‘స్కిల్స్‌’లో పాలిటెక్నిక్‌ల విలీనం సరికాదు

తెలంగాణలో పాలిటెక్నిక్‌ విద్య ప్రస్తుతం ఒక కీలక మలుపు వద్ద నిలిచింది. ప్రభుత్వం పాలిటెక్నిక్‌లు, స్టేట్‌ బోర్డ్‌ ఆఫ్‌ టెక్నికల్‌ ఎడ్యుకేషన్‌ అండ్‌ ట్రైనింగ్‌ (ఎస్‌బీటీఈటీ)ని యంగ్‌ ఇండియా సిల్స్‌ యూనివర్సిటీ (వైఐఎస్‌యూ)లో విలీనం చేయాలని జీవో 97లోని క్లాజ్‌ ఐబీ ద్వారా ప్రతిపాదిస్తున్నది.

తెలంగాణలో పాలిటెక్నిక్‌ విద్య ప్రస్తుతం ఒక కీలక మలుపు వద్ద నిలిచింది. ప్రభుత్వం పాలిటెక్నిక్‌లు, స్టేట్‌ బోర్డ్‌ ఆఫ్‌ టెక్నికల్‌ ఎడ్యుకేషన్‌ అండ్‌ ట్రైనింగ్‌ (ఎస్‌బీటీఈటీ)ని యంగ్‌ ఇండియా స్కిల్స్‌ యూనివర్సిటీ (వైఐఎస్‌యూ)లో విలీనం చేయాలని జీవో 97లోని క్లాజ్‌ ఐబీ ద్వారా ప్రతిపాదిస్తున్నది. ఈ నిర్ణయం విద్యార్థులు, అధ్యాపకులు, విద్యారంగ నిపుణుల్లో తీవ్ర ఆందోళన కలిగిస్తున్నది. ఇది కేవలం పరిపాలనా మార్పు కాదు…దాదాపు 70 ఏండ్ల వారసత్వం, చట్టబద్ధమైన హకులు, ఏఐసీటీఈ, ఎన్‌బీఏ గుర్తింపు పొందిన డిప్లొమా వ్యవస్థ, ప్రజా ఆస్తులు అన్నింటిపై ప్రభావం చూపే అంశం.

ఎస్‌బీటీఈటీ 1957 ఫిబ్రవరి 26న ఏర్పడింది. ఆ రోజుల్లోనే సాంకేతిక విద్య అభివృద్ధికి ప్రత్యేక బోర్డు అవసరమని గుర్తించి, జీవోఎంఎస్‌ నం.371 ద్వారా దీనిని ఏర్పాటు చేశారు. అప్పటినుంచి ఇప్పటివరకు ఎస్‌బీటీఈటీ డిప్లొమా స్థాయి సాంకేతిక విద్యకు మూలస్తంభంగా నిలిచింది. ఎస్‌బీటీఈటీకి తెలంగాణ విద్యా చట్టం, 1982 సెక్షన్‌ 6 కింద స్పష్టమైన చట్టబద్ధ హోదా ఉన్నది. ఈ సెక్షన్‌ ప్రకారం బోర్డు విధులుడిగ్రీ స్థాయికి దిగువ సాంకేతిక విద్య అభివృద్ధికి సలహా ఇవ్వడం, సంస్థలకు అనుబంధం కల్పించడం, పాఠ్యప్రణాళిక నిర్ణయించడం, తనిఖీలు నిర్వహించడం, ఏఐసీటీఈ ప్రమాణాలకు అనుగుణంగా పరీక్షలు నిర్వహించి డిప్లొమాలు జారీ చేస్తుంది. ఈ చట్టం కిందే విద్యార్థులు డిప్లొమా గుర్తింపు, ప్రమాణాలు, భవిష్యత్తు అవకాశాలపై రక్షణ పొందుతున్నారు. ఈ వ్యవస్థను మార్చేటప్పుడు ఈ చట్టబద్ధ హకులను కాపాడకపోతే విద్యార్థులు నష్టపోతారు.

యంగ్‌ ఇండియా స్కిల్స్‌ వర్సిటీ (వైఐఎస్‌యూ) 2024లో పబ్లిక్‌-ప్రైవేట్‌ భాగస్వామ్య (పీపీపీ) నమూనాలో ఏర్పాటైన కొత్త సంస్థ. దీని లక్ష్యం స్వల్పకాలిక సిల్‌ కోర్సుల ద్వారా ఉపాధి అవకాశాలు కల్పించడం. దీనికి ఇప్పటివరకు ఎన్‌బీఏ/ఎన్‌ఏఏసీ వంటి జాతీయ అక్రిడిటేషన్‌ లేదు. ప్రస్తుతం పాలిటెక్నిక్‌లు, ఎస్‌బీటీఈటీ అండ్‌ తెలంగాణ విద్యా చట్టం, 1982 (సెక్షన్‌ 6) కింద పనిచేస్తున్నాయి. ఈ చట్టం డిప్లొమా విద్యకు చట్టబద్ధమైన రక్షణ, గుర్తింపు, ప్రమాణాలు కల్పిస్తున్నది. పాలిటెక్నిక్‌లను ఈ చట్టం నుంచి తొలగించి వైఐఎస్‌యూలో విలీనం చేస్తే కింది పరిణామాలు ఎదురవుతాయి.

