవసం చేసుకున్నాడు. అండర్‌-19 మిక్స్‌డ్‌ డబుల్స్‌ విభాగంలో తనుజ కామేశ్వర్‌- శ్రవణ్‌ కత్రావత్‌ జోడీ స్వర్ణం దక్కించుకుంది.

అండర్‌-15 బాలికల విభాగంలో రాష్ట్ర సెయిలర్‌ లాహిరి కొమురవెల్లి రజత పతకం సొంతం చేసుకుంది. దీనితో పాటు ప్రతిష్టాత్మక ఎస్‌హెచ్‌ బాబు స్మారక ట్రోఫీని దక్కించుకుంది. అండర్‌-19 మిక్స్‌డ్‌ డబుల్స్‌ విభాగంలో దీక్షిత, గణేశ్‌ రజతం సాధించారు. అండర్‌-15 బాలికల విభాగంలో చంద్రలేఖ, బాలుర కేటగిరీలో వినోద్‌ కాంస్యాలు కైవసం చేసుకున్నారు.