IND vs PAK | దాయాదుల సమరం.. అండర్‌-19 ఆసియాకప్‌ ఫైనల్‌లో టాస్ గెలిచిన పాక్!

IND vs PAK | అండర్‌-19 ఆసియా కప్‌ క్రికెట్‌ టోర్నీలో అసలైన సమరానికి రంగం సిద్ధమైంది. చిరకాల ప్రత్యర్థులు భారత్‌, పాకిస్థాన్‌ జట్లు టైటిల్‌ కోసం తలపడుతున్నాయి. శనివారం జరుగుతున్న ఫైనల్లో టాస్‌ గెలిచిన పాకిస్థాన్‌ తొలుత బ్యాటింగ్‌ ఎంచుకుంది.

IND vs PAK | అండర్‌-19 ఆసియా కప్‌ క్రికెట్‌ టోర్నీలో అసలైన సమరానికి రంగం సిద్ధమైంది. చిరకాల ప్రత్యర్థులు భారత్‌, పాకిస్థాన్‌ జట్లు టైటిల్‌ కోసం తలపడుతున్నాయి. శనివారం జరుగుతున్న ఫైనల్లో టాస్‌ గెలిచిన పాకిస్థాన్‌ తొలుత బ్యాటింగ్‌ ఎంచుకుంది. రికార్డు స్థాయిలో తొమ్మిదో టైటిల్‌ను కైవసం చేసుకోవడంతో పాటు, గత ఎడిషన్‌ ఫైనల్లో, ఈ టోర్నీ లీగ్‌ దశలోనూ పాకిస్థాన్‌ చేతిలో ఎదురైన పరాజయాలకు బలమైన ప్రతీకారం తీర్చుకోవాలని యువ జట్టు కసిగా ఉంది. పాక్‌ను ఎదురించి ఆసియా కప్‌ను తిరిగి సొంతం చేసుకోవాలంటే భారత యువ బ్యాటర్‌ ఆర్యవీర్‌ సెహ్వాగ్‌, పేసర్‌ ఇషాన్‌ సూద్‌తో పాటు ఇతర ఆటగాళ్ల నుంచి మెరుగైన సహకారం అవసరం.

ఇషాన్‌ సూద్‌కు గాయం

ఈ కీలక పోరుకు ముందు భారత్‌కు ఎదురుదెబ్బ తగిలింది. జట్టులో అత్యధిక వికెట్లు తీసిన పేసర్‌ ఇషాన్‌ సూద్‌ వెన్నునొప్పి కారణంగా ఫైనల్‌కు దూరమయ్యాడు. అతడి స్థానంలో చిగురుపాటి వెంకట తుదిజట్టులోకి వచ్చాడు. ఇషాన్‌ ఈ టోర్నీలో నాలుగు మ్యాచ్‌ల్లో 11 వికెట్లు పడగొట్టి భారత బౌలింగ్‌ విభాగానికి కీలకంగా నిలిచాడు. అతడి గైర్హాజరీలో పేసర్లు, స్పిన్నర్లు సమష్టిగా రాణించాల్సిన అవసరం ఏర్పడింది.

ఆర్యవీర్‌పైనే ఆశలు

భారత మాజీ ఓపెనర్‌ వీరేంద్ర సెహ్వాగ్‌ కుమారుడు ఆర్యవీర్‌ సెహ్వాగ్‌ ఈ టోర్నీలో అద్భుతమైన ఫామ్‌లో ఉన్నాడు. మూడు వందలకుపైగా పరుగులు చేసి టోర్నీ టాప్‌ స్కోరర్‌గా కొనసాగుతున్నాడు. అతడు 70 నాటౌట్‌, 160, 51 పరుగులతో ఆకట్టుకున్నాడు. గత మ్యాచ్‌లో పాక్‌పై మాత్రం భారీ ఇన్నింగ్స్‌ ఆడలేకపోయాడు. ఫైనల్లో మరోసారి తన బ్యాట్‌ ఝళిపించాలని అభిమానులు ఆశిస్తున్నారు. మరోవైపు అర్జున్‌ రాజ్‌పుత్‌ కూడా భారత్‌కు కీలకం కానున్నాడు. పాకిస్థాన్‌తో గత మ్యాచ్‌లో భారత్‌ 22 పరుగులకే మూడు వికెట్లు కోల్పోయిన క్లిష్ట పరిస్థితుల్లో క్రీజులోకి వచ్చిన అతడు 85 బంతుల్లో 107 పరుగులతో అద్భుత ఇన్నింగ్స్‌ ఆడాడు. వీకే వినీత్‌ వరుసగా రెండు అర్ధశతకాలతో మంచి ఫామ్‌లో ఉన్నాడు. కెప్టెన్‌ లక్ష్య రాయ్‌చందానీ, అన్వయ్‌ ద్రవిడ్‌తో పాటు మిడిలార్డర్‌ బ్యాటర్లు కూడా ఫైనల్లో బాధ్యత తీసుకోవాల్సి ఉంది.

ముఖాముఖి పోరులో భారత్‌దే పైచేయి

ఇప్పటివరకు అండర్‌-19 స్థాయిలో భారత్‌, పాకిస్థాన్‌ జట్లు 31 మ్యాచ్‌ల్లో తలపడ్డాయి. ఇందులో భారత్‌ 17 విజయాలు సాధించగా, పాక్‌ 13 మ్యాచ్‌ల్లో గెలిచింది. ఒక మ్యాచ్‌ ఫలితం తేలలేదు. అయితే 2021 నుంచి జరిగిన ఏడు పోరుల్లో భారత్‌ కేవలం రెండింటిలోనే విజయం సాధించింది. ఈ టోర్నీ లీగ్‌ దశలోనూ పాక్‌ చేతిలో ఓడిన భారత జట్టు ఫైనల్లో గెలిచి టైటిల్‌ను దక్కించుకోవాలని చూస్తోంది.

భారత్‌ తుదిజట్టు: లక్ష్య రాజేశ్‌ రాయ్‌చందానీ (కెప్టెన్‌), ఆర్యవీర్‌ సెహ్వాగ్‌, వీకే వినీత్‌, యశ్‌బర్ధన్‌ చౌహాన్‌, అర్జున్‌ రాజ్‌పుత్‌, అన్వయ్‌ ద్రవిడ్‌ (వికెట్‌ కీపర్‌), మనాల్‌ చౌహాన్‌, మోహిత్‌ ఉల్వా, ఆర్యన్‌ సావ్‌సాని, కావ్య పటేల్‌, చిగురుపాటి వెంకట.

పాకిస్థాన్‌ తుదిజట్టు: ఉస్మాన్‌ ఖాన్‌, హయామ్‌ ఖాన్‌, అబ్దుల్‌ ఖాదిర్‌, ఫర్హాన్‌ యూసుఫ్‌ (కెప్టెన్‌), అహ్మద్‌ హుస్సేన్‌, అలీ రజా, హంజా జహూర్‌ (వికెట్‌ కీపర్‌), హస్నైన్‌ అబ్బాస్‌ దార్‌, మహమ్మద్‌ సయ్యమ్‌, రిజ్వానుల్లా, నిఖాబ్‌ షఫీక్‌.