• పాలిటెక్నిక్‌ కళాశాలలు చట్టబద్ధ రక్షణ కోల్పోతాయి: 1982 విద్యా చట్టం సెక్షన్‌ 6 కింద ఎస్‌బీటీఈటీకి ఉన్న అధికారాలు (అనుబంధ, పాఠ్య ప్రణాళిక పరీక్షలు, డిప్లొమా జారీ) ఇక వర్తించవు. విద్యార్థులు ప్రస్తుతం అనుభవిస్తున్న చట్టబద్ధ హకులు, రక్షణలు బలహీనపడతాయి లేదా కనుమరుగవుతాయి.
• డిప్లొమా గుర్తింపుపై అనిశ్చితి: ప్రస్తుతం ఏఐసీటీఈ ప్రమాణాలకు అనుగుణంగా ఎస్‌బీటీఈటీ జారీ చేసే డిప్లొమాలు విస్తృత గుర్తింపు కలిగి ఉన్నాయి. వైఐఎస్‌యూ కిందకు వెళ్లిన తర్వాత డిప్లొమా సర్టిఫికెట్‌ల స్వభావం, గుర్తింపు, విలువ మారే అవకాశం ఉన్నది. ఈసీఈటీ ద్వా రా ఇంజినీరింగ్‌లో లేటరల్‌ ఎంట్రీ అవకాశాలు ప్రభావితం కావచ్చు.
• ప్రజా ఆస్తులు పీపీపీ సంస్థలోకి వెళ్లే ప్రమాదం: యంగ్‌ ఇండియా సిల్స్‌ యూనివర్సిటీ యాక్ట్‌, 2024 ప్రకారం వైఐఎస్‌యూ పబ్లిక్‌-ప్రైవేట్‌ భాగస్వామ్య (పీపీపీ) సంస్థ. పాలిటెక్నిక్‌లు విలీనం అయితే వాటి భూములు, భవనాలు, ల్యాబ్‌లు, పరికరాలు వంటి ప్రజా ఆస్తులు పీపీపీ యూనివర్సిటీ భాగంగా మారుతాయి. ఇది ప్రజాప్రయోజనాలకు వ్యతిరేకం.
• నాణ్యతా ప్రమాణాలు దెబ్బతినే అవకాశం: చాలా ప్రభుత్వ పాలిటెక్నిక్‌లకు ఎన్‌బీఏ గుర్తింపు ఉన్నది. వైఐఎస్‌యూకు ప్రస్తుతం ఎన్‌బీఏ/ఎన్‌ఏఏసీ వంటి అక్రిడిటేషన్‌ లేదు. ఎన్‌బీఏ గుర్తింపు పొందిన సంస్థలను అక్రిడిటేషన్‌ లేని వ్యవస్థలోకి మార్చడం వల్ల నాణ్యతా ప్రమాణాలు తగ్గే ప్రమాదం ఉన్నది.
• విద్యార్థులు, అధ్యాపకులపై ప్రభావం: ఫీజు నిర్మాణం, పరీక్షా వ్యవస్థ, సర్టిఫికెట్‌ విలువ, ఉన్నత విద్య అవకాశాలు అనిశ్చితిలో పడతాయి.
• సంస్థాగత స్వభావం మారిపోతుంది: ఇప్పుడు పాలిటెక్నిక్‌లు రెగ్యులేటరీ బోర్డు (ఎస్‌బీటీఈటీ) నియంత్రణలో ఉన్నాయి. విలీనం తర్వాత అవి పీపీపీ యూనివర్సిటీలో భాగమవుతాయి. దీనివల్ల విద్యా ప్రమాణా లు, పరీక్షా వ్యవస్థ, నిర్వహణ పూర్తిగా మారిపోయే అవకాశం ఉన్నది.
• ప్రత్యామ్నాయం:ఎస్‌బీటీఈటీని, పాలిటెక్నిక్‌లను వైఐఎస్‌యూలో విలీనం చేయాల్సిన అవసరం లేదు. రెండు సంస్థల మధ్య సమన్వయం, సహకారం చేయవచ్చు. ఎస్‌బీటీఈటీ స్వతంత్రత, చట్టబద్ధ హోదా, ప్రజా ఆస్తులు కాపాడుకుంటూ ఇండస్ట్రీ లింకేజీని ఎస్‌డీసీఎస్‌ (స్కిల్‌ డెవలప్‌మెంట్‌ సెంటర్‌, టీఏఎస్‌కే వంటి ద్వారా బలోపేతం చేయవచ్చు).
• చేయాల్సింది ఇదీ: జీవో 97లోని పాలిటెక్నిక్‌ కాలేజీలకు సంబంధించిన క్లాజ్‌ (ఐవీ) తొలగించి, పాలిటెక్నిక్‌లను తెలంగాణ విద్యా చట్టం 1982 ఫ్రేమ్‌ వర్‌లో, ఎస్‌బీటీఈటీని అలాగే ఉంచాలి. ఉద్యోగులను డిపార్ట్మెంట్‌ ఆఫ్‌ టెక్నికల్‌ ఎడ్యుకేషన్‌లోనే కొనసాగించాలి.

పెద్దపల్లి నర్సింహులు
9989548385