నింబాచలానికి బ్రహ్మోత్సవ శోభ

గౌతమీ (గోదావరి) నదికి దక్షిణ దిశగా రెండు యోజనాల దూరంలో ఉన్న శ్రీ లక్ష్మీనారసింహుడి దివ్యక్షేత్రం నింబాచలంగా విలసిల్లుతున్నది. దట్టమైన వేప చెట్లతో నిండి ఉండడంతో ఈ గుట్టకు నింబాచలంగా పేరు వచ్చినట్లు చరిత్ర. భీమ్‌గల్‌ మండల పరిధిలోని ఈ పుణ్యక్షేత్రం కాలక్రమేణా లింబాద్రిగుట్టగా ప్రసిద్ధి చెందింది.

• భక్తుల కొంగు బంగారం లక్ష్మీనారసింహుడు
• నేటి నుంచి లింబాద్రిగుట్ట బ్రహ్మోత్సవాలు

భీమ్‌గల్‌, నవంబర్‌ 17 : గౌతమీ (గోదావరి) నదికి దక్షిణ దిశగా రెండు యోజనాల దూరంలో ఉన్న శ్రీ లక్ష్మీనారసింహుడి దివ్యక్షేత్రం నింబాచలంగా విలసిల్లుతున్నది. దట్టమైన వేప చెట్లతో నిండి ఉండడంతో ఈ గుట్టకు నింబాచలంగా పేరు వచ్చినట్లు చరిత్ర. భీమ్‌గల్‌ మండల పరిధిలోని ఈ పుణ్యక్షేత్రం కాలక్రమేణా లింబాద్రిగుట్టగా ప్రసిద్ధి చెందింది. భక్తుల కొంగుబంగారంగా అలరారుతున్న స్వామివారి బ్రహోత్సవాలు నేటి (శనివారం) నుంచి ప్రారంభం కానున్నాయి. ఏటా కార్తీక మాసంలో నిర్వహించే ఈ వేడుకల కోసం ఆలయ నిర్వాహకులు అన్ని ఏర్పాట్లు చేశారు. స్వామి వారి నిత్య కైంకర్యాలతోపాటు బ్రహ్మోత్సవాలను నంబి వంశస్థులు నిర్వహించడం ఆనవాయితీ. ఆలయ ధర్మకర్తగా నంబి లింబాద్రి వ్యవహరిస్తున్నారు.

కమల పుష్కరిణి..

కొండపై ఉన్న కమల పుష్కరిణి పూర్తిగా రాతి కట్టడంతో సుందరంగా ఉంటుంది. ఇందులోని నీటిని స్వామివారి పూజా కార్యక్రమాలకు మాత్రమే వినియోగిస్తారు. ఏటా బ్రహ్మోత్సవాల సందర్భంగా కమల పుష్కరిణిలో చక్రస్నానం వేడుకను వైభవంగా నిర్వహిస్తారు.

మంత్రి వేముల చొరవతో అభివృద్ధి..

బ్రహ్మోత్సవాల సందర్భంగా ఉత్సవమూర్తులను గతంలో చెక్క రథంపై ఊరేగించేవారు. అది శిథిలావస్థకు చేరడంతో దాని స్థానంలో ఇనుప రథాన్ని చేయించారు. గతంలో కొండకు రావడానికి రవాణా సౌకర్యం అంతంత మాత్రంగానే ఉండేది. మంత్రి వేముల ప్రశాంత్‌రెడ్డి ప్రత్యేక చొరవతో సౌకర్యాలు మెరుగుపడ్డాయి. రూ. 2కోట్ల 60లక్షలతో కొండపైకి నాలుగు వరుసల రోడ్డు, సెంట్రింగ్‌ లైటింగ్‌, గిరి ప్రదక్షిణ కోసం ప్రత్యేకంగా రోడ్డును నిర్మించారు. దీంతో భక్తులకు సౌకర్యవంతంగా మారడంతోపాటు గుట్ట ప్రాంతం మరింత సుందరంగా మారింది. భక్తులు కేవలం జాతర సమయంలోనే పెద్ద సంఖ్యలో తరలివచ్చేవారు. ప్రస్తుతం ప్రతి శని, ఆదివారాల్లో భక్తుల తాకిడి పెరిగింది.

గ్రామదేవతలకు సారె..

బ్రహ్మోత్సవాల్లో భాగంగా స్వామివారి తరఫున గ్రామదేవతలకు శుక్రవారం ఆలయ అర్చకులు సారెను సమర్పించారు. మేళ తాళాలతో వెళ్లి పెద్దగంటి ఎల్లమ్మ, పోచమ్మకు సారెను అందించారు.

రోజువారీ కార్యక్రమాలు

18న కొండపైకి ఉత్సవ మూర్తుల పయనం

19న దీపారాధన, రక్షాబంధనం, విష్ణు పంచకం, అంకురార్పన, మృత్యుసంగ్రహణం, అంకురార్పనం, గరుడ పటాధివాసం, ధ్వజారోహణం, శ్రవణ ప్రయుక్త క్షీరాభిషేకం

20న నృసంహ ఏకాక్షరి హవనం

21న సాయంత్రం 5గంటలకు శ్రీవారి ఎదుర్కోలు

22న మధ్యాహ్నం 12.30 గంటలకు స్వామివారి కల్యాణం

23న సర్వేషాం ఏకాదశి, చాతుర్మాస్య వ్రత సమాప్తి, నృసింహ ఏకాక్షర హవనం, గీతా హవనం, గరుడ సేవ

24న ఉత్థాన ద్వాదశి, తులసి వివాహం, కొండ ప్రదక్షిణ

25న వైకుంఠ చరుర్థి, ధాత్రిమూలే నృసింహ పూజ, ధాత్రి హవనం, డోలారోహనణం

26న చతుర్ధశి ఉపరి పూర్ణిమ, జాతర, రథోత్సవం

27న శేషహోమం, స్నపన తిరుమంజనం, భాగవత ఫలశృతి, పూర్ణాహుతి, పుష్పయాగం

28న దేవతోద్వాసనం, ధ్వజారోహణం, ఉద్వాసన బలిప్రదానం, కొండబలి, డోలోత్సవం, గ్రామాలయానికి ఉత్సవ మూర్తుల పయనం