మున్సిప‌ల్‌లో షాడో చైర్మ‌న్‌?

ప్రముఖ వ్యాపారిగా, ఆధ్యాత్మికవేత్తగా గుర్తింపు పొందిన ఓ వ్యాపారి.. మొన్నటి మున్సిపల్‌ ఎన్నికల్లో ఉమ్మడి జిల్లాలోని ఓ బల్దియా నుంచి అధికార పార్టీ అభ్యర్థిగా దిగాడు. అనూహ్య పరిణామాల మధ్యన క్రాస్‌ ఓటింగ్‌తో చైర్మన్‌ పదవిని దక్కించుకున్నాడు.

• తండ్రి అధికారాన్ని అడ్డుపెట్టుకొని బల్దియాలో హల్‌చల్‌
• తనకు తెలియకుండా ఏ ఫైలూ కదలొద్దని హుకుం
• విసిగిపోతున్న అధికారులు, సిబ్బంది
• ఇదేం పద్ధతి అంటున్న మెజార్టీ కౌన్సిలర్లు!

జగిత్యాల, నవంబర్‌ 11 (నమస్తే తెలంగాణ) : ప్రముఖ వ్యాపారిగా, ఆధ్యాత్మికవేత్తగా గుర్తింపు పొందిన ఓ వ్యాపారి.. మొన్నటి మున్సిపల్‌ ఎన్నికల్లో ఉమ్మడి జిల్లాలోని ఓ బల్దియా నుంచి అధికార పార్టీ అభ్యర్థిగా దిగాడు. అనూహ్య పరిణామాల మధ్యన క్రాస్‌ ఓటింగ్‌తో చైర్మన్‌ పదవిని దక్కించుకున్నాడు. అయితే, ఆయన నిత్యం తన వ్యాపార కార్యకలాపాల్లో మునిగితేలుతుండగా, ఆయన కొడుకు అధికారం చెలాయిస్తూ.. సదరు మున్సిపాలిటీలో షాడో చైర్మన్‌గా హవా సాగిస్తున్నట్టు తెలుస్తున్నది. అక్కడ ఏ పనులు చేయాలన్నా ముందుగా ఆమోద ముద్ర వేయించుకోవాలని, కార్యాలయానికి వచ్చినప్పుడు నిలబడి సెల్యూట్‌ చేయాల్సిందేనని, లేదంటే ఆయన ఆగ్రహానికి గురికావాల్సిందేనని తెలిసింది. మున్సిపల్‌ పరిధిలో ఎక్కడ ఏ భవన నిర్మాణం పర్మిషన్‌ కోసం ఫైలు వచ్చినా, మరెక్కడ నిర్మాణం కొనసాగుతున్నా టౌన్‌ ప్లానింగ్‌ అధికారులు కచ్చితంగా సమాచారం ఇవ్వాల్సిందే! భవన నిర్మాణదారు ముందుగా సదరు షాడో చైర్మన్‌ను కలిసి ప్రసన్నం చేసుకుంటే సరి.. లేదంటే తన అనుయాయులతో గానీ, మరెవరితోనైనా ఫిర్యాదు చేయించడం, ఆ వెంటనే అధికారులతో నిర్మాణ పనులు ఆపించడం పరిపాటిగా మారినట్టు తెలుస్తున్నది.

తర్వాత నిర్మాణదారులు సదరు షాడో చైర్మన్‌ను కలిసి అడిగినంత ముట్టజెప్పితేనే తిరిగి తన నిర్మాణం పూర్తి చేసుకోగలుగుతున్నారని తెలిసింది. రోడ్లు, ప్రభుత్వ భవనాలు, మురుగు కాలువలు, ఇతర అభివృద్ధి పనులు దక్కించుకునే కాంట్రాక్టర్లు తక్కువలో తక్కువ ఆరు శాతం కమీషన్‌ చెల్లించాల్సిందేనన్న ప్రచారం జరుగుతున్నది. ఆ పట్టణంలోని 8వ వార్డులో నిబంధనలకు విరుద్ధంగా కడుతున్న ఓ భవనానికి సంబంధించి రూ.2 లక్షలు వసూలు చేసినట్టు ఆరోపణలు వచ్చాయి. అయితే, పూర్తిగా నిబంధనలను విస్మరిస్తున్నారన్న ఫిర్యాదులతో మున్సిపల్‌ అధికారులు వెళ్లి పరిశీలించారు. తనకు కమీషన్‌ ఇచ్చిన వ్యక్తి నిర్మాణం వద్దకు అధికారులు వెళ్లడాన్ని షాడో చైర్మన్‌ సీరియస్‌గా తీసుకొని, తన అనుచరులతో బూతులు తిట్టించి బెదిరింపులకు పాల్పడినట్టు తెలిసింది. అలాగే, ప్రభుత్వ స్థలానికి ఆనుకొని ఉన్న ఓ స్థలంలో ఇంటి నిర్మాణం చేపట్టిన ఓ యజమానిని ఫిర్యాదుల పేరిట వేధించి, రూ.3 లక్షలు వసూలు చేసినట్టు ప్రచారం జరుగుతున్నది.

