Visit:
Salim Kumar | మలయాళ సినీ పరిశ్రమను తీవ్ర విషాదంలో ముంచెత్తుతూ ప్రముఖ నటుడు, జాతీయ అవార్డు గ్రహీత సలీం కుమార్ కన్నుమూశారు. గత కొంతకాలంగా తీవ్రమైన న్యుమోనియాతో బాధపడుతున్న ఆయన కొచ్చిలోని ఓ ప్రైవేట్ ఆసుపత్రిలో చికిత్స పొందుతూ శనివారం రాత్రి తుదిశ్వాస విడిచారు. వైద్యుల సమాచారం ప్రకారం రాత్రి 10:43 గంటల సమయంలో గుండెపోటు రావడంతో ఆయన మరణించారు. 1969 అక్టోబర్ 10న కేరళలోని వడక్కన్ పరవూర్లో జన్మించిన సలీం కుమార్, కొచ్చిన్ కళాభవన్ వేదికలపై మిమిక్రీ కళాకారుడిగా తన ప్రస్థానాన్ని ప్రారంభించారు. అనంతరం సినీ రంగంలోకి అడుగుపెట్టి ప్రత్యేకమైన కామెడీ టైమింగ్, హావభావాలతో ప్రేక్షకుల మనసులు గెలుచుకున్నారు. 2000లో విడుదలైన ‘తెన్కాశిపట్టణం’ చిత్రం ఆయనకు నటుడిగా విశేష గుర్తింపు తీసుకొచ్చింది.
మూడు దశాబ్దాలకు పైగా సాగిన సినీ ప్రయాణంలో సలీం కుమార్ 300కు పైగా చిత్రాల్లో నటించారు. కేవలం హాస్య పాత్రలకే పరిమితం కాకుండా భావోద్వేగ ప్రధాన పాత్రల్లోనూ తన ప్రతిభను చాటుకున్నారు. 2010లో విడుదలైన ‘ఆదామింటె మകൻ అబు’ చిత్రంలో ఆయన నటనకు గాను జాతీయ ఉత్తమ నటుడి అవార్డు లభించింది. అలాగే కేరళ రాష్ట్ర చలనచిత్ర పురస్కారాలను కూడా పలుమార్లు అందుకున్నారు. సినిమాలతో పాటు సోషల్ మీడియాలోనూ సలీం కుమార్కు ప్రత్యేక స్థానం ఉంది. ఆయన నటించిన చిత్రాల్లోని హావభావాలు, సంభాషణలు వేలాది మీమ్స్, ట్రోల్స్కు ప్రేరణగా మారాయి. దీంతో నెటిజన్లు ఆయనను ప్రేమగా ‘మీమ్ గాడ్’గా అభివర్ణించేవారు.
ఇటీవలి సంవత్సరాల్లో ఆయన లివర్ సిరోసిస్ సమస్యతో బాధపడుతున్నారు. అయితే ఈ వ్యాధి మద్యపానం కారణంగా కాకుండా వంశపారంపర్యంగా వచ్చిందని గతంలో ఆయన స్పష్టం చేశారు. తప్పుడు వైద్య చికిత్సల కారణంగా తన ఆరోగ్యం మరింత దెబ్బతిన్న విషయాన్ని కూడా ఆయన బహిరంగంగా వెల్లడించారు. సలీం కుమార్ మృతితో మలయాళ చిత్రసీమ ఒక గొప్ప నటుడిని కోల్పోయిందని సినీ ప్రముఖులు, అభిమానులు ఆవేదన వ్యక్తం చేస్తున్నారు. ఆయన కుటుంబ సభ్యులకు, అభిమానులకు పలువురు ప్రముఖులు సంతాపం తెలియజేస్తున్నారు.
