మహిళ..విజయ స్వరూపిణి

త్వరలోనే ఓ సాధ్వీమణి శతజయంతి వేడుకలు ప్రారంభం కానున్నాయి. ఒక సాధారణ మహిళ ఆధ్యాత్మిక ప్రపంచంలో అడుగుపెట్టి.. తన బోధనలతో వేలమంది జీవితాలను ప్రభావితం చేయడం అరుదైన విషయం. శ్రీమాతాజీగా సుప్రసిద్ధురాలైన నిర్మలాదేవి 1923 మార్చి 21న మధ్యప్రదేశ్‌లో జన్మించారు. విద్యార్థి దశలో స్వాతంత్య్ర పోరాటంలో పాల్గొన్నారు. మనిషికి ఎందుకిన్ని కష్టాలు? పరిపూర్ణ ఆనందానికి మార్గమే లేదా? అనే ఆలోచన నిర్మలాజీని నిత్యం వేధించేది. సహజానంద స్థితే లక్ష్యంగా.. 1970లో ‘సహజ యోగ’ పేరుతో ధ్యాన విధానాన్ని అందుబాటులోకి తెచ్చారు. ఆమె 2011 ఫిబ్రవరి 23న కైవల్యం పొందారు. స్త్రీ ఔన్నత్యం గురించి నిర్మలాజీ ఆణిముత్యాల్లాంటి మాటలు చెప్పారు.

• మహిళలు సంతోషంగా ఉండాలి. ప్రపంచంలో ఆనందం, విశ్వాసం, ప్రేమ, ఆప్యాయత, దయ, సౌమ్యతకు ఆధారం స్త్రీలే.
• ఆత్మ ఒక్కటే. స్త్రీ, పురుషులుగా రెండు రూపాలలో కనిపిస్తుంది. దీపం ఏ రంగులో ఉన్నా ఇచ్చే కాంతి ఒకేలా ఉంటుంది కదా!
• స్త్రీ భూదేవి లాంటిది. భూమాత తన శక్తితో ఎంతో భారాన్ని తట్టుకోగలుగుతున్నది. జీవులకు అవసరమైన పండ్లు, పూలను అందిస్తున్నది. స్త్రీలు పృథ్వీ తత్వం కలిగినవారు. వారికి చాలా శక్తి ఉంటుంది. ఎన్నో విషయాలను అలవోకగా గ్రహించగలరు. అపారమైన ప్రేమను కురిపించగలరు. దేవుడు అంతటి ఓర్పును ఇచ్చాడు.
• స్త్రీ శక్తి మహాసముద్రం లాంటిది. పురుషుడు తనకు అవసరమైన మనోబలాన్ని స్త్రీ నుంచి మాత్రమే పొందగలడు.
• స్త్రీ, పురుషులను సృష్టించింది దేవుడే. ఇద్దరినీ ఒకేలా సృష్టించాలని అనుకుని ఉంటే అలానే చేసేవాడు. కానీ ఆయన ఆలోచన అది కాదు. కాబట్టి దయ, గౌరవం, సహనం ఆమెకు సహజ భూషణాలుగా ఉండాలి.
• స్త్రీ స్థానం అత్యున్నతమైంది. ఎప్పుడూ ఆమె ఇవ్వాల్సిన స్థానంలో ఉండాలి. ప్రేమను పంచాలి. నలుగురికీ సేవలు అందించాలి. ఎందుకంటే ప్రధానమంత్రి కంటే, రాజు కంటే కూడా మహిళ బాధ్యతలే ఎక్కువ.