ఓ ప్రైవేట్‌ స్కూల్‌ ఆవరణలో నిర్మిస్తున్న భవనానికి సంబంధించిన విషయంలోనూ లిటిగేషన్‌ పెట్టి, టౌన్‌ ప్లానింగ్‌ అధికారులను పంపి, ఆ తర్వాత బేరం గురించి వారినే ప్రయోగించి, రూ.ఐదు లక్షలకు సెటిల్మెంట్‌ చేసుకున్నట్టు తెలిసింది. ఇలా షాడో చైర్మన్‌ ఆగడాలతో మెజార్టీ కౌన్సిలర్లు తీవ్ర అసంతృప్తి వ్యక్తం చేస్తున్నట్టు తెలిసింది. కొందరు కౌన్సిలర్లను తన గుప్పిట్లో పెట్టుకొని, మిగతా కౌన్సిలర్లకు కనీస ప్రాధాన్యత ఇవ్వడం లేదని, ఏకపక్షంగా మున్సిపల్‌ ఎజెండా రూపొందిస్తున్నారని, నిధుల కేటాయింపులో వివక్ష చూపుతున్నారని వారు అంతర్గతంగా రగిలిపోతున్నట్టు సమాచారం. చైర్మన్‌ పదవి అధికార పార్టీదే అయినప్పటికీ.. స్వపక్ష కౌన్సిలర్లలో కొందరికి ఏ మాత్రం ప్రాధాన్యత ఇవ్వకపోవడాన్ని వారు తీవ్రంగా నిరసిస్తున్నారు. ఇక ప్రతిపక్షాలైన బీఆర్‌ఎస్‌, బీజేపీ కౌన్సిలర్లు కూడా తీవ్ర అసహనంతో రగిలిపోతున్నారు. అధికార పక్షానికి చెందిన వైస్‌ చైర్మన్‌తోపాటు కాంగ్రెస్‌, బీఆర్‌ఎస్‌, బీజేపీకి చెందిన మొత్తం 22 మంది కౌన్సిలర్లు ఇటీవల తమ అసంతృప్తిని బాహాటంగానే వ్యక్తం చేశారు. గత నెల 29న కౌన్సిల్‌ సమావేశాన్ని వాకౌట్‌ చేశారు. కోరం లేక వాయిదా వేసిన అధికారులు మరుసటి రోజు సాధారణ సమావేశం ఏర్పాటు చేసి, కౌన్సిలర్లను ఆహ్వానించినా అసంతృప్తి మాత్రం తగ్గలేదు. దీంతో వరుసగా రెండోసారి సమావేశాన్ని వాయిదా వేయడం చర్చనీయాంశమైంది.

పదవి తండ్రిది.. పెత్తనం కొడుకుది

అది కరీంనగర్‌ ఉమ్మడి జిల్లాకు చెందిన ఓ మున్సిపాలిటీ.. మరో ఉమ్మడి జిల్లాకు సమీపంలో ఉంటుంది.. ఆ మున్సిపల్‌లో షాడో చైర్మన్‌దే హవా నడుస్తున్నది. చైర్మన్‌ గిరి తండ్రిదే అయినా, అంతా కొడుకుదే పెత్తనం సాగుతున్నది. ప్రజాప్రతినిధిగా, పట్టణ తొలి పౌరుడిగా ప్రజా సమస్యలకు పరిష్కారం చూపి పట్టణాన్ని అభివృద్ధిలో నడిపించాల్సిన తండ్రి.. ప్రముఖ వ్యాపారిగా, ఆధ్యాత్మికవేత్తగా బిజీగా ఉండగా.. కొడుకు అధికారం చెలాయిస్తున్నట్టు తెలుస్తున్నది. తండ్రి అధికారాన్ని అడ్డుపెట్టుకొని సెటిల్మెంట్లు, పర్సంటేజీలు, అక్రమ వసూళ్లతో హడలెత్తిస్తున్నట్టు తెలిసింది. మున్సిపల్‌లో ఏ పని జరగాలన్నా, మరే ఫైలు ముందుకు కదలాలన్నా.. తన నోటీస్‌లో పెట్టాలని, లేదంటే పరిణామాలు వేరేగా ఉంటాయని సంబంధిత అధికారులకు హుకుం జారీ చేసినట్టు తెలుస్తున్నది. ఇటు కొందరు కౌన్సిలర్లను గుప్పిట్లో పెట్టుకొని, మిగతా వారందరినీ చిన్నచూపు చూస్తున్నట్టు తెలుస్తుండగా.. తీవ్ర అసహనం వ్యక్తమవుతున్నది.