Visit:
IND Vs SA | దక్షిణాఫ్రికాతో జరిగిన తొలి వన్డేల్లో టీమిండియా సీనియర్‌ ప్లేయర్లు రోహిత్ శర్మ, విరాట్‌ కోహ్లీ అద్భుతంగా బ్యాటింగ్‌ చేస్తున్నారు. దక్షిణాఫ్రికాపై భారత్‌కు ఈ ఇద్దరు బ్యాట్స్‌మెన్స్‌ రెండో వికెట్‌కు 50కిపైగా పరుగుల భాగస్వామ్యాన్ని నెలకొల్పారు. దక్షిణాఫ్రికాపై భారత్‌కు ఘనమైన ఆరంభాన్ని అందించారు. యశస్వి జైస్వాల్ రూపంలో భారత్‌కు ఆరంభంలోనే ఎదురుదెబ్బ తగిలినా.. రోకో జట్టును భారీ స్కోరు వైపు నడిపిస్తున్నారు. భారత్‌తో జరిగిన తొలి వన్డేలో దక్షిణాఫ్రికా టాస్ గెలిచి తొలుత బౌలింగ్ చేయాలని నిర్ణయించుకుంది. టాస్ గెలిచినా తాను తొలుత బౌలింగ్ చేసి ఉండేవారమని భారత కెప్టెన్ కేఎల్ రాహుల్ తెలిపాడు. యశస్వి జైస్వాల్‌ను అవుట్ చేసి నాంద్రే బర్గర్ షాక్‌ ఇచ్చాడు. యశస్వి బ్యాట్‌తో అలరించినా.. అదే ఊపును కొనసాగించలేకపోయాడు.
యశస్వి 16 బంతుల్లో రెండు ఫోర్లు, ఒక సిక్సర్‌ సహాయంతో 18 పరుగులు చేసి అవుట్ అయ్యాడు. దక్షిణాఫ్రికాపై కోహ్లీ, రోహిత్ దూకుడుగా ఆడారు. వీరిద్దరూ రెండో వికెట్‌కు హాఫ్ సెంచరీ భాగస్వామ్యాన్ని పూర్తి చేశారు. ఈ సమయంలో కోహ్లీ ఫుల్‌ ఫామ్‌లో కనిపించాడు. ఈ ఇద్దరూ వన్డేల్లో స్వదేశంలో 50ప్లస్‌ పరుగుల భాగస్వామ్యాన్ని నెలకొల్పడం ఇది 18వ సారి. రోహిత్-కోహ్లీ జంట 39 వన్డే ఇన్నింగ్స్‌లో 17 సార్లు 50+ పరుగుల భాగస్వామ్యాన్ని నెలకొల్పి.. మార్టిన్ గప్టిల్-కేన్ విలియమ్సన్‌ రికార్డును అధిగమించారు. వన్డేల్లో అత్యధిక భాగస్వామ్యాల రికార్డు కుమార్ సంగక్కర-మహేల జయవర్ధనే పేరిట ఉన్నది. వీరిద్దరు 57 ఇన్నింగ్స్‌లలో 24 సార్లు ఈ భాగస్వామ్యాన్ని చేశారు. ఇది రోహిత్-కోహ్లీ కలిసి 392వ ఇంటర్నేషనల్‌ మ్యాచ్‌. గతంలో ఎవరూ భారత్‌ తరఫున మరే జంట కలిసి ఇన్ని మ్యాచ్‌లు ఆడలేదు. రోహిత్-కోహ్లీ జోడీ.. సచిన్-రాహుల్ ద్రవిడ్ రికార్డును అధిగమించారు. సచిన్ టెండూల్కర్ – రాహుల్ ద్రవిడ్ 391 మ్యాచులు ఆడారు.
