Visit:
ఇంఫాల్‌, నవంబర్‌ 29: మణిపూర్‌లోని తూర్పు ఇంఫాల్‌ జిల్లాలో తమ సొంత ఇళ్లకు తిరిగి వస్తున్న వందలాది మంది నిర్వాసితులు శనివారం భద్రతా సిబ్బందితో ఘర్షణ పడ్డారు. 2023 మేలో మణిపూర్‌లో జాతుల మధ్య ఘర్షణలు చెలరేగినప్పటి నుంచి వివిధ సహాయక శిబిరాలలో తలదాచుకుంటున్న వందలాది నిర్వాసితులు ఇంఫాల్‌ తూర్పు జిల్లా పరిధిలోని గ్వాల్తాబి గ్రామంలోని తమ ఇళ్లకు తిరిగివచ్చేందుకు నడుచుకుని వెళుతుండగా యాంగాంగ్‌పోక్పీ వద్ద భద్రతా దళాలు అడ్డుకున్నాయి. దీంతో భద్రతా సిబ్బందితో నిర్వాసితులు తలపడ్డారు. పరిస్థితి అదుపు తప్పడంతో నిర్వాసితులను చెదరగొట్టేందుకు భద్రతా దళాలు బాష్ప వాయు గోళాలను ప్రయోగించాయి. రాష్ట్రంలో సాధారణ పరిస్థితులు వచ్చినట్లు ప్రభుత్వం చెబుతుండగా తమ ఇళ్లకు వెళ్లేందుకు ఎందుకు అనుమతించడం లేదని ఆందోళనకారులలో ఒకరైన ఇబెంచ దేవి ప్రశ్నించారు. అయితే, పరిస్థితి అదుపులో ఉన్నప్పటికీ ఉద్రిక్తత కొనసాగుతోందని ఓ అధికారి తెలిపారు.
