మునిచ్: టీమిండియా క్రికెటర్ కేఎల్ రాహుల్ ఇటీవల సర్జరీ చేయించుకున్నాడు. అయితే ఆ సర్జరీ విజయవంతమైందని, దాని నుంచి కోలుకుంటున్నట్లు అతను తెలిపాడు. ఇటీవల సౌతాఫ్రికాతో జరిగిన టీ20 సిరీస్కు గాయం కారణంగా రాహుల్ దూరమైన విషయం తెలిసిందే. గజ్జల వద్ద నొప్పి వల్ల రాహుల్ విరామం తీసుకున్నాడు. తన క్షేమం కోరుతూ ప్రార్థనలు చేసిన ప్రతి ఒక్కరికీ అతను థ్యాంక్స్ తెలిపాడు. కొన్ని వారాల పాటు ఇబ్బందిపడ్డానని, ఇప్పుడు కోలుకుంటున్నట్లు చెప్పాడు. కానీ సర్జరీ సక్సెస్ అయినట్లు తెలిపాడు. అయితే షెడ్యూల్ ప్రకారం ఇంగ్లండ్తో జరిగే అయిదవ టెస్టుకు కూడా రాహుల్ దూరం కానున్నాడు.
రాహుల్కు జర్మనీలో సర్జరీ జరిగింది. స్పోర్ట్స్ హెర్నియా కోసం అక్కడ చికిత్స చేయించుకున్నాడు. మరి కొన్ని నెలల పాటు రాహుల్ ఆటకు దూరం అయ్యే అవకాశాలు ఉన్నాయి. దిగువ ఉదర సంబంధిత సమస్యలతో రాహుల్ సతమతం అయ్యాడు. గజ్జల వద్ద నొప్పి, తొడ కండరాలు పట్టేయడం వంటి సమస్యలతో రాహుల్ బాధపడ్డాడు. 30 ఏళ్ల రాహుల్ ఇప్పటి వరకు 42 టెస్టులు, 42 వన్డేలు, 56 టీ20లు ఆడాడు. రాహుల్ మళ్లీ ఇండియా తరపున ఆడాలంటే కనీసం కొన్ని నెలల సమయం పడుతుందని నిపుణులు చెబుతున్నారు. కొన్ని రోజుల రెస్ట్ తర్వాత అతనికి ఎన్సీఏలో శారీరక శిక్షణ ఉంటుందని బీసీసీఐ వర్గాలు తెలిపాయి.