లాంగ్‌ టర్మ్‌ డెట్‌ ఫండ్లు

రుణ సాధనాల్లో మదుపు చేసే డెట్‌ ఫండ్లు.. సాధారణంగా స్వల్పకాల లక్ష్యాల కోసం పెట్టుబడులు పెడతాయి. అయితే దీర్ఘకాలానికి మదుపు చేయాలనుకునేవారు ఈక్విటీ ఫండ్లలో పెట్టుబడులు పెట్టడం పరిపాటి. కానీ డెట్‌ ఫండ్లలోనూ దీర్ఘకాలానికి మదుపు చేయవచ్చు. రిస్క్‌ ఎక్కువ ఉన్నందున ఇన్వెస్టర్లందరికీ ఈక్విటీ ఫండ్లు సరిపోవు. కాబట్టి కొంత భాగాన్ని డెట్‌ ఫండ్లలోనూ మదుపు చేయడం ద్వారా దీర్ఘకాలంలో రిస్క్‌ తక్కువగా ఉండే రాబడులను పొందవచ్చు. 60 నుంచి 80 శాతం వరకు ఈక్విటీలోనూ, 20 నుంచి 40 శాతం డెట్‌ ఫండ్లలో మదుపు చేయడం ద్వారా బ్యాలన్స్‌ను సాధించవచ్చు. ఇలాంటి అసెట్‌ అలోకేషన్‌ పద్ధతిలో చాలావరకు పోర్టుఫోలియోలు స్థిరత్వం, వృద్ధిల మధ్య బ్యాలన్స్‌ను సాధించవచ్చు.

అలాగే పన్నులేని ఈపీఎఫ్‌, వీపీఎఫ్‌, పీపీఎఫ్‌, సుకన్య అకౌంట్‌ తదితర సాధానాల్లో పెట్టుబడులకు పరిమితులు వచ్చాక.. డెట్‌ ఫండ్లలో మదుపు చేయడాన్ని పరిగణనలోకి తీసుకోవచ్చు. పోర్టుఫోలియోను పరిస్థితులకు అనుగుణంగా బ్యాలన్స్‌ చేయడానికి కూడా డెట్‌ ఫండ్లు ఉత్తమం. ఉదాహరణకు ప్రస్తుత ఒడిదుడుకుల సమయంలో క్యాపిటల్‌ను కాపాడే డెట్‌ ఫండ్లు ఉత్తమ సాధానాలు అవుతాయి. బుల్‌ మార్కెట్‌లో ఈక్విటీలలో అధికంగా, డెట్‌ ఫండ్లలో స్వల్పంగా మదుపు చేయవచ్చు. ఏడాది నుంచి మూడేండ్ల కాల పరిమితితో ఉండే బాండ్లలో మదుపు చేసే షార్ట్‌ డ్యూరేషన్‌ ఫండ్లు, అలాగే కొన్ని నెలల నుంచి కొన్నేండ్ల వరకు మదుపు చేసే డైనమిక్‌ బాండ్‌ ఫండ్లు మదుపునకు అనువైనవి. బ్యాంకింగ్‌, పీఎస్‌యు ఫండ్లు ప్రధానంగా ప్రభుత్వ రంగ బ్యాంకులు, సంస్థలు, ఆర్థిక సంస్థల బాండ్లలో మదుపు చేస్తాయి. కొంత రిస్క్‌ ఉన్నా కార్పోరేట్‌ బాండ్ల ఫండ్లలో మదుపు చేయవచ్చు. ఫ్రభుత్వ సాధనాల్లో మదుపు చేసే గిల్ట్‌ ఫండ్లు పదేండ్ల మెచ్చూరిటీతో ఉంటాయి. ప్రభుత్వమే జారీ చేస్తున్నందున వీటిలో ఎలాంటి రిస్క్‌ లేదు.