గూగుల్‌లో ఏం సెర్చ్ చేస్తే.. మొబైల్‌లో అవి యాడ్స్‌గా వ‌స్తున్నాయా? మీ డాటా రికార్డ్ కావొద్దంటే ఇలా చేయండి

మనం చేసే ప్ర‌తీది రికార్డు అవుతుంది

ఈ రోజుల్లో దాదాపు ప్ర‌తి ఒక్క‌రూ స్మార్ట్‌ఫోన్ వాడుతున్నారు.. అందులో జీమెయిల్‌తో లాగిన్ అయి గూగుల్ సేవ‌ల‌ను వినియోగించుకుంటున్నారు. కాబ‌ట్టి గూగుల్‌లో మ‌నం ఏం వెతికినా.. ఏం చేసినా ప్ర‌తిదీ రికార్డు అవుతుంది. దీనికి కార‌ణం గూగుల్‌లోని మై యాక్టివిటీ. ఇది మ‌న బ్రౌజింగ్ హిస్ట‌రీని ఎప్ప‌టిక‌ప్పుడు గ‌మ‌నిస్తూ ఉంటుంది. దీని ఆధారంగా ఆయా సంస్థ‌లు మ‌న ఆస‌క్తులకు త‌గ్గ‌ట్టుగా ప్ర‌క‌ట‌న‌లు ఇస్తుంటాయి.

గూగుల్‌లో ప‌ర్స‌న‌ల్ డేటా ఉండొద్దంటే ఏం చేయాలి

గూగుల్ సెర్చ్‌

గూగుల్‌లో మై యాక్టివిటీ లింక్‌పై క్లిక్ చేయ‌గానే.. గూగుల్ మై యాక్టివిటీ అనే విండో ఓపెన్ అవుతుంది. ఈ విండోపై భాగంలో సెర్చ్ బాక్స్ ఉంటుంది. దీనిద్వారా మ‌నం సెర్చ్ చేసిన వెబ్‌సైట్ల వివ‌రాలు తెలుసుకోవ‌చ్చు. అది కాకుండా దాని కింద‌నే తేదీల వారీగా మ‌నం ఓపెన్ చేసిన వెబ్‌సైట్ల వివ‌రాలు క‌నిపిస్తాయి. ఈ హిస్ట‌రీని ఎప్ప‌టిక‌ప్పుడు డిలీట్ చేసుకోవ‌డం మంచిది. మామూలుగా ఈ స‌మాచారాన్ని డిలీట్ చేసిన‌ప్పుడు క‌న్ఫ‌ర్మేష‌న్ అడుగుతుంది. అందుకు ఓకే నొక్కి డిలీట్ చేస్తే స‌రిపోతుంది.

యూట్యూబ్‌

కేవ‌లం వెబ్‌సైట్ల వివ‌రాలే కాదు.. మ‌నం యూట్యూబ్‌లో చూసే ప్ర‌తి వీడియోకు సంబంధించిన స‌మాచారాన్ని కూడా గూగుల్ రికార్డు చేస్తుంది. దీని ఆధారంగానే మ‌న‌కు కావాల్సిన వీడియోల‌ను స‌జెస్ట్ చేస్తూ ఉంటుంది. అయితే ఈ హిస్ట‌రీని కూడా ఈజీగానే డిలీట్ చేయొచ్చు. ఇందుకోసం యూట్యూబ్‌లోని హిస్ట‌రీ ఆప్ష‌న్‌లోకి వెళ్లాలి. ఆ త‌ర్వాత క్లియ‌ర్ ఆల్ సెర్చ్ హిస్ట‌రీ, క్లియ‌ర్ వాచ్ హిస్ట‌రీ ఆప్ష‌న్ల‌ను ఎంచుకోవాలి. మొత్తం హిస్ట‌రీ కాకుండా ఒక‌టి రెండు వీడియోల‌ను ఎంచుకుని కూడా వాటి స‌మాచారాన్ని డిలీట్ చేయ‌వ‌చ్చు.

యాడ్స్‌

గూగుల్‌లో మ‌నం సెర్చ్ చేసే ప్ర‌తి స‌మాచారాన్ని ఇత‌ర సంస్థ‌లు తెలుసుకుంటాయి. అందుకే మ‌న బ్రౌజింగ్ హిస్ట‌రీ ఆధారంగా యాడ్స్ డిస్‌ప్లే అవుతుంటాయి. అయితే ఈ ప్ర‌క‌ట‌న సంస్థ‌లు మ‌న డేటాను చూడకుండా చేయ‌వ‌చ్చు. ఇందుకోసం ముందుగా గూగుల్ అకౌంట్‌లోకి లాగిన్ అవ్వాలి. ఆ త‌ర్వాత ప్రైవ‌సీ విభాగంలోకి వెళ్లి యాడ్స్ సెట్టింగ్స్‌లోకి వెళ్లాలి. అక్క‌డ మేనేజ్ యాడ్ సెట్టింగ్స్‌ను ఎంచుకుని యాడ్ ప‌ర్స‌న‌లైజేష‌న్ ఆప్ష‌న్‌ను డీయాక్టివేట్ చేసుకోవాలి.

గూగుల్ మ్యాప్స్‌

మ‌నం ఏయే స‌మ‌యంలో ఏయే ప్రాంతాల‌కు వెళ్లామ‌నే ప్ర‌తి విష‌యాన్ని గూగుల్ మ్యాప్స్ యాప్ రికార్డు చేస్తూ ఉంటుంది. ఇందుకోసం గూగుల్ మ్యాప్స్‌లో టైమ్‌లైన్ అనే ఆప్ష‌న్ ఉంటుంది. ఇది మ‌నం వెళ్లే ప్ర‌తి లొకేష‌న్‌ను స్టోర్ చేసి పెడుతుంది. అయితే టైమ్‌లైన్ లింక్ తెరిచి గూగుల్ మ్యాప్స్ హిస్ట‌రీని మ‌నం డిలీట్ చేయొచ్చు. అలాగే లొకేష‌న్ ట్రాకింగ్‌ను కూడా ఆఫ్ చేయ‌వ‌చ్చు. మొత్తం హిస్ట‌రీ కాకుండా ఎంచుకున్న ఒక‌టి రెండు లొకేషన్ల డేటాను కూడా డిలీట్ చేసే అవ‌కాశం ఉంది.