Crime | పోయిన చోటే రాబట్టాలని నిందితులుగా మారుతున్న బాధితులు

తొండ ఊసరవెల్లిగా మారినట్లు.. మొదట్లో బాధితులుగా ఉండే కొందరు, పోయిన చోటే రాబట్టుకోవాలని ఇతరులను మోసం చేసి నేరస్తులుగా మారుతున్నారు. మోస పోయినప్పుడు వెంటనే పోలీసులకు ఫిర్యాదు చేయాల్సింది పోయి.. ఇతరులను మోసం చేస్తున్నారు.

• నేరాల బాటపడుతున్న బెట్టింగ్‌, డ్రగ్స్‌, ఉద్యోగం, అధిక వడ్డీ ఆశతో మోసపోయిన వారు
• మోసం జరిగితే పోలీసులకు ఫిర్యాదు చేయాలని సూచన
• అప్రమత్తతతో నేరగాళ్లకు చెక్‌

Crime | సిటీబ్యూరో, మే 14 (నమస్తే తెలంగాణ) : తొండ ఊసరవెల్లిగా మారినట్లు.. మొదట్లో బాధితులుగా ఉండే కొందరు, పోయిన చోటే రాబట్టుకోవాలని ఇతరులను మోసం చేసి నేరస్తులుగా మారుతున్నారు. మోస పోయినప్పుడు వెంటనే పోలీసులకు ఫిర్యాదు చేయాల్సింది పోయి.. ఇతరులను మోసం చేస్తున్నారు. బెట్టింగ్‌, డ్రగ్స్‌, సైబర్‌నేరాల్లో ఎక్కువగా ఇలాంటి ఘటనలు చోటు చేసుకుంటున్నాయి. బెట్టింగ్‌లలో ముందుగా ఫంటర్‌గా పెట్టుబడి పెట్టి, ఆ తరువాత సబ్‌ బుకీలతో పరిచయాలు పెంచుకొని, తన సర్కిళ్లలో ఉన్న వారిని బెట్టింగ్‌ వైపు మళ్లించేందుకు సబ్‌బుకీగా అవతారమెత్తుతున్నాడు. అలాగే డ్రగ్‌ కేసుల్లోను వినియోగదారుడిగా ఉంటూ ఆ తరువాత విక్రేతగా మారుతున్నారు. సైబర్‌నేరాల్లో పార్ట్‌టైమ్‌ ఉద్యోగాలు ఇప్పిస్తామని, డేటా ఎంట్రీ పనులంటూ నమ్మి మోసపోయే వారు, తిరిగి అదే బాటలో ఇతరులను మోసం చేస్తున్న ఘటనల్లో ఇప్పటి వరకు అనేక మంది అరెస్ట్‌ అయ్యారు.

ఇతరులను అప్రమత్తం చేయాలి..!

తాను మోసపోయాననే విషయం నెమ్మదిగా తెలుసుకున్నా.. నిందితులను పోలీసులకు పట్టించాలి. పోలీసులకు ఫిర్యాదు చేస్తే మొదట్లోనే ప్రధాన నిందితులను పట్టుకుంటారు. అలా కాకుండా తన డబ్బులు ఇచ్చిన వారి వద్ద నుంచి రాబట్టుకోలేక, ఇతరులను మోసం చేసి సంపాదించాలనే ఆలోచన తప్పు. మరోకరిని మోసం చేయడం వల్ల నిందితులుగా మారుతారు. నేరాల బాట పట్టకుండా నేరం చేసిన వారిని చట్టానికి పట్టించాలని పోలీసులు సూచిస్తున్నారు.

కొన్ని సంఘటనలు..

• ఇటీవల రాచకొండ పోలీసులు ఐపీఎల్‌ బెట్టింగ్‌ నిర్వహించే ముఠాను అరెస్ట్‌ చేసి రూ.1.42 కోట్లు ప్రీజ్‌ చేశారు. సబ్‌ బూకీలు జగదీశ్‌, అశోక్‌రెడ్డిలతో పాటు చరణ్‌ను అరెస్ట్‌ చేశారు. ఇందులో అశోక్‌రెడ్డి 12 ఏండ్లుగా బెట్టింగ్‌లో వంద కోట్ల వరకు పోగొట్టుకున్నాడు. అప్పటి వరకు ఫంటర్‌గా ఉన్న అశోక్‌రెడ్డి ప్రధాన బూకీ విపుల్‌ కలిసిన తరువాత బూకీగా మారి పోలీసులకు దొరికిపోయాడు.
• డ్రగ్స్‌ కేసుల్లో పలువురు ముందుగా ైస్టెల్‌ కోసం అలవాటు చేసుకొని, ఆ తరువాత డ్రగ్స్‌కు అలవాటు పడుతున్నారు. అప్పటి వరకు డబ్బులు ఇచ్చి డ్రగ్స్‌ కొనేవాళ్లు, తరువాత తమకు తెలిసిన వారికి తమ వద్ద ఉన్న డ్రగ్స్‌ను ఎక్కువ ధరకు అమ్ముతూ డ్రగ్స్‌ విక్రేతలుగా మారుతున్నారు. ఇలా మొదట్లో డ్రగ్స్‌ వినియోగదారుడు, ఆ తరువాత డ్రగ్‌ స్మగ్లర్‌గా మారుతూ పలు కేసుల్లో పట్టుబడ్డారు.
• ఉద్యోగాలు ఇప్పిస్తామని చెప్పే వారి మాటలు నమ్మి వారి బుట్టలో పడి డబ్బు చెల్లించి మోసపోతున్నారు. ఆ తరువాత పోగొట్టుకున్న డబ్బును తిరిగి రాబట్టుకోవడానికి ఇతరులకు కూడా ఉద్యోగాలు ఇప్పిస్తామని నమ్మించి వారి వద్ద నుంచి డబ్బులు తీసుకొని బిచాణా ఎత్తేస్తున్నారు. ఆ తరువాత కరుగట్టిన సైబర్‌నేరగాళ్లుగా మారుతున్నారు. ఇటీవల డేటా ఎంట్రీ ఉద్యోగాలు ఇప్పిస్తామంటూ మోసాలకు పాల్పడుతున్న ముఠాను సైబర్‌క్రైమ్‌ పోలీసులు అరెస్ట్‌ చేశారు. అందులో ఒక నిందితుడు గతంలో డబ్బులు పోగొట్టుకున్నాడు. తర్వాత తాను కూడా అలాగే ఇతరులను మోసం చేయాలని పక్కా ప్లాన్‌తో కాల్‌సెంటర్‌ను ఏర్పాటు చేసి మోసాలకు పాల్పడుతూ పోలీసులకు చిక్కాడు. ఢిల్లీలోని పలువురు సైబర్‌ నేరగాళ్లు ఇలాగే మొదట్లో ఉద్యోగమని కాల్‌సెంటర్ల నిర్వాహకుల చేతిలో చిక్కి మోసపోయారు. ఆ తరువాత వాళ్లను చూసి నేరగాళ్లుగా మారుతున్నారు.