Visit:
NTR | ‘నా అభిప్రాయాలు నా పిల్లలపై రుద్దను. అలా చేయడం కూడా సబబు కాదు. ఇప్పుడున్న రోజుల్లో ఎవరి ఆలోచనలు వారికుంటున్నాయి. వాళ్ల కెరీర్‌ గురించి వాళ్లు ఆలోచించుకునే వాతావరణాన్ని మనం కల్పించాలి. అంతే తప్ప.. ఇది చెయ్‌.. అది చెయ్‌.. అంటూ వాళ్ల ఆలోచనలకు అడ్డు చెప్పకూడదు’ అంటున్నారు ఎన్టీఆర్‌. ఆయన కథానాయకుడిగా నటించిన ‘దేవర’ చిత్రం విజయవంతంగా ప్రదర్శింపబడుతున్న విషయం తెలిసిందే. ఈ సినిమా ప్రమోషన్లో భాగంగా ఇటీవల ఎన్టీఆర్‌ అమెరికా లాస్‌ ఎంజెలిస్‌ వెళ్లారు. అక్కడి మీడియా సమావేశంలో తన కుమారుల గురించి, వారి భవిష్యత్‌ గురించి తారక్‌ మాట్లాడారు.
‘అభయ్‌, భార్గవ్‌ ఇద్దరి మధ్య ఎంతో వ్యత్యాసం ఉంది. వయసు పరంగా వాళ్లు చాలా చిన్నపిల్లలు. ప్రస్తుతం చదువుకుంటున్నారు. భవిష్యత్‌లో కూడా వాళ్లను ‘సినిమాల్లోకి రండి.. యాక్టింగ్‌ నేర్చుకోండి..’ అని బలవంతపెట్టను. నాకు ప్రేరణ నా తల్లిదండ్రులే. వాళ్లెప్పుడు నన్ను ఆ విధంగా ట్రీట్‌ చేయలేదు. ‘వాడేదో సాధించాలనుకుంటున్నాడు.. చేయనీ..’ అని నా మానన నన్ను వదిలేశారు. నేనూ నా పిల్లల విషయంలో అలాగే ఉంటా. అయితే.. నా వృత్తి గురించి నా పిల్లలకు తెలుసు. నన్ను వాళ్లు నటుడిగా చూస్తున్నారు. భవిష్యత్తులో వాళ్ల నాన్నలాగే వాళ్లూ హీరోలం కావాలని కోరుకుంటారు. అది ఎలాగూ జరుగుతుంది.’ అంటూ చెప్పుకొచ్చారు తారక్‌.
