Twitter | నిలిచిపోయిన ట్విట్ట‌ర్‌ కాపీరైట్ వ్య‌వ‌స్థ.. న‌చ్చిన‌ సినిమాలు అప్‌లోడ్ చేసిన యూజ‌ర్లు

అప్ర‌మ‌త్త‌మైన ట్విట్ట‌ర్ ఈ వీడియోలు ప్లే కావు అని డిస్‌ప్లేలో తెలిపింది

Twitter : సోష‌ల్‌మీడియా సంస్థ ట్విట్ట‌ర్ ఉద్యోగుల‌ తొల‌గింపు, ఉన్న‌త ఉద్యోగుల రాజీనామాల‌తో ఈమ‌ధ్య త‌ర‌చూ వార్త‌ల్లో ఉంటోంది. ఉద్యోగులను తొల‌గిస్తూ ఎల‌న్ మ‌స్క్ తీసుకున్న నిర్ణ‌యం ప్ర‌భావం ట్విట్ట‌ర్‌పై ప‌డింది. తాజాగా ట్విట్ట‌ర్‌లో కాపీరైట్ స్ట్రైక్ వ్య‌వ‌స్థ ప‌నిచేయ‌లేదు. దాంతో, యూజ‌ర్లు త‌మ‌కు న‌చ్చిన సినిమాలు, కార్టూన్, టీవీ వీడియోలను వరుస ట్వీట్లతో అప్‌లోడ్ చేశారు.

ఒక యూజ‌ర్ నీడ్ ఫ‌ర్ ప్పీడ్ సినిమాను 66 ట్వీట్ల‌లో అప్‌లోడ్ చేశాడు. మ‌రొక యూజ‌ర్ ‘స్పాంజ్‌బాబు స్క్వేర్‌పంట్స్’ ఎపిసోడ్ పెట్టాడు. ‘ది ఫాస్ట్ అండ్ ది ఫ్యూరియ‌స్ : టోక్యో డ్రిఫ్ట్’ సినిమాను రెండు నిమిషాల వీడియోగా 50 ట్వీట్ల‌లో అప్‌లోడ్ చేశాడు. దాంతో, ఆ సినిమాలు, టీవీ షోల కాపీరైట్ తీసుకున్న‌వాళ్లు ట్విట్ట‌ర్ నుంచి వాటిని తొల‌గించేందుకు నానా తిప్ప‌లు ప‌డుతున్నారు.

అయితే, వెంట‌నే అప్ర‌మ‌త్త‌మైన ట్విట్ట‌ర్ ఈ వీడియోలు ప్లే కావు అని డిస్‌ప్లేలో తెలిపింది. కాపీరైట్ స్క్రైక్ వ్య‌వ‌స్థ‌ను వెంట‌నే పున‌రుద్ధ‌రించ‌కుంటే అమెరికా డిజిట‌ల్ మిల్లీనియ‌మ్ కాపీరైట్‌ యాక్ట్ (డీఎంసీఏ) కింద ట్విట్ట‌ర్‌పై చ‌ర్య‌లు త‌ప్ప‌వు. ట్విట్ట‌ర్‌లో టెక్నిక‌ల్ స‌మ‌స్య‌ల్ని ప‌రిష్క‌రించ‌డానికి త‌క్కువ మంది ఉద్యోగులు ఉన్నారని ట్విట్ట‌ర్ మాజీ ఎగ్జిక్యూటివ్ ఒక‌రు తెలిపారు. ట్విట్ట‌ర్ పోయిన వారంలో 3,500 మంది ఉద్యోగుల‌ను ఇంటికి పంపించేసింది.