అంతకుమించిన ఆనందం లేదు!

‘ఈ దేశంలో చెలామణి అయ్యే ప్రతీ రూపాయిలో తొంభై పైసలు కొందరే సంపాదిస్తారు. మిగతా పది పైసల గురించి అందరూ కొట్టుకుంటారు. సినిమాలో హీరో వాసు ఆ కొందరిలో ఒకడిగా ఉండాలనుకుంటాడు. ఆ కాన్సెప్ట్‌ ఆధారంగానే ఈ సినిమా తీశాం’ అన్నారు వరుణ్‌తేజ్‌.

‘ఈ దేశంలో చెలామణి అయ్యే ప్రతీ రూపాయిలో తొంభై పైసలు కొందరే సంపాదిస్తారు. మిగతా పది పైసల గురించి అందరూ కొట్టుకుంటారు. సినిమాలో హీరో వాసు ఆ కొందరిలో ఒకడిగా ఉండాలనుకుంటాడు. ఆ కాన్సెప్ట్‌ ఆధారంగానే ఈ సినిమా తీశాం’ అన్నారు వరుణ్‌తేజ్‌. ఆయన హీరోగా కరుణకుమార్‌ దర్శకత్వంలో రూపొందిన ‘మట్కా’ చిత్రం ఈ నెల 14న ప్రేక్షకుల ముందుకురానుంది. ఈ సందర్భంగా శనివారం వరుణ్‌తేజ్‌ పాత్రికేయులతో పంచుకున్న విశేషాలు..

• బర్మా నుంచి విశాఖపట్టణానికి శరణార్థిగా వచ్చిన వాసు అనే యువకుడి కథ ఇది. 1958 నుంచి 1982 వరకు అతని ప్రయాణాన్ని ఆవిష్కరిస్తుంది. ఓ సాధారణ యువకుడి స్థాయి నుంచి మట్కా ప్రపంచాన్ని శాసించే డాన్‌గా ఎదిగిన వైనాన్ని కళ్లకు కడుతుంది.
• మూడు కాల వ్యవధుల్లో సాగే ఈ కథలో నేను మూడు విభిన్న గెటప్స్‌లో కనిపిస్తాను. స్క్రిప్ట్‌ చదువుతున్నప్పుడే వాసు పాత్రని ఎలా పెర్‌ఫామ్‌ చేయాలో అర్థం చేసుకున్నా. అతని వయసు పెరుగుతున్న కొద్ది బాడీలాంగ్వేజ్‌, యాస మారుతుంటుంది. పాత్ర తాలూకు ఈ పరివర్తనను స్క్రీన్‌పై తీసుకురావడం ఛాలెంజింగ్‌గా అనిపించింది.
• ఈ కథలో ఎలాంటి సందేశాలు ఉండవు. పక్కా కమర్షియల్‌ సినిమా ఇది. వాసు పాత్ర తాలూకు కోపం, అసహనం, సంఘర్షణను ప్రేక్షకులు కూడా ఫీలవుతారు. అతని పాత్రతో ప్రయాణం చేస్తూ అతని తాలూకు భావోద్వేగాల్లో భాగమవుతారు. వాసు పాత్రను అంతటి శక్తివంతమైన ఎమోషన్స్‌తో దర్శకుడు తీర్చిదిద్దాడు.
• నా క్యారెక్టర్‌లోని ఇంటెన్స్‌ ఎమోషన్స్‌, వేరియేషన్స్‌ నచ్చి ఈ సినిమాకు అంగీకరించా. థియేటర్‌లోని ప్రేక్షకులు హీరోతో పాటు ప్రయాణం చేయాలి. వాడి క్యారెక్టర్‌తో కనెక్ట్‌ కావాలి. అతను గెలవాలని కోరుకోవాలి. అదే కమర్షియల్‌ సినిమా ఫార్ములా.
• గ్యాంగ్‌స్టర్‌ డ్రామా ‘గ్యాంగ్స్‌ ఆఫ్‌ వస్సేపూర్‌’ చిత్రానికి జీవీ ప్రకాష్‌ కుమార్‌ సంగీతాన్నందించారు. ఈ కాన్సెప్ట్‌ కూడా గ్యాంగ్‌వార్‌ నేపథ్యంలో నడుస్తుంది కాబట్టి ఈ చిత్రానికి కూడా అతనే పర్‌ఫెక్ట్‌ ఛాయిస్‌ అనిపించింది. ఈ సినిమాలో పాటలతో పాటు బ్యాక్‌గ్రౌండ్‌ స్కోర్‌ అద్భుతంగా కుదిరింది.
• దర్శకుడు కరుణకుమార్‌ మంచి రచయిత. ఆయన సెన్సిబిలిటీస్‌ నాకు చాలా ఇష్టం. తను నమ్మిన విషయాన్ని ధైర్యంగా చెప్పే ప్రయత్నం చేస్తారు. ఇది పీరియాడిక్‌ చిత్రం కాబట్టి చాలా భాగం సెట్స్‌ వేసి నాటి వాతావరణాన్ని పునఃసృష్టించాం.
• ఈ సినిమాలో దాదాపు నాలుగు గెటప్స్‌లో కనిపిస్తా. డిఫరెంట్‌ షేడ్స్‌తో సాగే ఇలాంటి పాత్ర దొరకడం అదృష్టంగా భావిస్తున్నా. ప్రేక్షకులు స్క్రీన్‌పై వరుణ్‌తేజ్‌ని కాకుండా వాసు పాత్రనే చూడాలి. దానికోసం చాలా కష్టపడ్డాను. ‘గద్దలకొండ గణేష్‌’ తర్వాత నేను బయటకు వెళ్లినప్పుడు చాలా మంది ‘గణేష్‌’ అని పిలిచేవారు. అదే నాకు బిగ్గెస్ట్‌ కాంప్లిమెంట్‌గా భావించా. సినిమాలోని క్యారెక్టర్‌ పేరుతో నన్ను పిలిస్తే ఓ నటుడిగా అంతకంటే ఆనందం మరొకటి ఉండదు.