న్యూయార్క్ : క్రెడిట్ కార్డు బిల్లులు చెల్లిస్తూ అమెరికాకు చెందిన వైద్యుడు అనికీవ్ ఏకంగా రూ 2.17 కోట్లు పైగా క్యాష్ బ్యాక్ ద్వారా సంపాదించాడు. 2009లో క్రెడిట్ కార్డు చెల్లింపుల ద్వారా సంపాదించడాన్ని హాబీగా మొదలుపెట్టిన అనికీవ్ కు ఆ తర్వాత ఇది ప్రొఫెషన్ గా మారింది. ఆపై దీని ద్వారా అతడు మిలియన్లు సంపాదించాడు. పెద్ద సంఖ్యలో గిఫ్ట్ కార్డులను కొనుగోలు చేసేందుకు అనికీవ్ తన క్రెడిట్ కార్డును ఉపయోగించేవాడు.
ఆపై వాటిని నగదుగా మార్చుకుని తన బ్యాంకు ఖాతాలో డిపాజిట్ చేసుకుని క్రెడిట్ కార్డు బిల్లులు చెల్లించేవాడు. ఈ చెల్లింపులతో అతడికి క్రెడిట్ కార్డు కంపెనీ నుంచి రివార్డు అందేది. క్రెడిట్ కార్డు బిల్లుల చెల్లింపుల నుంచి వచ్చే రివార్డులు అతడికి ఆదాయ వనరుగా మారాయి. ఎక్కువ డబ్బు సంపాదించేందుకు ఈ ప్రక్రియను అనికీవ్ పలుమార్లు రిపీట్ చేసేవాడు. ఉదాహరణకు అనికీవ్ 500 డాలర్ల గిఫ్ట్ కార్డు కొనుగోలుపై 25 డాలర్ల రివార్డును పొందేవాడు. దీనిలో ఆరు డాలర్లు ఫీజు కింద పోగా 19 డాలర్లు మిగిలేవి.
ఏండ్ల తరబడి ఈ ట్రిక్ ప్రయోగించడం ద్వారా అతడు 3 లక్షల డాలర్లు (రూ 2.17 కోట్లు) పోగుచేశాడు. అనికీవ్ ఆదాయం ఇబ్బడిముబ్బడిగా పెరగడం గుర్తించి కొందరు అమెరికన్ ట్యాక్స్ డిపార్ట్ మెంట్ కు సమాచారం అందించగా దర్యాప్తు చేపట్టిన అధికారులు వ్యవహారాన్ని న్యాయస్ధానం ముందుకు తీసుకువచ్చారు. అయితే క్యాష్ బ్యాక్ లు, రివార్డులు తన ఆదాయం కాదని ఇవి క్రెడిట్ కార్డు కంపెనీలు తనకు బహుకరించాయని ఆయన వాదించాడు. ఇవి ఆస్తులు కాదని తేల్చిచెప్పిన న్యాయస్థానం వీటిని నగదుగా మార్చుకుంటే మాత్రం పన్నులు చెల్లించాలని తేల్చిచెప్పింది. దీంతో అనికీవ్ నుంచి పన్నులు వసూలు చేసేందుకు అధికారులు సన్నద్ధమయ్యారు.