US Senators on Debt Raise | వచ్చే డిసెంబర్ వరకు రుణాల పరిమితిని మరో 480 బిలియన్ల డాలర్లకు పెంచుకునేందుకు ట్రేజరీ డిపార్ట్మెంట్కు అనుమతినిస్తూ అమెరికా సెనెట్లో అధికార డెమొక్రాట్లు, రిపబ్లికన్లు అంగీకారానికి వచ్చారు. ఈ నెలాఖరులోగా డిఫాల్ట్ సమస్యను ఎదుర్కొనే పరిస్థితిని నివారించేందుకు ఈ నిర్ణయం తీసుకున్నట్లు తెలుస్తోంది.
ఈ సంగతిని సెనెట్ మెజారిటీ లీడర్ చుక్ స్కుమర్ గురువారం వెల్లడించారు. రుణ పరపతిపై సీలింగ్ పొడిగించడానికి ఈ ఒప్పందానికి వచ్చామన్నారు. శుక్రవారం లోగా అమెరికా సెనెట్ దీనికి ఆమోదం తెలుపుతుందని భావిస్తున్నారు.
ప్రస్తుతం 28.4 ట్రిలియన్ల డాలర్ల వరకు మాత్రమే రుణాల సేకరణకు అధికారం ఉంది. ఈ నేపథ్యంలో రుణ పరిమితిని పెంచేందుకు చేసిన తీర్మానానికి సెనెట్, చట్టసభ ప్రతినిధుల సభ ఆమోదం తెలిపితే అమెరికా రుణ పరిమితి 28.9 ట్రిలియన్ డాలర్లకు పెరుగుతుందని సెనెట్ వర్గాలు చెప్పాయి. 2022 చివరిలోగా రుణ పరిమితి పెంచడానికి డెమొక్రాట్లు చేసిన ప్రయత్నాన్ని రిపబ్లికన్లు అడ్డుకున్నారు.