బౌలింగ్‌కు గ్రీన్‌ లైట్‌

ఐపీఎల్‌-19లో కోల్‌కతా నైట్‌ రైడర్స్‌ (కేకేఆర్‌) రికార్డు ధరకు దక్కించుకున్నా బ్యాటింగ్‌లో దారుణంగా విఫలమవుతూ విమర్శల పాలవుతున్న ఆస్ట్రేలియా ఆల్‌రౌండర్‌ కామెరూన్‌ గ్రీన్‌ బౌలింగ్‌ చేసేందుకు క్రికెట్‌ ఆస్ట్రేలియా (సీఏ) నుంచి గ్రీన్‌ సిగ్నల్‌ అందినట్టు తెలుస్తున్నది.

కోల్‌కతా : ఐపీఎల్‌-19లో కోల్‌కతా నైట్‌ రైడర్స్‌ (కేకేఆర్‌) రికార్డు ధరకు దక్కించుకున్నా బ్యాటింగ్‌లో దారుణంగా విఫలమవుతూ విమర్శల పాలవుతున్న ఆస్ట్రేలియా ఆల్‌రౌండర్‌ కామెరూన్‌ గ్రీన్‌ బౌలింగ్‌ చేసేందుకు క్రికెట్‌ ఆస్ట్రేలియా (సీఏ) నుంచి గ్రీన్‌ సిగ్నల్‌ అందినట్టు తెలుస్తున్నది. ఈ సీజన్‌లో మూడు మ్యాచ్‌లు (24 రన్స్‌) ఆడి బ్యాటింగ్‌కే పరిమితమవుతున్న గ్రీన్‌.. బౌలింగ్‌ చేయకపోవడం, దానికి కోల్‌కతా సారథి రహానే స్పందిస్తూ ఆ ప్రశ్న సీఏను అడగాలని అనడంతో దీనిపై తీవ్రంగా చర్చ సాగింది.

ఇదిలాఉండగా నిరుడు వెన్ను నొప్పికి శస్త్రచికిత్స చేయించుకున్న గ్రీన్‌.. సీజన్‌ ఆరంభం నుంచి కనీసం రెండువారాలైనా బౌలింగ్‌కు దూరంగా ఉండాలని సీఏ సూచించిందట. ఈ విషయాన్ని కేకేఆర్‌కూ తెలిపిందట. నిర్ణీత గడువు ముగియడంతో నేడు (ఏప్రిల్‌ 9న) ఆ జట్టు లక్నోతో ఆడబోయే మ్యాచ్‌లో గ్రీన్‌ బౌలింగ్‌ చేసే అవకాశమున్నట్టు కేకేఆర్‌ వర్గాలు తెలిపాయి. గత మ్యాచ్‌కు దూరమైన సునీల్‌ నరైన్‌ కూడా లక్నోతో పోరుకు ఆడనున్నాడు.