ఐఎన్‌ఎస్‌ కేసరి.. ఉభయచర యుద్ధ నౌక

2026, అక్టోబర్‌ 31న భారత నావికాదళానికి చెందిన ఐఎన్‌ఎస్‌ కేసరి (INS Kesari) నౌకలోకి నీరు చేరింది. ఆ సమయంలో ఈ నౌక విశాఖపట్నం నేవల్‌ డాక్‌యార్డ్‌లో నిలిపి ఉంచారు. ఈ ఘటనలో ఎటువంటి ప్రాణనష్టం లేదా సిబ్బందికి గాయాలు సంభవించలేదని భారత నావికాదళం వెల్లడించింది. ఈ నౌక గురించి తెలుసుకుందాం.

వివరాలు
ఐఎన్‌ఎస్‌ కేసరి అనేది భారత నావికాదళానికి చెందిన ల్యాండింగ్‌ షిప్‌ ట్యాంక్‌ తరహా ఉభయచర యుద్ధ నౌక. ఇది శార్దూల్‌-క్లాస్‌ (Shardul-class)కు చెందినది. ఈ నౌక గుర్తింపు సంఖ్య లేదా పెన్నెంట్‌ నంబర్‌ L15. ఉభయచర నౌకలు సముద్రం నుంచి తీర ప్రాంతాలకు సైనిక బలగాలు, యుద్ధ ట్యాంకులు, సాయుధ వాహనాలు, ఇతర సైనిక సామగ్రిని తరలించడానికి ఉపయోగపడతాయి.

నిర్మాణం
ఐఎన్‌ఎస్‌ కేసరిని పశ్చిమ బెంగాల్‌లోని కోల్‌కతాకు చెందిన గార్డెన్‌ రీచ్‌ షిప్‌బిల్డర్స్‌ అండ్‌ ఇంజినీర్స్‌ (GRSE) సంస్థ నిర్మించింది. ఈ నౌకను 2008, ఏప్రిల్‌ 5న విశాఖపట్నంలో భారత నావికాదళంలోకి అధికారికంగా ప్రవేశపెట్టారు. ఇది శార్దూల్‌-క్లాస్‌లో రెండో నౌకగా గుర్తింపు పొందింది.

విధులు
ఐఎన్‌ఎస్‌ కేసరి ప్రధానంగా ఉభయచర సైనిక కార్యకలాపాలు (Amphibious Operations) నిర్వహించడానికి రూపొందించారు. ఇది సైనిక బలగాలు, యుద్ధ ట్యాంకులు, సాయుధ వాహనాలు, ఇతర రక్షణ సామగ్రిని సముద్రం నుంచి తీర ప్రాంతాలకు చేరవేయగలదు. ఈ నౌక సుమారు 500 మంది సైనికులను, యుద్ధ ట్యాంకులు, ఇతర సైనిక వాహనాలను రవాణా చేయగల సామర్థ్యాన్ని కలిగి ఉంది. అంతేకాకుండా, మానవతా సహాయం, విపత్తు నిర్వహణ చర్యల్లో కూడా ఉపయోగపడుతుంది.

టెక్నాలజీ – ప్రాధాన్యం
ఐఎన్‌ఎస్‌ కేసరి సుమారు 125 మీటర్ల పొడవు కలిగి ఉంటుంది. దీని పూర్తి లోడ్‌, స్థానభ్రంశ సామర్థ్యం (Full-load Disp lacement) సుమారు 5,600 టన్నులు. ఇది హెలికాప్టర్ల నిర్వహణకు అనువైన సదుపాయాలను కూడా కలిగి ఉంది. ఐఎన్‌ఎస్‌ కేసరి భారత నావికాదళం.. ఉభయచర యుద్ధ సామర్థ్యాన్ని బలోపేతం చేసే ముఖ్యమైన నౌక. సైనిక బలగాలు, ఆయుధాలు, సామగ్రిని తీర ప్రాంతాలకు తరలించడంతో పాటు, ప్రకృతి వైపరీత్యాల సమయంలో సహాయక చర్యలు చేపట్టడంలో కూడా ఇది కీలక పాత్ర పోషిస్తుంది.